Ex 7
7
Li Qaawa', laj Moisés ut laj Aharón
1Toja' naq li Qaawa' kixye re laj Moisés: “K'e reetal, xatinxaqab' cho'q wuuchil chiru laj Parahón. Ut laj Aharón laawas taa'aatinaq sa' aak'ab'a'. 2Laa'at taaye re chixjunil li tatintaqla wi', ut laj Aharón laawas toxye re laj Parahón re naq tixkanab'eb' chi elk laj Israel sa' li xtenamit. 3Ab'an laa'in tinkawub'resi xch'ool laj Parahón; us ta naab'al li xninqal ru eetalil ut li sachb'ach'oolej tinb'aanu sa' xteepal Ejiipt,#7,3 Hch 7,36. 4laj Parahón ink'a' texrab'i. Toja' naq tintaqsi li wuq' sa' xb'een Ejiipt ut rik'in xninqal rahilal twisi aran lintenamit, eb' linteepal, a'aneb' laj Israel. 5Ut naq tinye' li wuq' sa' xb'een Ejiipt ut twisi aran eb' li ralal xk'ajol laj Israel, te'xnaw eb' laj Ejiipt naq laa'in li Qaawa'”.
6Laj Moisés ut laj Aharón ke'xb'aanu li taqlanb'ileb' wi' xb'aan li Qaawa'. 7Kaak'aal chihab' (80) wank re laj Moisés ut oxib' ro'k'aal (83) wank re laj Aharón naq ke'raatina laj Parahón.
Li xxuq' laj Aharón
8Li Qaawa' kiraatinaheb' laj Moisés ut laj Aharón ut kixye reheb': 9“Naq laj Parahón tixye eere: «B'aanuhomaq junaq sachb'ach'oolej», taaye re laj Aharón: «Chap laaxuq' ut kut chiru laj Parahón, ut a'an taakanaaq chi k'anti'il»”.
10Ke'wulak b'i' laj Moisés ut laj Aharón rik'in laj Parahón ut ke'xb'aanu li ke'taqlaak wi' xb'aan li Qaawa': laj Aharón kixkut li xxuq' chiru laj Parahón ut chiruheb' laj tenq' re, ut a'an kisutq'iik chi k'anti'il. 11Ab'an laj Parahón kixb'oqeb' li wankeb' xna'leb' ut eb' laj tuul; ut eb' a'an ajwi' ke'xb'aanu a'an rik'in li xna'leb'eb': 12ke'xkut li xxuq' chixjunqaleb' ut ke'kanaak chi k'anti'il. Ab'anan li xxuq' laj Aharón kixnuq' li xxuq'eb' laj q'e.
13Ab'an kikawuuk xch'ool laj Parahón ut ink'a' kirab'iheb', jo' tz'aqal yeeb'il chaq chi junxilaj xb'aan li Qaawa'.
Li xb'een xnimal rahilal: li ha' kisutq'iik chi kik'ul
14Toja' naq li Qaawa' kixye re laj Moisés: “Q'axal kaw xch'ool laj Parahón; ink'a' naxkanab'eb' chi elk lintenamit. 15Wulaj eq'la ayu rik'in laj Parahón naq taaxik sa' nima'. Toxaawoyb'eni chire li nima' ut chiwanq sa' aawuq' li xuq' li kisutq'iik chi k'anti'il. 16Toxaaye re: «Li Qaawa', li xYoseb' laj Hebreo, xinxtaqla chaq aawik'in chi xyeeb'al aawe: Kanab'eb' chi xik lintenamit re naq tine'xloq'oni chaq sa' li chaqich'och'. Ab'an chalen toj anaqwan ink'a' xawaj rab'inkil. 17Jo'ka'in naxye li Qaawa': Rik'in a'in taanaw naq laa'in li Qaawa'. K'e reetal, tinsak' li roq li nima' rik'in li xuq' li wank sa' wuq' ut taasutq'iiq chi kik'ul.#7,17 Sab 11,6-8; Ap 8,8; 16,4. 18Eb' li kar li wankeb' sa' nima' talaje'kamq, li nima' taachuho'q ut eb' laj Ejiipt ink'a' chik te'ruhanq ruk'b'al li ha' li wank sa' nima'»”.
19Li Qaawa' kixye ajwi' re laj Moisés: “Ye re laj Aharón: «Chap laaxuq' ut taaye' laawuq' sa' xb'eeneb' li ha' li wank Ejiipt, sa' xb'eeneb' li nima', li b'ekb'il roqha', li kaq'nab' ut sa' xb'een chixjunileb' li k'uuleb'aal ha'. Talaje'kik'o'q ut talaje'wanq kik' sa' chixjunil li tenamit Ejiipt, toj sa'eb' li che'il sek' ut sa'eb' li pekil sek'»”.
20Laj Moisés ut laj Aharón ke'xb'aanu li ke'taqlaak wi' xb'aan li Qaawa': laj Aharón kixtaqsi li xxuq' ut kixsak' li roq nima' chiru laj Parahón ut eb' laj tenq' re. Ut chixjunil li roqha' kilajkik'o'k. 21Kilaje'kamk chixjunileb' li kar sa' nima', kichuho'k li nima', ut eb' laj Ejiipt ink'a' chik ke'ruhank ruk'b'al li ha' wank sa' li nima'. Kilaje'wank kik' sa' chixjunil li tenamit Ejiipt!
22Ab'anan jo'kan ajwi' ke'xb'aanu eb' laj q'e aj Ejiipt rik'in li xna'leb'eb', ut kikawuuk xch'ool laj Parahón ut ink'a' kiraj rab'inkil laj Moisés ut laj Aharón, jo' tz'aqal yeeb'il chaq xb'aan li Qaawa'. 23Laj Parahón kiq'ajk, kox'okaq sa' rochoch ut maak'a' kiraj wi' a'an. 24Ut chixjunileb' laj Ejiipt ke'xb'ek xha'eb' chire li nima', xb'aan naq ink'a' neke'ruhank ruk'b'al li ha' wank sa' nima'.
Li xkab' xnimal rahilal: eb' li k'iila amoch
25Chalen naq li Qaawa' kixsak' li nima', ke'nume'k wuqub' kutan chi jo'kan.
Currently Selected:
Ex 7: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.