Zak 12
12
Rak'ob'resinkil wi' chik Jerusalén
1A'an a'in li raatin li Yos chirix li tenamit Israel. Li Qaawa', li kihelok re li choxa ut kik'ojob'ank re li ruuchich'och' sa' xna'aj, li kik'ehok xyu'am li winq ut li ixq, a'an kixye chi jo'ka'in:
2“Laa'in tink'e Jerusalén jo' li ha' nakaltesink cho'q reheb' chixjunileb' li tenamit li wankeb' chi xsutam, naq te'raj reechaninkil Jerusalén jo'wi' Judá.
3“Sa' li kutan a'an tink'e Jerusalén jo' junaq aalilpek cho'q reheb' chixjunileb' li tenamit: jo'k'ihaleb' li te'raj xjunajinkil rib' re numtaak sa' xb'een, q'axal ra te'xk'ul. 4Toja' naq tinxib'esiheb' chixjunileb' li kawaay ut tinkaanob'resi ruheb' li wankeb' chirixeb' -chan li Qaawa'-. Ab'anan eb' li ralal xk'ajol laj Judá twusilaheb', ut mutz' tinkanab'eb' chixjunil li xkawaayeb' li junch'ol chik. 5Naq eb' li xjolomileb' laj Judá te'ril a'an, te'xye sa' xch'ooleb': «Li Qaawa', li Nimajwal Yos, a'an xYoseb' li wankeb' Jerusalén, ut a'an nak'ehok xkawilaleb'», cha'qeb'.
6“Sa' li kutan a'an li xjolomileb' laj Judá jo'kaqeb' li xam sa' li si' malaj sa' xyanqeb' li junq joob' chi triiw: te'xsach chixjunileb' li tenamit chi xsutameb', ut eb' laj Jerusalén wanqeb' wi' chik sa' li xna'ajeb'. 7Ab'anan xb'een xb'een tinkoleb' laj Judá, re naq ink'a' taanimanq li xloq'al eb' li ralal xk'ajol laj David, ut eb' laj Jerusalén ink'a' te'xnimob'resi rib' sa' xb'eeneb' laj Judá. 8Sa' li kutan a'an tintenq'aheb' li wankeb' Jerusalén: li jwal lub'lub'eb' sa' xyanqeb', q'axal kawaqeb' chik rib' jo' laj David; ut eb' li ralal xk'ajol laj David, chanchanaqeb' li Yos, jo'kaqeb' li x'ánjel li Qaawa' chi k'amok b'e chiruheb'.
9“Sa' li kutan a'an tinsach ruheb' yalaq ani chi tenamitul li taaraj yalok rik'in Jerusalén. 10Ut sa' xb'eeneb' li ralal xk'ajol laj David ut eb' li wankeb' Jerusalén tinhoy jun musiq'ej re usilal ut tijok; toja' naq tine'xka'ya laa'in.#12,10 Jn 19,37; Ap 1,7. Ut li xe'xpaynumi chi ch'iich' te'yot'e'q xch'ool ut te'yaab'aq chirix, jo' na'uxk yaab'ak chirix li xb'een alalb'ej malaj chirix li junaj chirib'il.
11“Sa' li kutan a'an q'axal nimaq li rahil ch'oolej sa' li tenamit Jerusalén, kama' li kiwank aran Hadad-Rimón, sa' xtaq'ahil Mejido. 12Te'yaab'aq chixjunileb' ut taaraho'q xch'ool li junq kab'al: eb' li ralal xk'ajol laj David te'yaab'aq xjuneseb' ut li rixaqileb' te'yaab'aq xjuneseb'. Jo'kanaqeb' ajwi' eb' li ralal xk'ajol laj Natán ut eb' li rixaqileb'; 13eb' li ralal xk'ajol laj Leví ut eb' li rixaqileb'; eb' li ralal xk'ajol laj Simí ut eb' li rixaqileb'. 14Jo'kanaqeb' chixjunileb' li junq kab'al: sa' jun na'ajej te'yaab'aq eb' li winq, ut sa' jalan chik na'ajej te'yaab'aq eb' li rixaqileb'.
Currently Selected:
Zak 12: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
