Nm 5

Li xchaq'rab'inkileb' laj Israel xb'aan li Qaawa'

1Li Qaawa' kixye re laj Moisés:

2“Taqlaheb' laj Israel chi risinkil sa' xna'aj li xmuheb'aaleb' li poyanam chixjunileb' li saqlep rixeb', eb' li neke'ya'alunk xtz'ejwaleb' ut chixjunil li xmuxumeb' rib' chi ch'e'ok kamenaq. 3Taawisiheb' sa' li na'ajej, a' yaal ma winq malaj ixq; taawisiheb' sa' li na'ajej a'in re naq ink'a' te'xmux li xmuheb'aaleb' b'arwi' wankin sa' xyanqeb'”, chan.

4Ut jo'ka'in ke'xb'aanu eb' laj Israel: ke'risiheb' sa' li na'ajej wan wi' li xmuheb'aaleb'. Eb' laj Israel ke'xb'aanu jo' kiyehe'k re laj Moisés xb'aan li Qaawa'.

5Li Qaawa' kixye re laj Moisés:

6“Ye reheb' laj Israel: Wi junaq winq malaj ixq taamaakob'q chiru li ras riitz'in, taamaakob'q ajwi' chiru li Qaawa': relik chi yaal naq wank xmaak. 7Jo'kan naq tento tixxooto li xmaak xb'aanu; tixtoj rix rik'in tumin ut oob' jachal chik xkomon tixk'e. 8Ut wi li winq maak'a' rech'alal re tixk'ul xtojb'al li maak, chixjunil taak'eemanq re li Qaawa' jo'wi' re laj tij; ut tixk'e ajwi' karneer li tixmayeja laj tij re xtojb'al rix li maak.#5,5-8 Lv 6,1-7.

9“Ut chixjunil li mayej neke'xk'e eb' laj Israel, a'an taakanaaq cho'q re laj tij. 10Li naxmayeja li junjunq, a'an re; a'ut li naq'axtesimank re laj tij, a'anaq re laj tij”, chan.

11Li Qaawa' kixye re laj Moisés:

12“Ye reheb' laj Israel: Mare junaq ixaqilb'ej tixmux li xsumlajik. 13Mare taawanq rik'in junaq winq chi ink'a' naxnaw li xb'eelom, ut li maak taakanaaq sa' muqmu, xb'aan naq maajun x'ilok re, maajun xtawok re. 14Wi li b'eelomej taa'ok chi xsowenankil li rixaqil, a' yaal ma xmux rib' malaj ink'a', 15li winq a'an tixk'am li rixaqil chiru laj tij ut tixmayeja sa' xk'ab'a' li rixaqil li mayej a'in: kaahib'aq liib'r chi k'aj seb'aad. Ink'a' tixk'e aseeyt sa' xb'een li mayej, chi moko tixk'e li k'ajpom, xb'aan naq a'an «xmayejil li sowenak», a'an mayej re xtawb'al xyaalal junaq maak.

16“Laj tij tixk'am li ixq ut toxxaqab' chiru li Qaawa'. 17Chirix chik a'an tixk'e ha' sa' junaq ch'och' sek' ut tixxok b'ayaq li pojtz' sa' li Loq'laj Na'ajej ut tixpoq chiru li ha'. 18Laj tij tixxaqab' li ixq chiru li Qaawa', tixhit li rismal xjolom ut tixk'e sa' ruq' li mayej chirix li sowenak. Li ha' re li rahilal ut li majewank, wanq sa' ruq' laj tij. 19Toja' naq laj tij tixpatz' sa' jurament re li ixq ut tixye re: «Wi ink'a' xwank junaq winq aawik'in, wi ink'a' xatmaakob'k chi moko xamux aawib' chalen naq wankat rik'in laab'eelom, maak'a' taak'ul xb'aan li ha' re li rahilal ut li majewank. 20Ab'an naq ak wankat chaq rub'el xwankil laab'eelom, wi xatmaakob'k ut xamux aawib' rik'in jalan chik winq, 21(laj tij tixye li jurament a'in sa' xb'een li ixq) majewanb'ilaqat xb'aan li Qaawa' sa' xyanqeb' laatenamit; ink'a' chik truuq tatk'iiresinq ut chisipooq laasa'. 22Uk' li ha' a'in re li majewank, re naq taasipooq laasa' ut ink'a' tatk'iiresinq», cha'aq laj tij, ut li ixq tixsume: «Jo'kan taxaq!».

23“Chirix chik a'an, laj tij tixtz'iib'a chiru junaq hu li majewank a'in ut tixsach rik'in li k'ahil ha'. 24Ut tixk'e chi ruk' li ixq li k'ahil ha' re li majewank, ut chi jo'kan li k'ahil ha' re li majewank taa'ok rik'in. 25Toja' naq laj tij tixk'ul li xmayejil li sowenak sa' ruq' li ixq, tixtaqsi chiru li Qaawa' ut toxk'e sa' li artal. 26Laj tij tixxok jun mooch'aq li k'aj xmayejaak, re xjultikankil li maak, tixk'at sa' li artal, ut li xchahel tixk'e chi ruk' li ixq rik'in li ha'.

27“Wi li ixq xmux rib' ut relik chi yaal xb'alaq'i li xb'eelom, naq taaruk' li xha'el li majewank, taasipooq li xsa' ut ink'a' chik taaruk' li xha'el li majewank, taasipooq li xsa' ut ink'a' chik taa'alanq, ut majewanb'ilaq sa' xyanqeb' li xtenamit. 28Ab'an wi li ixq maak'a' xmaak, maak'a' taa'uxq re xb'aan li ha' ut naru taawanq xkok'al.

29“A'an a'in li xmayejil li sowenak, naq junaq ixq namaakob'k ut naxmux li xsumlajik, 30malaj naq junaq winq nasowenak chirix li rixaqil: li winq tixk'am li rixaqil chiru li Qaawa', ut laj tij tixb'aanu chixjunil li mayejak a'in. 31Chi jo'kan li winq taakanaaq chi maak'a' xmaak, ab'an li ixq tixtoj rix li xmaak, wi xmaakob'k”.

Currently Selected:

Nm 5: QQC

Highlight

Copy