Nm 18

Eb' laj Aharón ut eb' laj Leví

1Toja' naq li Qaawa' kixye re laj Aharón:

“Wi junaq tixmux ru li Loq'laj Muheb'aal, li maak a'an taakanaaq sa' aab'een laa'at, sa' xb'eeneb' laawalal, aawochb'eeneb' li xjunkab'al laayuwa'. Ab'an sa' aab'een ut sa' xb'eeneb' laawalal taakanaaq li xmaak junaq aj tij. 2B'oqeb' ajwi' aawik'in eb' laawas aawiitz'in li ralaleb' laj Leví, xteepalil laayuwa'. Xtenq'aaqex ut te'k'anjelaq chawu laa'at ut chiruheb' laawalal, sa' li xloq'laj Muheb'aal li Loq'laj Kaax. 3Te'k'anjelaq chawu ut sa' li Loq'laj Muheb'aal. Ab'an ink'a' te'jiloq chi xch'e'b'al li k'a'aq re ru loq' chi moko te'nach'oq rik'in li artal re naq ink'a' te'kamq a'aneb' chi moko laa'ex. 4A'aneb' te'tenq'anq aawe ut te'k'anjelaq sa' li Loq'laj Muheb'aal, ut maajun li maawa' aj tij taajiloq chek'atq. 5Laa'ex texb'aanunq li k'anjel re li Loq'laj Muheb'aal ut re li artal; chi jo'kan ink'a' chik taajosq'o'q li Qaawa' sa' xb'eeneb' laj Israel. 6Laa'in xinsik' ruheb' laakomon aj Leví sa' xyanqeb' laj Israel. A'aneb' jun maatan li ninq'axtesi eere; ak q'axtesinb'ileb' re li Qaawa' re te'k'anjelaq sa' li Loq'laj Muheb'aal. 7A'ut laa'at ut eb' laawalal laa'exaq laj tij sa' chixjunil li na'uxmank chiru li artal malaj sa' li k'anjel na'uxmank junpak'al li t'ilkem. Xink'e eere wank cho'q aj tij jo' jun eemaatan. Wi junaq li maawa' aj tij taajiloq chi k'anjelak cho'q aj tij, taakamsiiq”, chan li Qaawa'.

Li xk'ulub'eb' laj tij

8Kixye li Qaawa' re laj Aharón:

“Laa'in tink'e chawil li mayej nak'eemank we. Chixjunil li loq'laj mayej nayeechi'imank we xb'aaneb' laj Israel, tink'e aawe ut cho'q reheb' laawalal; a'anaq eereechanihom chi junajwa. 9A'aneb' a'in li loq'laj mayej li ink'a' xe'k'atmank ut tink'e aawe: chixjunil li mayej neke'xk'e we eb' laj Israel, jo' chirix li maak, jo' chirix li k'amok ib' sa' usilal wik'in, a'an jwal loq'; aawehaqeb' laa'at ut cho'q reheb' laawalal. 10Chixjunil li teelom sa' eeyanq naru tixtzeka a'an, ab'an tento tixtzeka sa' jun li loq'laj na'ajej, xb'aan naq jwal loq' li mayej a'an.

11“Tink'e ajwi' aawe li mayej te'xq'axtesi we eb' laj Israel rik'in xtaqsinkil li ruq'; tink'e cho'q aawe, cho'q reheb' laawalal ut eb' laarab'in chi junajwa. Yalaq ani li maak'a' xmuxul sa' laajunkab'al, naru tixtzeka. 12Chixjunil li chaab'il aseeyt, li uub' ut li triiw, li xb'een ruheb' li awimq taayeechi'imanq re li Qaawa', aawehaqeb'. 13Jo'kan ajwi' chixjunil li xb'een ru li awimq li na'elk chiru li ch'och' ut neke'xk'e re li Qaawa', tink'eheb' aawe. Chixjunileb' li ink'a' muxb'ileb' sa' laawochoch naru te'xtzeka. 14Chixjunil li mayej neke'xyeechi'i we eb' laj Israel,#18,14 Lv 27,28. aawehaq.

15“Chixjunil li xb'een ralal eb' laj Israel malaj li xb'een raleb' li ketomq li namayejaak we, tink'eheb' aawe. Ab'an chirixeb' li xb'een ralaleb' li winq ut li xb'een raleb' li xul li ink'a' natzekamank, taapatz' xtojb'aleb' rix. 16Li toj a'in tento te'xk'e naq ak xe'xkooloni jun po xyo'lajikeb'; li xtz'aq a'an oob' chi tumin, jo' chanru xtz'aq li xtumin li Loq'laj Na'ajej. 17Ab'an ink'a' naru xtojb'al rix li xb'een ral li wakax, li karneer malaj li chib'aat, xb'aan naq santob'resinb'il. Taahoy li xkik'el sa' xb'een li artal, ut li xxeeb'ul taak'at cho'q sununkil mayej chiru li Qaawa'. 18Li xtib'el tink'e aawe, jo' ajwi' li re xch'ool ut li xnim uq', li neke'xtaqsi eb' laj Israel sa' ruq'eb' chiwu laa'in. 19Chixjunil li loq'laj mayej te'xyeechi'i we eb' laj Israel, tink'e aawe laa'at, eb' laawalal ut eb' laarab'in. A'an a'in jun chaq'rab' chi junajwa. A'an jun sumwank chi junelik li xink'ojob' rik'in atz'am aawik'in ut rik'ineb' laawalal aak'ajol”, chan li Qaawa'.

Li xk'ulub'eb' laj Leví

20Li Qaawa' kixye ajwi' re laj Aharón: “Ink'a' tattz'aq ch'och' sa' xyanqeb' laj Israel chi moko taaweechani junaq k'a' re ru. Laa'in laaweechanihom ut laa'ereens sa' xyanqeb' laj Israel. 21Cho'q reheb' laj Leví tink'e chi reechaniheb' li xlajeetqil#18,21 Lv 27,30-33; Dt 14,22-29; Mal 3,8-10. li mayej neke'xk'e eb' laj Israel, sa' xk'ab'a' li k'anjel te'xb'aanu sa' li Loq'laj Muheb'aal. 22Eb' laj Israel ink'a' chik te'jiloq chi xk'atq li Loq'laj Na'ajej. Wi te'xb'aanu a'an, te'maakob'q ut te'kamq. 23Ka'ajeb' wi' laj Leví te'xb'aanu li k'anjel sa' li Loq'laj Muheb'aal, ut sa' xb'eeneb' a'an taakanaaq li xmaakeb' laj Israel. A'an chaq'rab' chi junajwa cho'q reheb' li ralal xk'ajol eb' laj Leví li te'wanq moqon: ink'a' te'tz'aq ch'och' sa' xyanqeb' laj Israel, 24xb'aan naq xink'e chi reechaniheb' li xlajeetqil li mayej neke'xyeechi'i eb' laj Israel re li Qaawa'. Jo'kan naq xinye reheb' naq maak'a' te'reechani sa' xyanqeb' laj Israel”, chan li Yos.

Li xlajeetqil li mayej

25Li Qaawa' kixye ajwi' re laj Moisés:

26“Aatinaheb' laj Leví chi jo'ka'in: Naq teek'ul li xlajeetqil li xmayej eb' laj Israel li xink'e chereechani, tento teeq'axtesi re li Qaawa' li xlajeetqil li lajeetq. 27A'anaq leemayej, chanchan li neke'xk'e eb' laj Israel sa' xq'ehil li triiw ut li uub'. 28Jo'ka'in naq teek'e leemayej re li Qaawa', a' li xlajeetqil ru li awimq li nekek'ul laa'ex rik'ineb' laj Israel. Teeq'axtesi re laj Aharón jo' raarookil mayej cho'q re li Qaawa'. 29Chixjunil li maatan teek'ul, teera li taatz'aqonq wi' li Qaawa': a' li xchaab'ilaleb' chixjunil li loq'laj yeechi'om.

30“Ye ajwi' reheb': Naq akaq xera li jwal chaab'il cho'q re li Qaawa', li x'ela'ank a'anaq eere laa'ex jo' li triiw ut li uub'; 31naru teetzeka, a' yaal b'ar nawulak cheru, eerochb'een leejunqkab'al. A'anaq leeq'ajkamunkil xb'aan li k'anjel nekeb'aanu sa' li Loq'laj Muheb'aal. 32Rik'in a'an maak'a' junaq maak sa' eeb'een, xb'aan naq ak xeq'axtesi cho'q re li Qaawa' li jwal chaab'il. Chi jo'kan ink'a' teemux ru li xloq'laj yeechi'omeb' laj Israel, ut ink'a' texkamq”, chan li Qaawa'.

Currently Selected:

Nm 18: QQC

Highlight

Copy