Ap 2
2
Éfeso
1“Tz'iib'an rik'in li x'ánjel li Iklees li wank Éfeso: «A'in naxye li wank li wuqub' chi chahim sa' xnim uq', li nab'eek sa' xyi li wuqub' chi xna'aj kanteel ooro. 2Ninnaw laab'aanuhom, laakawil k'anjel ut li xnimal aakuyum; ninnaw ajwi' naq ink'a' nakakuyeb' li ink'a' useb' xch'ool. Xayaleb' rix li neke'xye rib' naq a'aneb' apóstol ut maawa'eb', ut xataw ru naq aj tik'ti'eb'. 3Wank aakuyum; xakuy rahilal sa' ink'ab'a' ut ink'a' xatlub'k. 4Ab'anan ch'a'aj naweek'a chawix naq ink'a' chik nakatrahok jo' junxil. 5K'e b'i' reetal b'ar t'anjenaqat chaq; yot' aach'ool jal aak'a'uxl ut b'aanu laak'anjel jo' xab'aanu xb'enwa. Wi ut ink'a', tinxik aawik'in ut twisi li xna'aj kanteel sa' li na'ajej b'ar wank wi' anaqwan. 6Ab'anan wank li us nakab'aanu, a' naq xik' nakawil li neke'xb'aanu eb' laj nikolaíta;#2,6 Eb' laj nikolaíta a'aneb' kristiyan li ke'risi rib' sa' li tz'aqal paab'aal. jo'kan ajwi' laa'in xik' nawil li xna'leb'eb'. 7Ani wank xxik, chirab'ihaq li naxye li Musiq'ej reheb' li Iklees: Li taaq'axoq u tink'e chi xtzeka ru li che' nak'ehok yu'am, li wank sa' li xsantil na'aj li Yos».#2,7 Gn 2,9; 3,22-24; Ap 22,2.
Esmirna
8“Tz'iib'an rik'in li x'ánjel li Iklees li wank Esmirna: «A'in naxye li xb'een ut li rosob'l, li kikamk ut kiyo'laak wi' chik. 9Ninnaw li xnimal aarahilal ut laaneb'a'il (ab'an b'ihomat). Ninnaw laamajewankil xb'aaneb' li neke'xye rib' naq a'aneb' aj Judiiy ut maawa'eb', a'aneb' b'an xch'utleb'aal ochoch laj tza. 10Maaxiwa li b'arwan ok aawe chi xkuyb'al: wankeb' sa' eeyanq te'k'ehe'q sa' tz'alam xb'aan laj tza re taayale'q eerix. Teek'ul xninqal rahilal, ab'an ka'ajwi' yal chiru lajeeb' kutan.#2,10 Dn 1,12.14. Tiikaq aach'ool toj reetal sa' laakamik, ut tink'e aawe li Yu'am cho'q aaq'ajkamunkil. 11Ani wank xxik, chirab'ihaq li naxye li Musiq'ej reheb' li Iklees: Li taaq'axoq u ink'a' taarahob'tesiiq xb'aan li xkab' kamk».#2,11 Li xkab' kamk a'an li tojb'amaak chi junelik (Ap 20,6.14; 21,8).
Pérgamo
12“Tz'iib'an rik'in li x'ánjel li Iklees li wank Pérgamo: «A'in naxye li wank xjutz' ch'iich' ka'pak'al xq'esnal. 13Ninnaw b'ar wankat: aran b'arwi' wank li xk'ojarib'aal laj tza. Laa'at kaw aach'ool chiwix ut ink'a' xatz'eqtaana inpaab'ankil chi moko sa'eb' li kutan kiwank wi' laj Antipas, li kixch'olob' li yaal chiwix tiik xch'ool ut kikamsiik sa' eeyanq aran b'ar wank wi' laj tza. 14Ab'anan wank k'aru tatinq'us wi': wank wankeb' aawik'in li neke'xpaab' li xk'utum laj Balaham. A'an kik'utuk chiru laj Balak xq'unb'esinkileb' chi maakob'k eb' li ralal xk'ajol laj Israel re naq te'xtzeka li tib' mayejanb'il chiru li xyoseb' ut te'xmux rib'eb'.#2,14 Nm 25,1-21; 31,16. 15Jo'kan ajwi' wankeb' aawik'in li neke'xpaab' li xk'utum eb' laj nikolaíta. 16Yot' b'i' aach'ool jal aak'a'uxl. Wi ut ink'a', tinxik chi seeb' wankat wi' ut tinyaloq rik'ineb' a'an chiru li ch'iich' na'elk chi xtz'uumal we. 17Ani wank xxik, chirab'ihaq li naxye li Musiq'ej reheb' li Iklees: Li taaq'axoq u tink'e chi xtzeka li muqmuukil mana'. Tink'e ajwi' jun xch'ina saqi pek, let'exinb'ilaq chiru li ch'ina pek jun ak' k'ab'a'ej li maa'ani nanawok re, ka'ajwi' li taak'uluq re».
Tiatira
18“Tz'iib'an rik'in li x'ánjel li Iklees li wank Tiatira:
«A'in naxye li Ralal li Yos, li wank xsa' li ru kama' raq'xam ut li roq chanchan chaab'il q'anch'iich'. 19Ninnaw laab'aanuhom, laarahom, laapaab'aal, laak'anjel ut laakuyum. Ninnaw ajwi' naq li xab'aanu sa' roso'jik q'axal chaab'il chik chiru li xab'aanu xb'enwa. 20Ab'an ch'a'aj naweek'a chawix naq nakak'ul chi k'anjelak lix Jesabel,#2,20 Lix Jesabel a'an jun propeet aj b'alaq' xkomoneb' laj nikolaíta (cf. 1 R 16,31; 2 R 9,22.30). li ixq a'an li naxye rib' naq propeet ut yo chi xtzolb'aleb' ut chi xb'alaq'inkileb' laj k'anjel chiwu re naq te'xmux rib'eb' ut te'xtzeka li tib' mayejanb'il chiru li xyoseb'. 21Xinxaqab' xkutankil chiru re raj tixyot' xch'ool tixjal xk'a'uxl, ab'anan ink'a' naraj xjalb'al xk'a'uxl chirix li muxuk ib'. 22K'e reetal, tinkut li ixq a'an chiru ch'aat sa' rahilal; ut eb' li neke'xmux rib' rik'in teb'ink'e sa' xninqal rahilal, wi ink'a' te'xjal xk'a'uxl chirixeb' li xb'aanuhom. 23Tinq'axtesiheb' li ralal xk'ajol chi kamk. Chi jo'kan chixjunileb' li Iklees te'xnaw naq laa'in li nintz'ili li xch'ooleb' ut li xk'a'uxeb'. Tink'e eere chejunjunqal jo' chanru leeb'aanuhom.#2,23 Sal 62,13.
24«A'ut laa'ex li junch'ol chik aj Tiatira, li ink'a' nekepaab' li na'leb' a'in, laa'ex li ink'a' eenawom eb' li xchamal laj tza, jo' neke'xye, tinye eere: Maajun chik iiq tink'e sa' eeb'een, 25ka'aj b'an wi' naq chek'uulaaq li b'arwan ak wank eerik'in toj reetal tinsutq'iiq chaq. 26Li ani taaq'axoq u, a' li tixk'e xch'ool chirixeb' linb'aanuhom chalen toj sa' roso'jik, tink'e xwankil sa' xb'eeneb' li tenamit. 27Tixb'eresiheb' rik'in b'aar ch'iich', tixsacheb' xwankil jo' naq neke'jore'k li pak'b'il sek',#2,27 Sal 2,8-9. 28a' ajwi' li wankil ink'ulum laa'in rik'in linYuwa'; ut tink'e re li kaq chahim.#2,28 Li kaq chahim naraj naxye naq li tz'aqal aj paab'anel taatz'aqonq sa' li xnimal xloq'al li Kriist waklijenaq chi yo'yo (cf. Ap 22,16). 29Ani wank xxik, chirab'ihaq li naxye li Musiq'ej reheb' li Iklees».
Currently Selected:
Ap 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.