Mk 12

Li jaljookil ru aatin chirixeb' laj k'anjel aj kamsineleb'

(Mt 21,33-46; Lk 20,9-19)

1Li Jesus ki'ok chi raatinankileb' sa' jaljookil ru aatin. Kixye reheb' chi jo'ka'in: “Jun li winq kiraw jun siir x'uub', kixsut chi koral, kixb'ek jun xyatz'leb'aal uub' ut kixyiib' jun li kab'l cho'q re laj k'aak'alenel; kixk'e chi to' reheb' aj k'alom ut koho chi najt. 2Naq kixtaw xq'ehil, kixtaqla jun li xmoos rik'ineb' laj k'alom, re naq tixk'ul ru li rawimq li tento taatz'aq. 3A'ut eb' a'an ke'xchap li moosej, ke'xteni ut ke'xsutq'isi chi maak'a' ke'xk'e re. 4Kixtaqla wi' chik jun xmoos rik'ineb'; ab'an ke'xtiq'i sa' xjolom ut ke'xtz'eqtaana. 5Kixtaqla jun chik, ut a'an ke'xkamsi. Toj naab'aleb' chik ke'taqlaak: wan ke'xteni, wan ke'xkamsi.

6“Toj wank jun chik, a' li ralal raaro xb'aan. Sa' roso'jik kixtaqla a'an rik'ineb': «Li walal te'roxloq'i», chan sa' xch'ool. 7Ab'an eb' aj k'alom a'an ke'xye chirib'ileb' rib': «A'an a'in li taa'eechaninq re li ch'och'. Kimqex, qakamsiiq, ut laa'o chik too'eechaninq re», chankeb'. 8Ke'xchap, ke'xkamsi ut ke'xkut junpak'al li ch'och'.

9“K'aru nekeye laa'ex? K'aru tixb'aanu laj eechal re li awimq? Taak'ulunq, tixsacheb' laj k'alom ut tixk'e li xch'och' reheb' jalan chik.

10“Ma ink'a' eerilom sa' li Santil Hu li jun raqal a'in:

«Li pek li ke'xtz'eqtaana eb' laj kab'lanel,

a'an li kikanaak cho'q xnimal ru pek sa' li kab'l.

11A' li Qaawa' kib'aanunk re a'in,

ut a'an sachb'ach'oolej chiqu»#12,10-11 Sal 118,22-23.?”.

12Eb' a'an ke'ok chi xsik'b'al chan raj ru naq te'xchap, xb'aan naq ke'xtaw ru naq cho'q reheb' kixye li jaljookil ru aatin; ab'an ke'xxiwa ruheb' li tenamit. Jo'kan naq ke'xkanab' ut koheb'.

Li toj re li awab'ej

(Mt 22,15-22; Lk 20,20-26)

13Wankeb' aj Pariseey ut eb' li neke'okenk chirix laj Herodes ke'taqlaak rik'in li Jesus re xchapb'al sa' aatin. 14Ke'chalk ut ke'xye re:

—At Tzolonel, naqanaw naq tz'aqal yaal nakat-aatinak ut maak'a' nakawaj wi' anihaq, xb'aan naq moko sik'so ta ru li nakawaatina, nakak'ut b'an li xb'e li Yos sa' xyaalal. Ma us xk'eeb'al li toj re li awab'ej, malaj ut ink'a'? Ma tqak'e, malaj ut ink'a'?

15Ab'anan li Jesus naxnaw naq aj ka'pak'al uheb', jo'kan naq kixye reheb':

—K'a'ut naq nekeyal wix? K'amomaq chaq junaq tumin re naq twil.

16Ke'xk'am chaq li tumin ut li Jesus kixpatz' reheb':

—Ani aj jalam u a'in ut ani aj tz'iib'ahom wank chiru?

Ke'xye re:

—Re li awab'ej.

17Toja' naq li Jesus kixye reheb':

—Q'ajsihomaq re li awab'ej li k'aru re li awab'ej, ut re li Yos li k'aru re li Yos.

Ut ke'sachk xch'ool xb'aan.

Chirix li xwaklijikeb' chi yo'yo li kamenaq

(Mt 22,23-33; Lk 20,27-40)

18Wankeb' aj Saduseey ke'wulak rik'in li Jesus (eb' a'an neke'xye naq ink'a' te'wakliiq chi yo'yo eb' li kamenaq), ut ke'xpatz' re:

19—At Tzolonel, laj Moisés kixtz'iib'a qachaq'rab'inkil: «Wi junaq asb'ej taakamq ut tixkanab' li rixaqil chi maajunaq xkok'al, chik'ame'q wi' chik li ixq xb'aan li riitz'in re naq chiwanq ralal xk'ajol li asb'ej».#12,19 Dt 25,5-10; Gn 38,8. 20Ke'wank wuqub' chi winq riitz'ineb' rib'. Li xb'een kik'amok ut kikamk chi ink'a' kixkanab' ralal xk'ajol: 21jo'kan naq li xkab' kixk'am li ixq. Kikamk ajwi' a'an chi maak'a' ralal xk'ajol. Jo'kan ajwi' li rox. 22Maajun reheb' li wuqub' kixkanab' ralal xk'ajol. Sa' roso'jik kikamk ajwi' li ixq. 23Sa' xwaklijikeb' chi yo'yo eb' li kamenaq, naq te'wakliiq eb' a'an, anihaq tz'aqal aj ixaqil li ixq a'an? Xb'aan naq chi xwuqichaleb' ke'ixaqilink re.

24Kichaq'ok li Jesus ut kixye reheb':

—Ma ink'a' tab'i' xmaak a'in naq nekexsachk, xb'aan naq ink'a' neketaw ru li Santil Hu chi moko neketaw ru li xwankil li Yos? 25Naq te'wakliiq chi yo'yo sa' xyanqeb' li kamenaq, ink'a' te'k'amoq li winq chi moko te'k'ame'q li ixq, jo'aqeb' b'an chik li ánjel sa' choxa. 26Ut chirix li xwaklijikeb' chi yo'yo li kamenaq, ma ink'a' eerilom sa' li xhu laj Moisés li b'arwan xk'ulmank sa' li k'ix,#12,26 Ex 3,2-6. chanru naq li Yos kixye re: «Laa'in li xYos laj Abrahán, li xYos laj Isahak ut li xYos laj Jakob»? 27Maawa' xYos li kamenaqeb', xYos b'an li yo'yookeb'. Ut laa'ex k'ajo' naq sachenaqex.

Li xnimal ru chaq'rab'

(Mt 22,34-40; Lk 10,25-28)

28Jun reheb' laj tz'iib' kijilok chi xk'atq li Jesus xb'aan naq kirab'iheb' naq yookeb' chi wech'ink chirib'ileb' rib' ut naxnaw naq li Jesus kixsumeheb' chi us. Ut kixpatz' re:

—B'ar wank tz'aqal li xb'een reheb' chixjunil li chaq'rab'?

29Kichaq'ok li Jesus ut kixye:

—Li xb'een a'an a'in: «Ab'i, Israel: li Qaawa' li qaYos a'an li jun chi Qaawa'. 30Taara li Qaawa' laaYos chi anchal aach'ool, chi anchal aawaanm, chi anchal aak'a'uxl ut chi anchal aametz'ew».#12,30 Dt 6,4-5. 31Li xkab' a'an a'in: «Taara laawas aawiitz'in jo' naq nakara aawib' laa'at».#12,31 Lv 19,18. Maak'a' chik junaq chaq'rab' q'axal nim xwankil chiruheb' a'in.

32Ut laj tz'iib' kixye re:

—Us, at Tzolonel. Yaal xaye naq li Qaawa' jun ajwi' chirib'il ut maak'a' chik junaq chirix A'an, 33ut xraab'al A'an chi anchal qach'ool, chi anchal qak'a'uxl ut chi anchal qametz'ew, jo' ajwi' xraab'aleb' li qas qiitz'in jo' naq naqara qib' a'an q'axal nim xwankil chiru chixjunileb' li k'atb'il xul ut li k'a'aq chik ru chi mayejil.

34Naq li Jesus kiril naq kisumeek chi chaab'il, kixye re:

—Ink'a' najt wankat rik'in li xnimajwal awab'ejihom li Yos.

Ut maa'ani chik nakawuuk xch'ool chi patz'ok re.

Li Kriist a'an ralal ut xQaawa' laj David

(Mt 22,41-46; Lk 20,41-44)

35Naq yo chi xtzolb'aleb' li tenamit sa' rochoch li Yos, li Jesus kixpatz' reheb':

—Chanru naq eb' laj tz'iib' neke'xye naq li Kriist#12,35 Chirix li xyaalalil li aatin Kriist: cf. Mt 1,17. a'an ralal laj David? 36A' ajwi' laj David, chi eek'asinb'il xb'aan li Santil Musiq'ej, kixye chi jo'ka'in:

«Kixye li Qaawa' re linQaawa':

K'ojlan sa' linnim uq'

toj reetal tink'e rub'el laawoq

eb' li xik' neke'ilok aawe».#12,36 Sal 110,1.

37A' ajwi' laj David naxye Qaawa' re. Chan put ru naq ralalaq?

Ut li k'iila tenamit neke'rab'i chi anchaleb' xch'ool.

Li Jesus ut eb' laj tz'iib'

(Mt 23,6-7; Lk 20,45-47)

38Naxyehatq sa' xtzolb'aleb': “Chekolaq eerib' chiruheb' laj tz'iib': neke'raj b'eek chi ninq xb'aseb' li raq', neke'raj naq te'k'ehe'q xsahilaleb' xch'ool sa'eb' li k'ayiil; 39neke'wulak chiruheb' wank sa' li xb'een na'ajej sa'eb' li ch'utleb'aal kab'l ut wank chi xjolomil li meex naq neke'wa'ak; 40neke'xchoy xsa' xjunkab'aleb' li xmalka'an, ut najt roq li tijok neke'xb'aanu yal re xk'utb'aleb' rib'. Eb' a'an q'axal ra taaraqmanq wi' aatin sa' xb'eeneb'”.

Li xmayej li xmalka'an

(Lk 21,1-4)

41Kik'ojlaak li Jesus chiru li xkaaxil li mayej, yo chi xk'eeb'al reetal chanru naq li tenamit neke'k'ehok tumin sa' li kaax: ut naab'aleb' li b'ihom naab'al li tumin yookeb' chi xk'eeb'al. 42Kichalk ajwi' jun li xmalka'an neb'a', ut kixk'e wiib' chi kok' tumin. 43Toja' naq li Jesus kixb'oqeb' li xtzolom ut kixye reheb':

—Relik chi yaal ninye eere naq li xmalka'an a'in neb'a' naab'al xk'e chiru chixjunileb' li xe'k'ehok tumin sa' li kaax. 44Xb'aan naq chixjunileb' xe'xk'e li na'ela'ank chiruheb'; ut a'in sa' li xneb'a'il xk'e jo'ch'inal jo'nimal li wank chiru, xk'e chixjunil li taak'anjelaq raj re xloq'b'al xwa ruk'a'.

Currently Selected:

Mk 12: QQC

Highlight

Copy