Job 3
3
Laj Job kixmajewa xkutankil li xyo'lajik
1Chirix chixjunil a'in laj Job kixtikib' aatinak ut kixmajewa xkutankil li xyo'lajik;#3,1-19 Jr 20,14-18; Eklo 23,14. 2kixye:
3Majewanb'il taxaq xkutankil linyo'lajik
ut li q'oqyink naq kiyeemank: “A'an jun ch'ina teelom!”.
4Chisache'q li kutan a'an xb'aan li Yos!
Chisutq'iiq chi aak'ab'il
ut milemtz'unk chaq li saqenk sa' xb'een.
5Li aak'ab' ut li mu chisutunq re,
li choql chimuheelanq re
ut chixib'esiiq xb'aan xmuhenkil rib'eb' li saq'e ut li po.
6Chi'eechaniiq xb'aan li q'oqyink,
ut ink'a' chik'eemanq sa' ajl sa' xyanq xkutankileb' li chihab' ut li po.
7Maajun taxaq chik chiyo'laaq chiru li q'oqyink a'an
chi moko chi'ab'iiq aran xyaab' li sahil ch'oolej!
8Chimajewaaq xb'aaneb' laj tuul,
li wankeb' xwankil sa' xb'een Lebiatán.#3,8 Sa' xch'ooleb' laj Israel naq sa' xchamal li palaw wank jun mama' xul, Lebiatán xk'ab'a'. Cf. Job 41,1; Sal 74,14; 104,26; Is 27,1.
9Aak'ab'aq taxaq li kutan a'an
ut milemtz'unk li kaq chahim;
ink'a' taxaq chi'ilmanq li hik'e'k sa' li kutan a'an,
10xb'aan naq kinxkanab' chi yo'laak
ut ink'a' kixmuq chiwu chixjunil li rahilal chaalel.
11K'a'ut naq ink'a' kinkamk naq kin'elk rik'in linna',
sa' xkutankil linyo'lajik?
12Chi jo'kan linna' ink'a' raj kinxq'alu,
chi moko kixk'e lintu',
13ut anaqwan sa raj yookin chi hilank,
warenaqin raj sa' tuqtuukilal,
14wochb'eeneb' li awab'ej ut li xninqaleb' ru sa' ruuchich'och'
li neke'xyiib' xninqi muqleb'aal kamenaq,
15malaj wochb'eeneb' laj jolominel
li neke'xnujob'resi li rochocheb' rik'in oor ut plaat.
16K'a'ut naq ink'a' kine'xmuq jo' junaq tz'eqb'il k'uula'al,
jo'keb' li k'uula'al ink'a' neke'ilok kutan?
17Sa' li muqleb'aal kamenaq naraqe'k li xpoqlenkileb' rib' li maa'useb' aj winq,
ut neke'hilank li tawajenaqeb'.
18Aran k'ojk'ookeb' xch'ool li tz'aptz'ookeb',
chi ink'a' chik neke'rab'i xyaab' xkux laj taqlanel.
19Aran junnaqikeb' li kok' ut li ninq,
ut laj mun ach'ab'anb'il chik chiru laj eechal re.
20K'a'ut naq li Yos nokooxkanab' chi yo'laak,
wi junes rahilal ut ch'a'ajkilal naqil chiru li qayu'am?
21Naqarahi li kamk ut ink'a' nokootawe'k xb'aan,#3,21 Ap 9,6.
us ta yooko xsik'b'al jo' junaq b'ihomal wank chi muqmu.
22K'ajo' naq nasaho'k sa' qach'ool,
wi ta tooruuq chi kub'eek sa' muqleb'aal!
23K'a'ut naq ramro li b'e chiqu,
ut li Yos nokooxk'e chi b'eek chi ink'a' naqanaw b'ar yooko chi xik?
24Cho'q intzekemq wank li yaab'ak,
ut li wuk'a' a'an li xrahil linch'ool.
25Jo'nimal li q'axal ninxiwa ru
ut li ink'a' raj nawaj nink'ul,
a'an tz'aqal li xchalk sa' inb'een.
26Maak'a' hilank ut tuqtuukilal cho'q we;
junes rahilal ut yot'ik ch'oolej wank wik'in.
Currently Selected:
Job 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.