Ex 6
6
1Li Qaawa' kixye re laj Moisés: “Anaqwan taawil k'aru tinb'aanu re laj Parahón, xb'aan naq ka'ajwi' rik'in linkawil uq' tixkanab'eb' chi xik ut taarisiheb' sa' li xtenamit”.
Li xtaqlankil laj Moisés
2Li Qaawa' kiraatina laj Moisés ut kixye re:
“Laa'in li Qaawa'. 3Xink'ut wib' jo' Nimajwal Yos chiru laj Abrahán, laj Isahak ut laj Jakob, ab'anan ink'a' xink'eheb' chixnaw lintz'aqal k'ab'a': a' li Qaawa'.#6,2-3 Ex 3,13-15. 4Xink'ojob' ajwi' jun Sumwank rik'ineb' ut xinye li waatin naq tink'e reheb' li tenamit Kanahán, a' li ch'och' ke'xb'eeni chaq jo' aj numeleb'. 5Ut anaqwan, naq xwab'i li xkawil yaab'eb' laj Israel rahob'tesinb'ileb' xb'aaneb' laj Ejiipt, xnaqk sa' inch'ool linloq'laj Sumwank.
6“Jo'kan b'i', toxaaye reheb' laj Israel: «Laa'in li Qaawa'. Laa'in twisi sa' eeb'een li kawil iiq neke'xk'e laj Ejiipt, texwisi chi munil ut texinkol rik'in xnimal inwankil jo'wi' rik'in xninqaleb' ru inb'aanuhom. 7Texink'e cho'q intenamit ut laa'inaq leeYos; ut teenaw naq Laa'inin li Qaawa' leeYos li texwisi sa' ruq'eb' laj Ejiipt. 8Laa'in texwoksi sa' li ch'och' xinyeechi'i rik'in jurament re laj Abrahán, laj Isahak ut laj Jakob; a'an li tink'e chereechani. Laa'in li Qaawa' Yos»”.
9Laj Moisés kixye a'in reheb' laj Israel; ab'an eb' a'an ink'a' ke'xpaab', xb'aan naq q'axal raheb' sa' xch'ool xb'aan li kawil k'anjel.
10Toja' naq li Qaawa' kiraatina wi' chik laj Moisés ut kixye re: 11“Ayu chi aatinak rik'in laj Parahón, li awab'ej re Ejiipt, re naq tixkanab'eb' laj Israel chi elk sa' li xch'och'”. 12Kichaq'ok laj Moisés chiru li Qaawa': “Toq'ob' wu! -chan-. Wi eb' laj Israel ink'a' nikine'rab'i, ma toja' ta chik tinrab'i laj Parahón? Xb'aan naq ch'a'aj li aatinak chiwu”.
13Toja' naq li Qaawa' kixye reheb' laj Moisés ut laj Aharón: “Yehomaq reheb' laj Israel ut re li awab'ej re Ejiipt: «Li Qaawa' xooxtaqla chaq chi risinkil li xtenamit sa' xch'och'eb' laj Ejiipt»”.
Eb' li xxe'toonil yuwa' laj Moisés ut laj Aharón
14A'aneb' a'in li xyuwa'ileb' li rochocheb' laj Israel: li xb'een ralal laj Israel a'an laj Rubén.
Eb' li ralal laj Rubén a'aneb' a'in: laj Enok, laj Palú, laj Jesrón ut laj Karmí. A'aneb' li rochocheb' laj Rubén.
15Eb' li ralal laj Simehón a'aneb' a'in: laj Yemuel, laj Yamín, laj Ohad, laj Yakín, laj Sójar ut laj Saúl, ralal li ixq aj Kanahán. A'aneb' a'in li rochocheb' laj Simehón.
16A'aneb' a'in li xk'ab'a'eb' li ralal laj Leví, a' yaal chanru li xjunkab'aleb': laj Kersón, laj Kehat, laj Merarí. Chixjunil li xyu'am laj Leví a'an wuqlaju xwuqk'aal (137) chihab'. 17Eb' li ralal laj Kersón a'aneb' a'in: laj Libní ut laj Semehí rik'in li xjunkab'aleb'. 18Eb' li ralal laj Kehat a'aneb' a'in: laj Amrán, laj Isar, laj Hebrón ut laj Usiel. Chixjunil li xyu'am laj Kehat a'an oxlaju xwuqk'aal (133) chihab'. 19Eb' li ralal laj Merarí a'aneb' a'in: laj Majlí ut laj Musí. A'aneb' a'in li rochocheb' laj Leví, a' yaal chanru li xxe' xtoonaleb'.#6,16-19 Nm 3,17-20; 26,57-58; 1 Kr 6,16-19.
20Laj Amrán kixk'am cho'q rixaqil lix Yokébed, li rikan na', ut rik'in a'an ke'yo'laak laj Aharón ut laj Moisés. Chixjunil li xyu'am laj Amrán a'an wuqlaju xwuqk'aal (137) chihab'.
21Eb' li ralal laj Isar a'aneb' a'in: laj Koré, laj Néfej ut laj Sikrí.
22Eb' li ralal laj Usiel a'aneb' a'in: laj Misael, laj Elisafán ut laj Sitrí.
23Laj Aharón kixk'am cho'q rixaqil lix Isabel, xrab'in laj Aminadab, ranab' laj Najsón, ut rik'in a'an ke'yo'laak laj Nadab, laj Abihú, laj Elehasar ut laj Itamar.
24Eb' li ralal laj Koré a'aneb' a'in: laj Asir, laj Elkaná ut laj Abiasaf. A'aneb' a'in li rochocheb' laj Koré.
25Laj Elehasar, ralal laj Aharón, kixk'am cho'q rixaqil jun reheb' li xrab'in laj Putiel, ut rik'in a'an kiyo'laak laj Pinjás. A'aneb' a'in li xyuwa'ileb' li rochocheb' laj Leví, a' yaal chanru li xxe' xtoonaleb'.
26A' laj Aharón ut laj Moisés a'in ke'yehe'k wi' xb'aan li Qaawa': “Cherisiheb' laj Israel sa' li tenamit Ejiipt chi tzoltzo”. 27A'aneb' a'in li ke'raatina laj Parahón, awab'ej re Ejiipt, re risinkileb' laj Israel Ejiipt. A'aneb' laj Moisés ut laj Aharón.
28Naq li Qaawa' kiraatina laj Moisés sa' li tenamit Ejiipt, 29kixye re: “Laa'in li Qaawa'. Chixjunil li tinye aawe toxaaye re laj Parahón, awab'ej re Ejiipt”. 30Ab'an laj Moisés kichaq'ok chiru li Qaawa': “Toq'ob' wu! -chan-. Ch'a'aj li aatinak chiwu. Chan put ru naq tinrab'i laj Parahón?”.
Currently Selected:
Ex 6: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.