Sal 31
31
SAALM 31 (30)
Tijok sa' li raaxiik'
1Re li xjolomileb' laj b'ichanel. Xsaalm laj David.
2At Qaawa', aawik'in ninmuhenk,
maajaruj taxaq taasachb'esiiq inch'ool chawix!
Chinaakol taxaq sa' xk'ab'a' laatiikilal,
3chinaawab'i taxaq
ut chaseeb'a chaq aawib' chinkolb'al!
Laa'at taxaq linsaqoonak,
linkawil ochoch b'arwi' tinkol wib',
4xb'aan naq laa'at laj kolol we ut linkawilal.
Sa' xk'ab'a' laarahom chak'am inb'e ut chinaab'eres.
5Chinaawisi taxaq sa' linra'lenkil xe'xk'e:
relik chi yaal naq laa'at linmuheelahom.
6Sa' laawuq' ninq'axtesi wib', at Qaawa';#31,6 Lk 23,46; Hch 7,59.
laa'at nakatkolok we, at inYos tiik aach'ool.
7Xik' nawileb' li neke'loq'onink jalanil yos li maak'a' neke'ok wi';
a'ut laa'in k'ojk'o li waanm rik'in li Qaawa'.
8Chisaho'q linch'ool, chisaho'q li waanm
sa' xk'ab'a' xnimal laarahom.
Laa'at xawil naq q'axal xtoq'ob'aal wu
ut xanaw chixjunil li xrahil li waanm;
9ink'a' xinaaq'axtesi sa' ruq'eb' li xik' neke'ilok we,
xinaak'e b'an chi b'eek sa' jun li na'ajej jwal helho ru.
10Chawuxtaana taxaq wu, at Qaawa',
xb'aan naq q'axal ra wankin.
Xb'aan xyot'ik li waanm yo chi lajk xsa' li wu,
jo'wi' linkux ut chixjunil lintib'el.
11Yo chi oso'k linyu'am sa' li rahilal,
yookin chi tixk xb'aan li tz'uyink ut li yaab'ak;
xlajk linmetz'ew xb'aan li ra nink'ul:
chanchan puk'inb'il linb'aqel naq naweek'a.
12Se'b'eetalin xb'aaneb' chixjunil li xik' neke'ilok we,
nikine'xyib' aj chik chixjunileb' li wechkab'al.
K'ajo' naq nikine'xxiwa eb' li wech'alal;
jo'k'ihal li nekeb'ink'ul sa' b'e,
neke'elelik chiwu.#31,12 Job 19,13; Sal 38,12; 69,9; 88,19.
13Tz'eqb'ilin chirix ch'oolej
jo' na'uxk re junaq kamenaq,
kama'in aj chik junaq jorol sek'.
14Nawab'i li aatin neke'xyoob' chiwix li k'iila tenamit
-xiw xiw yalaq b'ar-#31,14 Jr 20,4.10; 46,5; 49,29; Lm 2,22.
naq neke'xjunaji rib' chinrahob'tesinkil
ut neke'raj raj inkamsinkil.
15A'ut laa'in kaw linch'ool aawik'in, at Qaawa';
ninye sa' li waanm: “Laa'at linYos!”.
16Sa' laawuq' wank linyu'am,
chinaakol taxaq sa' ruq'eb' li xik' neke'ilok we,
sa' ruq'eb' li neke'rahob'tesink we.
17Chak'ut taxaq xsahil aawu re laj k'anjel chawu
ut chinaakol taxaq sa' xk'ab'a' laarahom!
18At Qaawa',
ink'a' taxaq xutaanal tinkanaaq rik'in xyaab'ankil laak'ab'a';
a'eb' b'an li ink'a' useb' xch'ool che'kanaaq sa' xutaan,
ch'anch'ooqeb' taxaq naq te'xik sa' xb'alb'a.
19Che'memo'q taxaq eb' laj tik'ti',
eb' li neke'hob'ok re li tiik xch'ool
rik'in q'etq'etil ut majewank.
20At Qaawa', k'ajo' xnimal laawusilal
cho'q reheb' li neke'loq'onink aawe:
nakahoy laarahom sa' xb'eeneb' li neke'muhenk aawik'in,
chiruheb' chixjunil li poyanam.
21Nakamuheelaheb' rub'el laawoq rub'el laawuq',
re xjek'b'aleb' rik'ineb' li neke'yoob'ank ch'a'ajkilal;
nakamuqeb' sa' laaloq'laj muheb'aal
chiruheb' li neke'sachok rik'in ru'uj raq'eb'.
22Usilaatinanb'il taxaq li Qaawa' xb'aan li xrahom:
a'an kixb'aanu cho'q we sachb'ach'oolej
naq sutsuukin chaq xb'aaneb' li xik' neke'ilok we.
23Laa'in xinye sa' lin'ookel k'a'uxl:
“Xin'isiik rub'el laawoq rub'el laawuq'!”.
Ab'anan naq xinyaab'a laak'ab'a',
xawab'i chaq lintz'aamahom.
24Cherahaq taxaq li Qaawa' laa'ex li nekexpaab'ank chiru.
Li Qaawa' naxk'aak'aleheb' li neke'loq'onink re,
a'ut numtajenaq wi' chik ra te'xk'ul
jo'k'ihaleb' li neke'xq'etq'eti rib'.
25Kawaq leech'ool ut yalyo'q eeq'e chi k'anjelak
chejunilex li k'ojk'o leech'ool rik'in li Yos!
Currently Selected:
Sal 31: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
