Sal 42
42
2Jo' naq li kej naxsik' li roqha',
jo'kan naq yookin chasik'b'al, at inYos.
3Li waanm nachaqik re chirix li Qaawa', li yo'yookil Yos.#42,2-3 Sal 63,2; 143,6.
Jo'q'e xaq tinruuq toxwil xnaq' ru linYos?
4Li xya'al wu a'an linwa chi q'eq ut chi kutan,
naq junelik neke'xye we:
“B'ar wank laaYos?”, chankeb'.
5Namayok li waanm naq nanaqk sa' inch'ool
chanru naq xink'am xb'eheb' li k'iila tenamit:
yooko chi xik sa' rochoch li Yos
ut japjo qe chi yoxink.
K'ajo' li sahil ch'oolej sa' li ninq'e!
6K'a'ut naq ninyot'e'k ut ch'i'ch'i' wankin?
Li woyb'enihom wank rik'in li Yos;
laa'in toj tinloq'on ru:
a'an laj Kolol we, a'an linYos!
7Q'axal namayok li waanm,
jo'kan naq nakatjultiko'k we, at inYos,
arin toj sa' xyo'leb'aal li nima' Jordán ut sa' xch'och'el Hermón,
arin toj sa' li tzuul Misar.
8K'ajo' naq na'aakanak xyaab'eb' li nima'
naq neke'xjunaji rib' sa' xchamal li jul;
xlaje'nume'k sa' inb'een chixjunileb' li xkawil oq nima'
taqlanb'ileb' aab'aan.#42,8 Jon 2,4.
9Chi kutan li Qaawa' tixtaqla chaq li rusilal,
ut chi q'eq li xb'ich taamusiq'anq we:
a'anaq lintij chiru linYos aj yoob'tesihom we.
10Tinye re li Yos: “At insaqoonak,
k'a'ut naq xinsachk sa' aach'ool?
K'a'ut naq ra sa' li waanm?
Q'axal rahob'tesinb'ilin xb'aaneb' li xik' neke'ilok we”.
11Neke'xtoq linb'aqel ut nikine'xhob';
chixjunil li kutan neke'xpatz' we:
“B'ar wank laaYos?”.
12K'a'ut naq ninyot'e'k ut ch'i'ch'i' wankin?
Li woyb'enihom wank rik'in li Yos;
laa'in toj tinloq'on ru:
a'an laj Kolol we, a'an linYos!
Currently Selected:
Sal 42: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.