Stg 4

B'ar wank li xxe' li raaxiik'

1B'ar nachalk chaq li raaxiik' ut li ch'e'oj ib' wank sa' eeyanq? Ma ink'a' tab'i' nachalk xb'aan li maa'usilal naxamnak sa' leejunxaqalil? 2Nekex'atawank, ut maak'a' neketaw; jo'kan naq nekexkamsink. Nekexkaqalik, ut wi ink'a' nekexru chi xtawb'al eere, nekeyal eeru ut nekech'e' eerib'. Maak'a' wank eere xb'aan naq ink'a' nekextz'aamank. 3Nekextz'aamank ut ink'a' nekexk'uluk xb'aan naq ink'a' nekextz'aamank chi chaab'il: yal nekeraj xsachb'al chixjunil rik'in li k'aru naxrahi xb'aanunkil li tz'ejwalej.

4Ex aj muxul paab'aal! Ma ink'a' nekenaw naq li wank sa' usilal rik'in li ruuchich'och', a'an wank sa' raaxiik' rik'in li Yos? Yalaq ani naraj wank sa' usilal rik'in li ruuchich'och', tixk'e rib' sa' raaxiik' rik'in li Yos. 5Ma nekek'oxla naq maak'a' rajb'al li naxye li Santil Hu: “Li Yos q'axal naxra li musiq'ej, li kixk'e chi wank qik'in”#4,5 Ch'a'aj xtawb'al sa' li Santil Hu b'ar wank tz'aqal li raqal Raatin li Yos a'in (cf. Ex 36,27; Dt 4,24).? 6Ab'anan li Yos q'axal numtajenaq chik li usilal naxk'e qe. Jo'kan naq naxye li Santil Hu: “Li Yos ink'a' nawulak chiru li q'etq'eteb', ab'an narusilaheb' li q'uneb' xch'ool”.#4,6 Pr 3,34; 1 P 5,5.

7Jo'kan utan, cheq'axtesi eerib' rub'el roq rub'el ruq' li Yos; kawaqex chiru laj tza, ut a'an taa'eleliq cheru. 8Jilonqex chi xk'atq li Yos, ut a'an taajiloq chek'atq. Ex aj maak, ch'ajomaq leeruq'. Laa'ex li nachalk naxik leek'a'uxl, ch'ajob'resihomaq leech'ool. 9Tz'uyinqex chirix li xtoq'ob'aal eeru, chiraho'q sa' leeraanm ut yaab'anqex. Leese' chisutq'iiq cho'q yaab'ak, ut li xsahilal eech'ool cho'q rahil ch'oolej. 10Kub'sihomaq eerib' chiru li Qaawa', ut a'an tixnima eewankil.

11Ex was wiitz'in, meewech' eerix cherib'il eerib'. Ani naxwech' rix junaq ras riitz'in malaj naraqok aatin chirix li rech aj paab'anelil, naxwech' rix li Chaq'rab' ut naraqok aatin sa' xb'een li Chaq'rab'; ut wi nakaraq aatin sa' xb'een li Chaq'rab', maawa'at chik aj paab'ahom re, aj raqolat b'an chik aatin sa' xb'een li Chaq'rab'. 12Jun ajwi' laj k'ehol chaq'rab' ut aj raqol aatin, a' li wank xwankil chi kolok ut chi sachok. A'ut laa'at anihat re xwech'b'al laawas aawiitz'in?

Xq'usb'aleb' li b'ihom

13Anaqwan k'ehomaq reetal laa'ex li nekeye: “Hoon malaj wulaj tooxik sa' li tenamit a'an; aran toowanq jun chihab'aq, tooyakoq ut too'eechaninq chaq”, 14ut ink'a' nekenaw k'aru teek'ul wulaj. K'a' ta chik ru leeyu'am? A'an chanchan li k'ajob' nak'utunk jun k'amokaq, ut chirix chik a'an nasachk. 15Tento raj teeye: “Wi li Qaawa' naraj, yo'yooqo ut tqab'aanu a'in ut a'an”. 16A'utan xnimob'resinkil chik eerib' ut xq'etq'etinkil eerib' nekeb'aanu. Chixjunil li nimob'resij ib' jo' a'in, ink'a' us. 17Ani naxnaw xb'aanunkil li us ut ink'a' naxb'aanu, a'an wank xmaak.

Currently Selected:

Stg 4: QQC

Highlight

Copy