Nm 6
6
Li chaq'rab' cho'q reheb' laj nasireo
1Li Qaawa' kixye re laj Moisés:
2“Ye a'in reheb' laj Israel: Wi junaq winq malaj ixq taa'ok cho'q aj nasireo, naraj naxye tixmayeja rib' chi k'anjelak chiru li Qaawa', 3ink'a' taa'uk'aq b'iin ut li ha' nakaltesink. Ink'a' taa'uk'aq vinaagr chi moko k'a' chi ha'il nakaltesink; ink'a' taaruk' xya'al li uub', ut ink'a' tixtzeka li uub' chi moko chi chaqi.#6,3 Lk 1,15. 4Jo' najtil taawanq chi jo'kan, ink'a' taaruk' chixjunil li uk'a' li nak'uub'amank rik'in uub'; ink'a' tixk'ux li rix chi moko li xnaq' li uub'. 5Jo' najtil taawanq cho'q aj nasireo ink'a' tixb'es li rismal xjolom. Toj reetal taatz'aqloq xkutankil li xmayejankil rib' chi k'anjelak chiru li Qaawa', loq' li winq a'an ut tixkanab' chi chamo'k li rismal xjolom. 6Chixjunil li kutan naq taawanq cho'q aj nasireo, sa' xk'ab'a' li Qaawa', ink'a' taajiloq chi xk'atq junaq kamenaq. 7Us ta xkamk li xna' malaj li xyuwa', li ras malaj li riitz'in, li ranab', ink'a' naru tixmux rib' rik'in xch'e'b'aleb', xb'aan naq ak xmayejahom rib' re li xYos. 8Jo' najtil taawanq cho'q aj nasireo, q'axtesinb'ilaq chiru li Qaawa'.
9“Wi taakamq junaq chi nach' rik'in ut chi maak'a' sa' xch'ool, ut chi jo'kan tixmux rismal xjolom laj nasireo, a'in tixjo li rismal naq tixch'ajob'resi rib' sa' xwuq li kutan. 10Ut sa' xwaqxaq li kutan tixk'am re laj tij wiib' mukuy malaj wiib'aq k'ook'ob', sa' rokeb'aal li Loq'laj Na'ajej. 11Laj tij tixmayeja jun re kuyuk maak, ut li jun chik tixk'at re xsachb'al li maak xtaw li winq xb'aan li kamenaq. Chiru li kutan a'an tixq'axtesi wi' chik li rismal xjolom cho'q re li Qaawa': 12tixq'axtesi rib' re li Qaawa' chiru chixjunil li kutan jo' xyeechi'om rib', ut tixmayeja jun chib'aat aj jun chihab' re rak'ob'resinkil wi' chik li xyeechi'om. Ink'a' chik taak'ehe'q sa' ajl eb' li kutan xe'nume'k xb'enwa, xb'aan naq xmuxe'k li rismal xjolom.
13“A'an a'in li chaq'rab' cho'q re laj nasireo: naq taaraqe'q xkutankil li xyeechi'om, li winq a'an taak'ame'q toj sa' rokeb'aal li Loq'laj Na'ajej, 14ut tixq'axtesi li xmayej re li Qaawa': jun karneer aj jun chihab' chi maak'a'aq reek', cho'q k'atb'il mayej; jun li ixqi karneer aj jun chihab' chi maak'a'aq reek', re xtojb'al rix li xmaak; jun karneer chi maak'a'aq reek', re k'amok ib' sa' usilal rik'in li Qaawa'; 15jun ch'ina chakach chi wa maak'a'aq xyu, yiib'anb'ilaq rik'in aseeyt ut li k'uluj yulb'ilaq sa' aseeyt, rochb'een li mayej ut li b'iin. 16Laj tij tixq'axtesi chixjunil a'in re li Qaawa' ut tixyeechi'i li mayej chirix li maak jo'wi' li xk'atb'il mayej laj nasireo. 17Tixq'axtesi re li Qaawa' li karneer re k'amok ib' sa' usilal rik'in li Qaawa', rochb'een li ch'ina chakach chi wa ink'a' yuub'il. Tikto tixmayeja li k'atb'il mayej rochb'een li b'iin. 18Toja' naq laj nasireo tixjo li rismal xjolom sa' rokeb'aal li Loq'laj Na'ajej; tixxok li rismal ut toxk'e sa' li xam yo wi' chi k'atk li mayej re k'amok ib' sa' usilal. 19Laj tij tixxok jun ra' li karneer ak xchaq'ak, jun li wa ink'a' yuub'il ut jun k'uluj, ut tixk'e chixjunil sa' ruq' laj nasireo, naq ak xjo li rismal xjolom. 20Toja' naq laj tij tixtaqsi sa' ruq' chixjunil a'an, chiru li Qaawa'. A'an jun li loq'laj mayej, taakanaaq cho'q re laj tij, rochb'een li re xch'ool li mayej ut li ra' jun chik. Chirix chik a'an laj nasireo truuq taa'uk'aq b'iin.
21“A'an a'in li chaq'rab' cho'q re laj nasireo li xmayeja rib' cho'q re li Qaawa', ut a'an a'in li xyeechi'om tento tixq'axtesi, chi ink'a' k'eeb'il sa' ajl jo'ch'inal jo'nimal li naru xmayejankil. Tento tixb'aanu li xyeechi'i, jo' chanru ak chaq'rab'inb'il xb'aanunkil”.#6,13-21 Hch 21,23-24.
22Li Qaawa' kixye ajwi' re laj Moisés:
23“Ye a'in re laj Aharón ut eb' li ralal: Jo'ka'in naq teerosob'tesiheb' laj Israel. Teeye reheb':
24«A' taxaq li Qaawa' chi'osob'tesinq ut chik'aak'alenq aawe.
25Sahaq taxaq xch'ool li Qaawa' aawik'in
ut chixk'ut chawu li rusilal.
26A' taxaq li Qaawa' chi'iloq aawe sa' xrahom
ut chixk'e aawe li tuqtuukilal».
27Jo'ka'an naq te'xyaab'a link'ab'a' sa' xb'eeneb' laj Israel, ut laa'in twosob'tesiheb'”.#6,23-27 Eklo 50,19-21.
Currently Selected:
Nm 6: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
