Ex 14
14
Eb' laj Israel ke'nume'k junpak'al li Kaqi Palaw
1Li Qaawa' kiraatina laj Moisés ut kixye re: 2“Ye reheb' laj Israel naq te'xsutq'isi chaq rib' ut toxe'hilanq sa' xka'yab'aal Pi-Hajirot, sa' xyanq Mikdol ut li palaw, chiru Bahal-Safón. Aran toxexhilanq, chire li palaw. 3Toja' naq laj Parahón tixye chirixeb' laj Israel: «Yookeb' chi xb'eeninkil rib' sa' li tenamit, ut li chaqich'och' xram xb'eheb'». 4Ab'an laa'in tinkawub'resi xch'ool laj Parahón re naq tixchap raanil cherix. Toja' naq tink'ut inloq'al rik'in xsachb'al xwankil laj Parahón ut eb' laj puub'. Ut eb' laj Ejiipt te'xnaw naq laa'in li Qaawa'”.
Eb' laj Israel ke'xb'aanu chi jo'kan. 5Naq kiyehe'k resil li relikeb' laj Israel re li awab'ej re Ejiipt, laj Parahón ut eb' laj tenq' re ke'xjal xk'a'uxl chirixeb' li tenamit: “K'aru xqab'aanu? Xqakanab'eb' laj Israel chi elk cho'q qamoos”, chankeb'.
6Tikto laj Parahón kixtaqla xk'eeb'al xkawaayil li xb'eleb'aal ch'iich' ut kixk'ameb' laj puub' chirix. 7Kixk'am lajeek'aal xkab' o'q'ob' (600) xb'eleb'aal ch'iich' li sik'b'ileb' ru, jo' ajwi' chixjunileb' li xb'eleb'aal ch'iich' eb' laj Ejiipt rochb'eeneb' laj puub'. 8Li Qaawa' kixkawub'resi xch'ool laj Parahón, awab'ej re Ejiipt, re naq tixtaaqeheb' laj Israel naq yookeb' chi elk chi kaweb' xch'ool.
9Eb' laj Ejiipt ke'xchap raanileb' chirixeb' rik'in chixjunileb' li xkawaay, li xb'eleb'aal ch'iich' laj Parahón, eb' li wankeb' chirixeb' li kawaay ut eb' laj puub'; ut koxe'xtaw eb' laj Israel naq yookeb' chi hilank chire li palaw, nach' rik'in Pi-Hajirot, chiru Bahal-Safón. 10Naq yo chaq chi nach'ok laj Parahón, eb' laj Israel ke'xtaqsi rilob'aaleb' ut, naq ke'ril eb' laj Ejiipt chirixeb', k'ajo' naq ke'xiwak ut ke'xyaab'a li Qaawa'. 11Ut ke'xye re laj Moisés: “Ma maak'a' tab'i' muqleb'aal kamenaq aran Ejiipt? K'a' naq xoohaak'am chaq chi kamk sa' li chaqich'och'? K'aru rajb'al naq xoohaawisi chaq Ejiipt? 12Ma ink'a' tab'i' ak xqaye aawe aran: «Kanab'o sa' tuqtuukilal, tqaj k'anjelak chiruheb' laj Ejiipt? Xb'aan naq jwal us cho'q qe k'anjelak chiruheb' laj Ejiipt chiru naq tookamq sa' li chaqich'och'»”.
13Kichaq'ok laj Moisés ut kixye reheb' li tenamit: “Mexxiwak, kawaq eech'ool ut teeril li kolb'a ib' tixk'e eere li Qaawa' sa' li kutan a'in. Xb'aan naq eb' laj Ejiipt li yookex chi rilb'al anaqwan, maajun wa chik teerileb' ru. 14Li Qaawa' taayaloq cherix. Mexk'oxlak”.
15Toja' naq li Qaawa' kixye re laj Moisés: “K'a'ut naq nikinaayaab'a? Ye reheb' laj Israel naq xikaqeb'. 16Ut laa'at, taqsi laaxuq', ye' laawuq' sa' xb'een li palaw re naq tixjach rib'; chi jo'kan eb' laj Israel te'ok sa' li palaw chi chaqi ru li b'e. 17K'e reetal, laa'in tinkawub'resi xch'ooleb' laj Ejiipt re naq te'xik cherix. Toja' naq taanimaaq inloq'al naq tinsach xwankil laj Parahón ut chixjunileb' laj puub', li xb'eleb'aal ch'iich' ut li wankeb' chirixeb' li kawaay. 18Ut naq taanimaaq inloq'al rik'in li te'xk'ul laj Parahón, eb' laj puub', li xb'eleb'aal ch'iich' ut eb' li wankeb' chirixeb' li kawaay, te'xnaw eb' laj Ejiipt naq laa'in li Qaawa'”.
19Toja' naq li x'ánjel li Yos li yo chi k'amok xb'eheb' laj Israel kixjal xna'aj ut kiq'axonk chirixeb'. Jo'kan ajwi' li choql li wank chi uub'ej ki'elk aran ut koxk'e rib' chi ixb'ej: 20koxkanaaq sa' xyanqeb' li xmuheb'aaleb' laj Ejiipt ut li xmuheb'aaleb' laj Israel. Q'oqyink ru li choql cho'q reheb' laj Ejiipt, ab'an naxkutanob'resi xb'eheb' li ralal xk'ajol laj Israel. Jo'kan naq kinume'k li q'oqyink chi ink'a' ke'xtaw rib'eb'.
21Laj Moisés kixye' li ruq' sa' xb'een li palaw ut li Qaawa' kixtaqla chaq chiru chixjunil li q'oqyink jun kawil iq' li xchalk sa' releb'l saq'e,#14,21-22 Sal 77,17-21. ut kixchaqihob'resi li palaw: toja' naq kixjek' rib' li ha'. 22Eb' laj Israel koxe'okaq sa' li palaw chi chaqi ru xb'eheb':#14,22 Sab 10,18-19; 1 Ko 10,1-2; Heb 11,29. chanchan li tz'ak naq kikanaak li ha' chi xka'pak'alil li b'e.
23Eb' laj Ejiipt ke'xchap raanileb' chirixeb': chixjunileb' li xkawaay laj Parahón, eb' li xb'eleb'aal ch'iich' ut eb' li wankeb' chirixeb' li xkawaay, koxe'okaq chirixeb' laj Israel sa' li palaw. 24Ab'an naq hik'e'k re, li Qaawa' ki'ilok toj sa' li xam ut sa' li choql, ut kixsach xwankileb' laj Ejiipt. 25Kixt'il li xb'eleb'aaleb' li kaar, ut ch'a'aj chik naq yookeb' chi xik. Toja' naq ke'xye eb' laj Ejiipt: “Eleliqo chiruheb' laj Israel xb'aan naq li Qaawa' yo chi yalok qik'in laa'o aj Ejiipt chirixeb' a'an”, chankeb'.
26Kixye ut li Qaawa' re laj Moisés: “Ye' laawuq' sa' xb'een li palaw re tixjunaji rib' li ha' sa' xb'eeneb' laj Ejiipt, sa' xb'eeneb' li xb'eleb'aal ch'iich' jo' ajwi' eb' laj puub'”, chan.
27Ut laj Moisés kixye' li ruq' sa' xb'een li palaw ut naq ak xhik'e'k, li palaw kisutq'iik wi' chik sa' xna'aj: eb' laj Ejiipt ke'raj raj elelik, ab'an ke'rame'k xb'aan li ha', ut li Qaawa' kixkuteb' laj Ejiipt sa' xyi li palaw. 28Naq kixk'ul wi' chik rib' li ha', eb' li b'eleb'aal ch'iich' jo'wi' eb' li wankeb' sa' xb'eeneb' ut chixjunileb' laj puub' re laj Parahón li ke'ok sa' li palaw chirixeb' laj Israel, ke'muqunk chi rub'el: tik maajun kikole'k. 29A'ut eb' laj Israel ke'nume'k sa' li palaw chi chaqi ru xb'eheb', xb'aan naq li ha' chanchan li tz'ak kikanaak chi xka'pak'alil li b'e.
30Sa' li kutan a'an li Qaawa' kixkoleb' laj Israel sa' ruq'eb' laj Ejiipt, ut eb' laj Israel ke'rileb' laj Ejiipt chi kamenaqeb' chik chire li palaw. 31Ut naq eb' laj Israel ke'ril k'aru kixb'aanu li Qaawa' reheb' laj Ejiipt rik'in xnimal xwankil li ruq', li tenamit ke'xxiwa ru li Qaawa' ut ke'xpaab' li Qaawa' jo' ajwi' laj Moisés laj k'anjel chiru.
Currently Selected:
Ex 14: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
