Lk 3
3
II. LI JESUS KIXKAWRESI RIB' CHI K'ANJELAK (3,1—4,13)
Li kixye laj Jwan aj kub'sihomha'
(Mt 3,1-12; Mk 1,1-18; Jn 1,19-28)
1Ak o'laju chihab' rokik chi awab'ejil laj Tiberio César ut laj Poncio Pilato wan chaq cho'q ruuchil li awab'ej aran Judea. Laj Herodes nataqlank sa' xb'een Galilea, laj Felipe li riitz'in sa' xb'een Iturea ut Trakonítida, ut laj Lisanias sa' xb'een Abilene. 2Laj Anás ut laj Kaifás wankeb' chaq cho'q xyuwa'il aj tij. Sa'eb' li kutan a'an kichalk li Raatin li Yos rik'in laj Jwan, ralal laj Sakarías, naq wan chaq sa' li chaqich'och'. 3Ut a'an kixb'eeni chixjunil li na'ajej wank chire li nima' Jordán, yo chi xyeeb'al reheb' li tenamit naq tento te'xyot' xch'ool te'xjal xk'a'uxl ut te'kub'siiq xha' re naq li Yos tixkuy tixsach li xmaakeb'. 4Li propeet Isaías ki'aatinak chirix laj Jwan naq kixye chi jo'ka'in:
“Xyaab' xkux li japjo re sa' li chaqich'och':
«Tuqub'omaq li xb'e li Qaawa',
tiikob'resihomaq li ruq' b'e chiru.
5Chixjunil li julux taab'ut'manq,
chixjunileb' li tzuul ut eb' li b'ool te'kub'simanq xteram;
li yokos ru taatiikob'resimanq
ut li b'uk'ux ru taatuqub'amanq ru cho'q taq'a.
6Ut chixjunileb' te'ril li kolb'a ib' naxk'e li Yos»”.#3,4-6 Is 40,3-5.
7Naab'aleb' li tenamit neke'wulak rik'in laj Jwan chi kub'siik xha' ut a'an naxye reheb': “Ex ral q'anb'olay, ani xk'utuk cheru elelik chiru li josq'il chaalel sa' eeb'een? 8Chik'utunq b'i' sa' leeyu'am li naruuchin li yot'b'ach'oolej jalb'ak'a'uxl, ut mex'ok chi xyeeb'al sa' leech'ool: «A' laj Abrahán a'an qayuwa'». Xb'aan naq ninye eere naq li Yos taaruhanq chi risinkil sa'eb' li pek a'in ralal xk'ajol laj Abrahán. 9Ak wank li maal sa' xtoonaleb' li che'; ut chixjunil li che' ink'a' chaab'il li ru naxk'e, taayok'manq ut taakutmanq sa' xam”.
10Toja' naq eb' li tenamit ke'xpatz' re:
—K'a' put ru tento taaqab'aanu?
11Kichaq'ok ut kixye reheb':
—Ani wanq wiib' li raq' chixk'e junaq re li maak'a' raq'; ani wanq xtzekemq, jo'kanaq ajwi' chixb'aanu.
12Wankeb' ajwi' aj titz'ol toj ke'wulak rik'in chi kub'siik xha':
—At aj Tzolonel, k'aru tento taaqab'aanu?
13Ut a'an kixye reheb':
—Meepatz' xb'een li taqlanb'ilex wi'.
14Wankeb' ajwi' aj puub' ke'xpatz' re:
—Ut laa'o, k'aru tento taaqab'aanu?
Kichaq'ok a'an ut kixye reheb':
—Maak'a' teemaq' re anihaq, mexjitok rik'in b'alaq'il aatin ut k'ojk'ooq leech'ool rik'in leetojb'al.
15Li tenamit yo'oon wankeb' ut chixjunileb' yookeb' chi xk'oxlankil sa' xch'ooleb' ma maawa' ta laj Jwan li Kriist. 16Kichaq'ok ut laj Jwan ut kixye reheb': “Laa'in ninkub'si eeha' yal rik'in ha', ab'an chalk re li q'axal nim xwankil chiwu laa'in, li moko ink'ulub' ta xhitb'al xk'aamal li xxaab'. A'an tixkub'si eeha' rik'in Santil Musiq'ej ut xam.#3,16 Cf. Mt 3,11. 17Ak wan chaq xk'anjelob'aal sa' li ruq' re xyamtesinkil li xch'oxleb'aal: tixk'uula li xtriiw sa' li xk'uuleb'aal, ab'an li xk'imal tixk'at sa' xam li maajoq'e taachupq”.
18Jo'ka'in naq laj Jwan yo chi xch'olob'ankil xna'leb'eb'; ut rik'in naab'al chik chi aatin naxye li Chaab'il Esilal reheb' li tenamit. 19Laj Herodes, li nataqlank sa' xb'een Galilea, kaw naq'use'k xb'aan laj Jwan xmaak li xHerodías, rixaqil li riitz'in, jo' ajwi' xmaak chixjunil li maa'usilal kilajxb'aanu. 20Ab'an sa' roso'jik jun chik kixb'aanu naq kixtz'ap laj Jwan sa' tz'alam.
Xkub'ik xha' li Jesus
(Mt 3,13-17; Mk 1,9-11)
21Naq chixjunil li tenamit yookeb' chi kub'siik xha', kikub'eek ajwi' xha' li Jesus. Ut naq yo chi tijok aran, kitehonk li choxa: 22li Santil Musiq'ej kikub'e chaq sa' xb'een kama' na'ilok junaq mukuy ut kichalk chaq jun xyaab' kuxej sa' choxa, kixye: “Laa'at li walal; aawik'in nasaho'k inch'ool”.#3,22 Sal 2,7.
Eb' li xxe'toonil yuwa' li Jesus
(Mt 1,1-17)
23Ak wank lajeeb' xka'k'aal chihab' re li Jesus naq kixtikib' li xk'anjel. Sa' xch'ooleb' li tenamit#3,23 Li aatin sa' xch'ooleb' li tenamit naxch'olob' naq li Jesus a'an ralal laj José naq neke'xk'oxla eb' li tenamit, ab'an moko a'an ta. Ch'olch'o naq li Jesus a'an Ralal li Yos xb'aan naq siyajenaq xb'aan li Santil Musiq'ej (cf. Mt 1,20). naq a'an ralal laj José. Laj José a'an ralal laj Elí, 24ralal laj Matat, ralal laj Leví, ralal laj Melkí, ralal laj Janay, ralal laj José, 25ralal laj Matatías, ralal laj Amós, ralal laj Nahúm, ralal laj Eslí, ralal laj Nangay, 26ralal laj Mahat, ralal laj Matatías, ralal laj Semehín, ralal laj Josek, ralal laj Jodá, 27ralal laj Johanán, ralal laj Resá, ralal laj Sorobabel, ralal laj Salatiel, ralal laj Nerí, 28ralal laj Melkí, ralal laj Adí, ralal laj Kosam, ralal laj Elmadam, ralal laj Er, 29ralal laj Jesus, ralal laj Elieser, ralal laj Jorim, ralal laj Matat, ralal laj Leví, 30ralal laj Simehón, ralal laj Judá, ralal laj José, ralal laj Jonam, ralal laj Eliakín, 31ralal laj Meleá, ralal laj Mená, ralal laj Matatá, ralal laj Natán, ralal laj David, 32ralal laj Jesé, ralal laj Obed, ralal laj Bohos, ralal laj Sala, ralal laj Najsón, 33ralal laj Aminadab, ralal laj Admin, ralal laj Arní, ralal laj Esrom, ralal laj Fares, ralal laj Judá, 34ralal laj Jakob, ralal laj Isahak, ralal laj Abrahán, ralal laj Tara, ralal laj Najor, 35ralal laj Seruj, ralal laj Rakaw, ralal laj Pélej, ralal laj Eber, ralal laj Sala, 36ralal laj Kenán, ralal laj Arfaksad, ralal laj Sem, ralal laj Noé, ralal laj Lámek, 37ralal laj Matusalén, ralal laj Enok, ralal laj Járet, ralal laj Malelehel, ralal laj Kenán, 38ralal laj Enós, ralal laj Set, ralal laj Adán, ralal li Yos.
Currently Selected:
Lk 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.