Mk 13

Roso'jik li rochoch li Yos

(Mt 24,1-3; Lk 21,5-7)

1Naq ki'elk li Jesus sa' rochoch li Yos, kiyehe'k re xb'aan jun li xtzolom:

—At Tzolonel, il a ch'inqi'usil pek a'in ut li xchaq'alil ru li kab'l!

2Ut li Jesus kixye re:

—Ma nakawil xninqal eb' a kab'l a'in? Ink'a' taakanaaq pek chi xb'een pek chi ink'a' ta taajuk'manq.

3Chirix a'an, naq ak chunchu sa' xb'een li tzuul Olivos, chi xka'yab'aal li rochoch li Yos, laj Pedro, laj Santiago, laj Jwan ut laj Andrés ke'xpatz' re xjunes:

4—Ye qe jo'q'e taak'ulmanq a'in ut k'aru li eetalil taawanq naq talajk'ulmanq chixjunil a'in.

Xtiklajik li rahilal

(Mt 24,4-14; Lk 21,8-19)

5Ut li Jesus kixtikib' xyeeb'al reheb': “Chek'ehaq reetal re naq maa'ani chib'alaq'inq eere. 6Naab'aleb' te'chalq ut te'roksi link'ab'a': «Laa'inin», cha'qeb'; ut naab'aleb' te'b'alaq'iiq.

7“Naq teerab'ihatq naq yooq li kamsij ib' malaj ut yal resil li yalok, mexxiwak: tento taak'ulmanq a'in; ab'an toj maji'aq li roso'jik. 8Xb'aan naq te'waklije'q chi xkamsinkil rib'eb' tenamit rik'in jalan chik tenamit, li awab'ej rik'in jalan chik awab'ej; talaje'wanq hiik sa' naab'al chi na'ajej ut taawanje'q we'ej: a'inaq xtiklajik li nimla rahilal.

9“A'ut laa'ex cherilaq eerib'. Texq'axtesiiq sa' ruq'eb' li xninqaleb' ru aj raqol aatin jo'wi' sa' ruq'eb' laj jolominel reheb' li ch'utleb'aal kab'l; texsak'e'q ut texxaqab'aaq chiruheb' li ninqeb' xwankil ut eb' li awab'ej sa' ink'ab'a', re xch'olob'ankil li yaal chiruheb'. 10Ut tento xb'enwa taapuktesimanq li Chaab'il Esilal sa'atqeb' chixjunil li tenamit. 11Naq texk'ame'q chi q'axtesiik, mixik eech'ool chi xk'oxlankil chi rub'elaj k'aru toxeeye, cheyehaq b'an li taak'ehe'q eere sa' li honal a'an: xb'aan naq moko laa'ex ta tex'aatinaq, a' b'an li Santil Musiq'ej. 12Li asb'ej tixq'axtesi chi kamsiik li riitz'in; li yuwa'b'ej a' li ralal; eb' li alalb'ej te'waklije'q chi xkamsinkil xna' xyuwa'eb'. 13Ut chixjunileb' xik' te'iloq eere sa' ink'ab'a'; ab'an li tixk'e xch'ool toj sa' roso'jik, a'an taakole'q.

Li xnimal xrahilal Jerusalén

(Mt 24,15-25; Lk 21,20-24)

14“Naq teeril li xnimal tz'i'b'eetalil#13,14 Dn 9,27; 11,31; 12,11. yooq xb'aanunkil b'arwi' ink'a' raj xk'ulub' (ani na'ilok ru hu chixtawaq xyaalal), toja' naq eb' li wanqeb' Judea eleliqeb' ut che'xikaq toj chiru tzuul. 15Li wanq chaq sa' xb'een li kab'l mikub'eek chi moko chi'ok sa' rochoch chi xxokb'al junaq k'a'aq re ru; 16ut li wanq chaq sa' xk'al misutq'iik chi xxokb'al li xt'ikr. 17Ra chaalel sa' xb'eeneb' li yaj aj ixq ut li yooqeb' chi tu'resink sa'eb' li kutan a'an. 18Chextijoq re naq mik'ulmank a'in sa' hab'alq'e. 19Xb'aan naq k'ajo'aq xnimal li xrahilaleb' li kutan a'an: maajun wa wanjenaq jo' a'an, chalen chaq sa' xtiklajik li ruuchich'och' li kiyiib'aak xb'aan li Yos, toj anaqwan; chi moko taak'ulmanq chik.#13,19 Dn 12,1; Jl 2,1-2; Ap 7,14. 20Ut wi li Qaawa' ink'a' ta tixk'os li xk'ihaleb' li kutan a'an, maajun raj taakole'q; ab'an, sa' xk'ab'a' li sik'b'ileb' ru xb'aan, kixk'os li xk'ihaleb' li kutan a'an.

21“Jo'kan wi junaq taayehoq eere: «Ilomaq, we' li Kriist» malaj: «Le' wank», meepaab'. 22Xb'aan naq naab'aleb' aj b'alaq' te'wakliiq ut te'xye naq a'aneb' li Kriist ut a'aneb' propeet; te'xb'aanuhatq eetalil ut sachb'ach'oolej re xb'alaq'inkil li sik'b'ileb' ru, wi raj taaruuq. 23A'ut laa'ex yo'oon wanqex; ak junxilaj xinye resil eere chixjunil.

Li xnimal xk'ulunik li K'ajolb'ej

(Mt 24,29-31; Lk 21,25-27)

24“Ab'an sa'eb' li kutan a'an, naq akaq xk'ulmank li nimla rahilal a'an, li saq'e taaq'oqyino'q ru, li po ink'a' chik taasaqeno'q ru; 25eb' li chahim sa' choxa te't'anje'q chaq ut li xwankilal li choxa taachiq'chiq'iiq sa' xna'aj. 26Toja' naq te'ril li K'ajolb'ej yooq chaq chi k'ulunk sa' choql rik'in xnimal xwankil ut xloq'al. 27Ut tixtaqlaheb' li x'ánjel sa' xkaaxukuutil li ruuchich'och' re xch'utub'ankil li sik'b'ileb' ru xb'aan, chalen chaq sa' xmaril li ruuchich'och' toj sa' xmaril li choxa.

Li jaljookil ru aatin chirix li xche'el li iig

(Mt 24,32-36; Lk 21,29-33)

28“Rik'in li xche'el li iig chetzolaq li jaljookil ru aatin a'in. Naq ak naq'unq'utk li ruq' ut yo chi yo'laak li xxaq, aran nekenaw naq xnach'ok chaq li saq'ehil. 29Jo'kan ajwi' laa'ex, naq teeril naq talajk'ulmanq a'in, chenawaq naq ak nach' wan chaq li K'ajolb'ej; ak wank chire li kab'l. 30Relik chi yaal ninye eere naq ink'a' taanume'q li tenamit a'in chi toj maji'aq talajk'ulmanq chixjunil a'an. 31Li choxa ut li ruuchich'och' te'oso'q, a'ut li waatin ink'a' taanume'q.

32“A'ut chirix li kutan a'an malaj li xhonalil, maa'ani nanawok jo'q'e, chi moko eb' li ánjel sa' choxa, chi moko li K'ajolb'ej, ka'ajwi' li Yuwa'b'ej.

Yo'oon wanqex

(Mt 24,42; 25,13-15; Lk 19,12-13; 12,38, 40)

33“Yo'oon wanqex, chexyo'leq xb'aan naq ink'a' nekenaw jo'q'e li xq'ehil. 34Jo' jun li winq koho chi najt: kixkanab' li rochoch, kixk'eheb' xwankileb' li xmoos, ak re re li xk'anjel li junjunq, ut kixchaq'rab'i laj ilol okeb'aal naq chiyo'leq. 35Chexyo'leq b'i', xb'aan naq ink'a' nekenaw jo'q'e taak'ulunq laj eechal kab'l, ma ewu ta, malaj tuqtuuq q'oqyink, malaj sa' xb'een xyaab' li tzo' kaxlan, malaj ut naq yooq chi hik'e'k. 36Mare anchal tol'elq chi junpaat ut tolexxtaw chi wark. 37Li ninye eere, ninye ajwi' reheb' chixjunil: Chexyo'leq!”.

Currently Selected:

Mk 13: QQC

Highlight

Copy