Mk 11

IV. LI XK'ANJEL LI JESUS ARAN JERUSALÉN (11,1—13,37)

Rokik li Jesus Jerusalén

(Mt 21,1-11; Lk 19,28-40; Jn 12,12-19)

1Naq yookeb' chi nach'ok Jerusalén, nach' chik rik'in Betfagé ut Betania, chiru li tzuul Olivos, li Jesus kixtaqla wiib'eb' li xtzolom 2ut kixye reheb':

—Ayuqex sa' li k'aleb'aal wank cheru ut, naq toxex'okaq aran, chi junpaat teetaw jun li ch'ina b'uur b'ak'b'o, toj maajun winq b'ehenaq chirix. Hitomaq ut k'amomaq chaq. 3Ut wi ani taapatz'oq eere: «K'a'ut naq nekeb'aanu a'in?», cheyehaq: «Li Qaawa' taa'ajoq re, ab'anan hoon ajwi' tolxkanab'».

4Koheb' ut koxe'xtaw jun ch'ina b'uur b'ak'b'o chi xk'atq jun li okeb'aal, sa' b'e; ut ke'xhit chaq.

5Wan wankeb' aran ke'xye reheb':

—K'a' naq yookex chi xhitb'al li ch'ina b'uur?

6Eb' a'an ke'xsume jo' kiyehe'k reheb' xb'aan li Jesus, ut ke'kanab'aak. 7Ke'xk'am li ch'ina b'uur rik'in li Jesus, ke'xk'e li raq'eb' chirix, ut li Jesus kik'ojlaak sa' xb'een. 8Ut naab'aleb' ke'xhel li raq'eb' sa' li b'e; wankeb' chik ke'xk'e xaqche' ke'xsik'atq chaq sa' li pim. 9Li yookeb' chi xik chi uub'ej ut eb' li wankeb' chi ixb'ej japjookeb' re chi xyeeb'al:

—Chinimaaq xloq'al li Yos! Usilaatinanb'il li xchalk sa' xk'ab'a' li Qaawa'!#11,9 Sal 118,25-26. 10Osob'tesinb'il li xnimal x'awab'ejihom li qayuwa' laj David, li yo chi chalk! Chinimaaq xloq'al li Qaawa' taqe'q!

11Li Jesus ki'ok Jerusalén, sa' rochoch li Yos, kilajxsuti rilb'al chixjunil ut koho Betania rochb'eeneb' li Kab'laju, xb'aan naq ak x'ewuuk.

Li Jesus kixmajewa jun toon chi iig

(Mt 21,18-19)

12Sa' li kutan jun chik, naq ke'elk Betania, kichalk xtz'okajik li Jesus. 13Kiril chi najt jun toon chi iig wank xxaq, ut koho chi rilb'al ma tixtaw tana junaq li ru. Kiwulak chi xk'atq, ab'anan maak'a' kixtaw, ka'ajwi' li xxaq, xb'aan naq moko xq'ehil ta chi uuchink. 14Toja' naq kixye re:

—Maa'ani ta chik taatzekanq chi junajwa li taawuuchin!

Ut eb' li xtzolom yookeb' chi rab'inkil.

Li Jesus kirisiheb' laj k'ay sa' rochoch li Yos

(Mt 21,12-17; Lk 19,45-48; Jn 2,14-16)

15Ke'wulak Jerusalén ut, naq ki'ok li Jesus sa' rochoch li Yos, kixtikib' risinkil li yookeb' chi k'ayink ut chi loq'ok chisa'. Kixpak'lusihatq li xmeexeb' laj jalol ru tumin ut li xna'ajeb' laj k'ay mukuy; 16ut maajun junaq naxkanab' chi xk'amb'al k'a'aq re ru sa' rochoch li Yos. 17Naxtzoleb' ut naxye reheb':

—Ma ink'a' tab'i' tz'iib'anb'il sa' li Santil Hu naq li wochoch tixk'ab'a'in rochochil li tijok cho'q re chixjunileb' li tenamit? Ut laa'ex xek'e cho'q xna'ajeb' laj elq'!#11,17 Is 56,7; Jr 7,11.

18Naq ke'rab'i a'in eb' li xb'eenil aj tij jo'wi' eb' laj tz'iib', ke'ok chi xsik'b'al chanru naq te'xkamsi, xb'aan naq neke'xxiwa ru: a' neke'ril naq chixjunil li tenamit sachsookeb' xch'ool xb'aan li naxtzoleb' wi'. 19Ab'an naq ki'ewuuk, ki'elk li Jesus sa' li tenamit.

Kichaqik jun toon chi iig

(Mt 21,20-22)

20Naq ke'nume'k toj eq'la, ke'ril li xche'el li iig ak chaqi chik toj sa' li xxe'. 21Toja' naq laj Pedro kijultiko'k re ut kixye re:

—At Tzolonel, il! Li jun toon chi iig li xamajewa, chaqi chik.

22Kichaq'ok li Jesus ut kixye reheb':

—Chepaab' li Yos. 23Relik chi yaal ninye eere: wi wank junaq taayehoq re li tzuul a'in: «Elen ut kut aawib' sa' palaw», chi ink'a' taawiib'anq xch'ool, tixpaab' b'an naq taa'uxq li yo xyeeb'al, taak'eemanq re. 24Jo'kan utan ninye eere: chixjunil li teetz'aama sa' li tijok, chepaab' naq ak xek'ul, ut taak'eemanq eere. 25Ut naq xaqxooqex chi tijok, wi wank eech'a'ajkilal chiru anihaq, chekuy xmaak, re naq leechoxahil Yuwa' tixkuy tixsach ajwi' eemaak laa'ex.#11,25 Li raqal 26: Wi ut ink'a' nekekuy xmaak, chi moko leechoxahil Yuwa' tixkuy eemaak, moko tz'aqal xcha'al ta li Evangelio, a'an b'an yal xtiqb'al aj chik li raqal 25 (cf. Mt 6,15).

Kiwech'iik rix xwankil li Jesus

(Mt 21,23-27; Lk 20,1-8)

27Ke'wulak wi' chik Jerusalén. Ut naq yo chi b'eek li Jesus sa' rochoch li Yos, li xb'eenileb' aj tij, eb' laj tz'iib' ut eb' li cheekel winq ke'wulak rik'in 28ut ke'xye re:

—K'aru aawankil naq nakab'aanu a'in? Ani xk'ehok aawankil chi xb'aanunkil a'in?

29Li Jesus kixye reheb':

—Inpatz'aq ajwi' eere laa'in. Chineesumehaq ut tinye eere k'aru linwankil naq ninb'aanu a'in. 30Li xkub'iha' laj Jwan, ma re li choxa malaj reheb' li winq? Sumehomaqin.

31Eb' a'an ke'ok chi xk'oxlankil sa' xch'ooleb': “Wi tqaye naq re li choxa, tixye: «K'a' put naq ink'a' xepaab'?». 32Ab'an, ma tqaye naq yal reheb' li winq?”. Neke'xxiwa ruheb' li tenamit, xb'aan naq laj Jwan a'an tz'aqal propeet chiruheb' chixjunil. 33Jo'kan naq ke'xsume li Jesus: “Ink'a' naqanaw”, chankeb' re.

Toja' naq li Jesus kixye reheb':

—Jo'kan ajwi' laa'in ink'a' ninye eere k'aru linwankil naq ninb'aanu a'in.

Currently Selected:

Mk 11: QQC

Highlight

Copy