Knt 5
5
Li winq
1Ak xin'ok sa' xna'aj li wawimq,
at wanab', at xsumwaanm.
Ak xinxok linmiir ut linsununkil b'an,
xintzeka li xya'al kab' sa' li xsok,
ut xwuk' linb'iin ut li xya'al xtu' wakax.
Ex was wiitz'in, tzekanqex ut uk'anqex,
toj taak'ojlaaq eech'ool, ex wamiiw!
Maa'ani li winq
Li ixq
2Ak yookin chi wark, ab'an linch'ool aj'ook.
Xwab'i xyaab' xkux linrahom yo chi xtoch'b'al li okeb'aal:
Li winq
“Te li okeb'aal chiwu, at inrahom, at xsumwaanm,
at inmukuy li maak'a' aamuxul.
Xt'aqaak linjolom xb'aan li sujew,
yo chi t'uluk li xchu'ke sa' li wismal”.
Li ixq
3“Ak xwisi li waq' chiwix.
Ma tink'e wi' chik?
Ak xinch'ajeb' li woq.
Ma tintz'ajniheb' wi' chik?”.
4Linrahom xch'ik li ruq' sa' xhopolal li okeb'aal,
ut k'ajo' naq naxamnak li waanm!
5Xinwakliik re xteeb'al li kab'l chiru linrahom,
ut sa'eb' li wuq' natz'iltz'otk li miir,
ha'lesinb'il miir x'elk sa'eb' li ru'uj wuq'
li xhoye'k sa' xb'een li xteeleb'aal li okeb'aal.
6Xinte li kab'l chiru linrahom,
ab'an ak xkoho chik linrahom, maa'ani chik.
Xinkanaak chi sachso linch'ool naq xwab'i chi aatinak.
Xinsik', ab'an ink'a' xintaw;
xinb'oq, ab'an ink'a' xinxsume.
7Xine'xtaw eb' laj k'aak'alenel
li neke'xb'eeni li tenamit chiru q'oqyink.
Xine'xteni, xine'xtiq';
eb' laj k'aak'alenel li wankeb' sa' xb'een li suttz'ak
xe'risi lint'ikr li tz'aptz'o wi' li xnaq' wu.
8Nintz'aama cheru, ex rixqilal Jerusalén,
wi teetaw linrahom,
k'aru teeye re?
Yehomaq re naq kamk we chi rahok.
Eb' laj b'ichanel
9K'aru nawno wi' ru laarahom sa' xyanqeb' li junch'ol chik,
laa'at li ch'ina'usat sa' xb'een xteepal chixjunileb' li ixq?
K'aru nawno wi' ru laarahom sa' xyanqeb' li junch'ol chik
naq nakaye qe xb'aanunkil a'in?
Li ixq
10Linrahom nalemtz'unk xtib'el ut kaqmoyink,
nawno ru chi tz'aqal sa' xyanqeb' k'iila o'q'ob' chi winq.
11Li xjolom a'an tz'aqal chaab'il oor;
li xchamal rismal a'an kama' xxaq li kala',
q'eq q'eq jo' rix li tuntz'oq.
12Li xsa' eb' li ru chanchaneb' mukuy
li neke'atink sa' xya'al xtu' wakax
ut yookeb' chi hilank chire roqha'.
13Li xnaq' ru a'an chanchan li xna'aj awimq
awb'il wi' junes sununkil b'an;
li xtz'uumal re chanchaneb' li uutz'u'uj,
li najolk'ok wi' ha'lesinb'il miir.
14Eb' li ruq' kama' li matq'ab' oor,
uutz'u'ujinb'il rik'in chaab'il pek re Tarsis;
li re xch'ool chanchan marfil ji'b'il ru chi us,
uutz'u'ujinb'il rik'in raxjohinkil pek.
15Eb' li ra' chanchaneb' li oqech yiib'anb'ileb' rik'in saqalpek,
xaqab'anb'ileb' sa' xb'een li chaab'il oor.
Linrahom na'ilok kama' li tzuul Líbano,
k'ajo' xch'ina'usal kama'eb' li yaw.
16Sa' li re wank li q'unil ut li ki'il,
ut a'an q'axal ch'ina'us rilb'al.
Jo' a'an linrahom,
jo' a'an li xsumwaanm,
ex rixqilal Jerusalén!
Currently Selected:
Knt 5: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
