Pr 3
3
Chanru xtawb'al li chaab'il na'leb'
1At walal ink'ajol, misachk sa' laach'ool link'utum
ut k'uula sa' laawaanm linchaq'rab';
2chi jo'kan taanajto'q roq laayu'am
ut us tat-elq sa' chixjunil, chiru k'iila chihab'.
3B'aanu li yaal ut li rahok chi junelik;
chak'uulaheb' jo' junaq chaab'il q'ol chakux,
ut chatz'iib'aheb' sa' laach'ool.
4Chi jo'kan osob'tesinb'ilaqat xb'aan li Yos
ut taak'ehe'q aaloq'al xb'aaneb' li tenamit.#3,4 Lk 2,52.
5K'ojk'ooq aach'ool rik'in li Yos chi junelik,
ut maawa' rik'in laak'a'uxl laana'leb'.#3,5 Eklo 2,6; Ro 12,16.
6Sa' chixjunil li k'aru taab'aanu
wanq sa' aach'ool li Qaawa' Yos,
ut A'an tixtiikob'resi laab'e.
7Maaye aawib' naq k'ajo' aana'leb';
chawoxloq'i li Qaawa'
ut chatz'eqtaana li ink'a' us.
8Chi jo'kan maak'a'aq aayajel
ut q'axal kawaq aawib'.
9Chak'e xloq'al li Qaawa' rik'ineb' laasahil eechej
ut rik'inatq li xb'een ru laawawimq.
10Chi jo'kan eb' laak'uuleb'aal te'nujaq chi ixim,
ut jwal naab'alaq laa'ak' b'iin.
11At walal ink'ajol, maatz'eqtaana laatijb'al xb'aan li Qaawa',
chi moko tatch'i'taaq naq tatxq'us,#3,11 Job 5,17; Heb 12,5-6.
12xb'aan naq li Qaawa' naxq'us li naxra,#3,12 Ap 3,19.
jo' jun li yuwa'b'ej naxq'us li ralal raaro xb'aan.#3,11-12 Dt 8,5; 2 S 7,14; Heb 12,5-6.
13Us xaq reheb' li xe'xtaw li chaab'il na'leb',
us xaq reheb' li wankeb' xseeb'al xk'a'uxeb'.
14A'an jwal us wi' chik
chiru xk'eeb'al li tumin sa' yakleb'aal tumin;
jwal terto xtz'aq chiru li oor.
15Li chaab'il k'a'uxl q'axal xchaq'alil ru chiru li lemtz'il q'ol;
maak'a' naru xjuntaq'eetankil wi'.
16Rik'in li xnim uq' naxyeechi'i aayu'am najt roq,
ut rik'in li junchik naxyeechi'i aab'ihomal ut aaloq'al.
17Xtaaqenkil li xnums,
a'an q'axal sahilal;
wi tatb'eeq jo' naxye a'an,
tatwanq sa' tuqtuukilal.
18A'an li che' nak'ehok yu'am reheb' li neke'tawok re:
us xaq reheb' li neke'eechanink re.
19Li Qaawa' kixk'ojob' li ruuchich'och' rik'in xnimal k'a'uxl;
kixkupub' li choxa rik'in li xseeb'al xch'ool.
20Sa' xk'ab'a' li xnawom jachjookeb' li ha',
ut eb' li choql neke'xk'e li xchu'ke.
21At walal ink'ajol, k'uula sa' laach'ool
li chaab'il na'leb' ut k'a'uxl,
ut misachk chawu li wank sa' xyaalal:
22a'anaq yu'am cho'q aawe
ut xsahob' aawu jo' jun lemtz'il q'ol.
23Chi jo'kan tatb'eeq sa' xyaalal
ut ink'a' taatichk'oq laawoq.
24Maak'a' taaxiwa naq tatyoklaaq;
ut naq akaq xatsotlaak, sa tatwarq.#3,24 Sal 3,5; 4,8.
25Ink'a' taaxiwa li rahilal taachalq chi junpaat,
chi moko li xsachikeb' li ink'a' useb' xch'ool,
26xb'aan naq li Qaawa' wanq aawik'in
ut ink'a' tatxk'e chi t'ane'k sa'eb' li ra'al.
27Maaram junaq usilal reheb' li neke'raj tenq'aak,#3,27 Eklo 4,3-4; Mt 5,42.
wi wank chawu xb'aanunkil.
28Maaye re laawas aawiitz'in: “Toj wulaj tatintenq'a”,
naq wan chawu xtenq'ankil anaqwan.
29Matyoob'ank rahilal chirix laawas aawiitz'in
li k'ojk'o xch'ool chawix.
30Matpleetik rik'in anihaq,
wi maajun xb'aanunk rahilal aawe.
31Maakaqaliheb' li neke'yoob'ank raaxiik',
chi moko chatzol aawe li k'aru neke'xb'aanu,
32xb'aan naq li Qaawa' xik' narileb' li ink'a' useb' xna'leb',
ab'an naxraheb' li tiikeb' xch'ool.
33Li xmajewahom li Qaawa'
wank sa' rochoch li naxb'aanu li maa'usilal;
ab'an osob'tesinb'il li xjunkab'al li tiik xch'ool.
34Li Qaawa' naxse'eb' li neke'xnimob'resi rib',
ab'an narusilaheb' li kub'enaqeb' xwankil.#3,34 Stg 4,6; 1 P 5,5.
35Eb' li wankeb' xna'leb' te'reechani li loq'al;
ab'an tz'eqtaananb'ilaqeb' li maak'a'eb' xna'leb'.
Currently Selected:
Pr 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.