Ez 5
5
1Li Qaawa' kixye we: “At kaamel winq, anaqwan chap junaq q'esnal ch'iich' ut jo' laawismal chiru, jo' ajwi' laamach. Chirix chik a'an sik' junaq b'isleb' ut jek' laawismal sa' oxib' jachal. 2Jun jachal laawismal taak'at sa' xyi li tenamit naq taaraqe'q xsutb'al rix Jerusalén. Li jun jachal chik taaxok ut taaseti chi ch'iich' chi junqre li tenamit; ut li rox jachal taakut sa' iq'. Toja' naq laa'in twaanilasiheb' chi ch'iich' eb' li poyanam. 3Taaxok ajwi' wiib' oxib'aq li ismal ut taab'ak' chire laawaq'; 4chirix chik a'an taaxok kach'inaq li ismal a'an ut taak'e chi k'atk sa' xam. A'anaq reetalil naq chixjunil li xtenamit laj Israel taak'atmanq.
5“Jo'ka'in ninye laa'in li Qaawa': A'an a'in Jerusalén li kink'ojob' sa' xyiheb' li tenamit sa' ruuchich'och'. 6A'ut eb' a'an ke'xtz'eqtaana linchaq'rab' ut eb' li waatin, ut q'axal yib' wi' chik ru li xb'aanuhomeb' chiruheb' li tenamit wankeb' chi xsutam. Ink'a' ke'xpaab' li waatin chi moko ke'wank jo' naxye linchaq'rab'.
7“Jo'kan utan, laa'in li Qaawa' ninye chi jo'ka'in: Laa'ex q'axal q'etq'etex chiruheb' li tenamit wankeb' chesutam, ut ink'a' xeraj wank jo' naxye lintaqlahom; ink'a' xepaab' li waatin, chi moko xeb'aanu jo' naxye li xchaq'rab' eb' li tenamit wankeb' chesutam. 8Jo'kan naq laa'in li Qaawa' ninye: Laa'in xik' ajwi' tatwil, a Jerusalén, ut tinraqoq aatin sa' aab'een chiruheb' li xninqal ru tenamit, 9jo' maajun wa xinb'aanu chi moko tinb'aanu chik moqon, xb'aan laatz'i'b'eetalil maa'usilal. 10Wanqeb' na'b'ej yuwa'b'ej te'xtiw eb' li ralal xk'ajol#5,10 Dt 28,53-57; Jr 19,9; Lm 4,10. ut wanqeb' alal k'ajolb'ej te'xtiw li xna' xyuwa' sa' eeyanq. Tinraqoq aatin sa' eeb'een, ut tincha'cha'iheb' junsut junrub'el choxa jo'k'ihaleb' li xe'kole'k.
11“Laa'in li Qaawa', li yo'yookil Yos, ninxaqab' xwankil li waatin naq laa'ex xesach xloq'al linsantil ochoch rik'in leetz'i'b'eetalil yos ut rik'in leeyib' aj b'aanuhom; jo'kan naq tinsach eeru chi maajun tintoq'ob'a ru sa' eeyanq chi moko tinkuy xmaak. 12Jun rox jachaleb' laapoyanam, a Jerusalén, te'kamq xb'aan li raxkamk ut li we'ej; li jun rox jachal chik te'kamsiiq chi ch'iich' chasutam xb'aaneb' li xik' neke'ilok aawe, ut li rox jachal chik tincha'cha'iheb' junsut junrub'el choxa. Ut laa'in twaanilasiheb' chi ch'iich'.
13“Toja' naq twisi linjosq'il sa' xb'eeneb' ut tin'eeqajunq toj reetal taak'ojlaaq linch'ool. Ut naq akaq xwisi linjosq'il sa' xb'eeneb', te'xnaw naq laa'in, li Qaawa', xinb'aanu chi jo'kan xb'aan naq namayok li waanm. 14Tatinsutq'isi jo' jun tuub' aj chik chi pek, a Jerusalén; xutaanalaqat chiruheb' li tenamit li wankeb' chasutam, ut jo'k'ihaleb' li te'nume'q aran tate'xse'e. 15Tathob'e'q ut tatmajewaaq xb'aaneb' li tenamit sutsuukat wi'. Naq tinraqoq aatin sa' aab'een rik'in linjosq'il ut xninqal rahilal, chixjunileb' te'xtaw xyaalal -chan li Qaawa' Yos-.
16“Tintaqla chaq li we'ej sa' eeb'een jo' li simaj jwal jutz' ru'uj, li taasachoq chi junwaakaj. Yaal naq tintaqla chaq li we'ej sa' eeb'een ut taalajq chixjunil leewa leeruk'a'. 17Tintaqla chaq li we'ej, li yajel, li raxkamk sa' eeb'een, ut tintaqla ajwi' chaq eb' li josq' aj xul re naq texkanaaq chi maajunaq chik leeralal eek'ajol. Naab'aleb' sa' eeyanq te'kamq sa' li yalok.#5,16-17 Ez 14,21; Ap 6,8. Laa'in, li Qaawa', xinyehok re eb' li aatin a'in”.
Currently Selected:
Ez 5: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
