Ez 6
6
Laj Esekiel kiq'usuk chirixeb' li jalanil yos
1Li Qaawa' kinraatina ut kixye we: 2“At kaamel winq, ilon wankeb' wi' li xtzuulul Israel ut q'useb' sa' ink'ab'a'. 3Ye reheb' chi jo'ka'in: «Ex xtzuulul Israel, ab'ihomaq li naxye li Qaawa' chirixeb' li tzuultaq'a ut eb' li nima': Tintaqla chaq li raaxiik' sa' eeb'een ut tinjuk'i chixjunileb' leetijob'aal. 4Tinputz'i eb' li artal nekexmayejak wi' ut nekek'at wi' leepom, ut tink'eheb' chi kamk laj k'anjel chiruheb' li jalanil yos. 5Tinkuti eb' li kamenaq chiruheb' li jalanil yos ut tinpaji li xb'aqeleb' laj Israel chi xsutameb' li artal. 6Yalaq b'ar wanqex, eb' leetenamit ut eb' leetijob'aal te'juk'manq ut joxk' te'kanaaq. Eb' li artal te'kanaaq chi po'lemil ut eb' li jalanil yos te'toqiiq; taaputz'iiq eb' li xjalam u li jalanil yos, ut nakirirnak taakanaaq eb' li na'ajej nekek'at wi' leepom. Jo'ch'inal jo'nimal xeyiib' rik'in leeruq', taasachmanq chi junajwa.#6,3-6 Lv 26,30-31. 7Ut naq teerileb' chi kamk naab'al sa' eeyanq, teenaw naq laa'in li Qaawa' Yos.
8«Ab'anan tinkanab'eb' wiib' oxib'aqeb' chi yo'yo sa' eeyanq: te'kole'q chiru li kamk ut te'cha'cha'iiq sa'atqeb' li tenamit. 9Eb' li te'kole'q tinjultiko'q reheb' sa'eb' li tenamit xe'k'ame'k wi'. Te'jultiko'q reheb' chanru naq xinrahob'tesiheb' xb'aan naq xe'xmux li xpaab'aaleb' ut xkoheb' xch'ool chirixeb' li jalanil yos. Eb' a'an te'xyib' rib' xb'aan li k'iila maa'usilal xe'xb'aanu jo'wi' xb'aan li jo'maajo'il b'aanuhem. 10Toja' naq aran te'xk'e reetal naq laa'in li Qaawa' ut moko maak'a' ta rajb'al naq xinye resil li xrahob'tesinkileb'»”.
11Li Qaawa' kixye wi' chik we chi jo'ka'in: “Poq'poq'i laawuq', tenle li ch'och' chiru laawoq ut yaab'an xb'aan li xk'iila maa'usilaleb' laj Israel. Relik chi yaal naq te'oso'q xb'aan li raaxiik', li we'ej ut li rakamk. 12Li wanq chaq chi najt, taakamq xb'aan li raxkamk; li wanq chi nach' taakamq sa' li raaxiik'; ut eb' li te'kole'q, te'kamq xb'aan li we'ej naq taasutmanq rix li tenamit. Chi jo'kan twisi linjosq'il sa' xb'eeneb'. 13Toj aran teenaw laa'ex naq laa'in li Qaawa' Yos, naq teerileb' li kamenaq sa' xyanqeb' li jalanil yos ut chi xsutameb' li artal, sa' xb'eenatqeb' li b'ool najteb' xteram, sa' xjolomeb' li ninqal tzuul, rub'elatqeb' li che', eb' li ninqi ji ut sa'atqeb' li na'ajej xe'mayejak wi' li sununkil pom chiruheb' li xyoseb'. 14Tinye' li wuq' re xsachb'al ruheb' chi junwaakaj ut joxk' tinkanab' li xch'och'eb', chalen sa' li chaqich'och', sa' xjayal rokeb'l iq', toj Riblá sa' releb'l iq'. Ut aran te'xnaw naq laa'in li Qaawa'”.
Currently Selected:
Ez 6: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
