Ex 13
13
Eb' li xb'een alalb'ej
1Li Qaawa' kiraatina laj Moisés ut kixye re: 2“Q'axtesinb'ilaqeb' sa' wuq' chixjunileb' li xb'een alalb'ej, chixjunil li xb'een ralaleb' laj Israel, jo' winq jo' xul, xb'aan naq we chixjunileb'”.#13,2 Nm 3,13; Lk 2,23.
Li wa ink'a' yuub'il
3Toja' naq laj Moisés kixye re li tenamit:
“Jultikaq eere li kutan a'in li xex'elk wi' Ejiipt, sa' li tenamit b'arwi' xexk'anjelak cho'q aj mun, xb'aan naq li Qaawa' xexrisi chaq aran rik'in xkawilal li ruq'. Jo'kan naq mexwa'ok wa li wank xyu. 4Anaqwan leerelik, sa' li po Abib. 5Ut naq li Qaawa' toxatroksi sa' li xch'och'eb' laj Kanahán, laj Hit, laj Amor, laj Jib ut laj Jebús, a' li xq'emal ch'och' kixyeechi'i chaq rik'in jurament reheb' laana' laayuwa', jo'ka'in naq taaninq'ehi sa' li po a'in. 6Chiru wuqub' kutan tatwa'oq wa ink'a' yuub'il, ut sa' xwuq li kutan taawanq ninq'e sa' xk'ab'a' li Qaawa'. 7Taawa'manq li wa ink'a' yuub'il chiru wuqub' kutan ut ink'a' chik taawanq li wa wank xyu sa' laawochoch, chi moko li nasipob'resink re li wa, sa' chixjunil laana'aj. 8Sa' li kutan a'an taach'olob' re laawalal: «Ninb'aanu a'in re xjultikankil li kixb'aanu we li Qaawa' naq kin'elk chaq Ejiipt. 9Ut a'an taak'anjelaq aawe cho'q reetalil sa' laawuq', jo' jun inpatz'b'al chawu, re naq li xchaq'rab' li Qaawa' chiwanq sa' laawe, xb'aan naq rik'in xkawilal li ruq' katrisi chaq li Qaawa' aran Ejiipt. 10Chapaab' laataqlankil a'in rajlal chihab', sa' xq'ehil».
Eb' li xb'een alalb'ej
11“Akaq xatroksi li Qaawa' sa' xch'och'eb' laj Kanahán ut akaq xq'axtesi aawe li na'ajej, jo' naq kixyeechi'i aawe ut reheb' laana' laayuwa', 12chaq'axtesi sa' ruq' li Qaawa' chixjunileb' li xb'een alalb'ej.#13,12 Lk 2,23. Jo'kan ajwi' chixjunil li xb'een ral laaketomq rehaqeb' li Qaawa', wi teelomeb'. 13Chixjunil li xb'een raleb' li b'uur taak'e jun ch'ina karneer cho'q ruuchil; ut wi ink'a' taak'e ruuchil, tento naq taatoq xb'aqel xkux. Tento ajwi' naq taamayeja junaq xul cho'q ruuchil li xb'een aawalal. 14Ut naq wulaj kab'ej tixpatz' aawe laawalal: «K'aru xyaalal a'in?», taaye re: «Li Qaawa' rik'in xkawilal li ruq' koorisi chaq Ejiipt, b'arwi' kook'anjelak chaq cho'q aj mun. 15Laj Parahón kixkawub'resi xch'ool ut ink'a' kooxkanab' chi elk; jo'kan naq li Qaawa' kixkamsi chixjunileb' li xb'een alalb'ej sa' li tenamit Ejiipt, chalen li xb'een ralal li winq toj rik'in li xb'een ral li xul. Jo'kan naq ninmayeja chiru li Qaawa' chixjunil li xb'een raleb' li xul teelom, ut nink'e ruuchil chixjunil li xb'een alalb'ej sa' xyanqeb' li walal. 16Ut a'an taak'anjelaq aawe cho'q reetalil sa' laawuq', cho'q xsahob' ru laapeekem, xb'aan naq li Qaawa' rik'in xkawilal li ruq' koorisi chaq Ejiipt»”.
Li relikeb' laj Israel
17Naq laj Parahón kixkanab'eb' chi elk li tenamit, li Yos ink'a' kixk'ameb' sa' xb'ehil xch'och'eb' laj Filistea, us ta jwal nach' li b'e a'an, xb'aan naq kixye sa' xch'ool li Qaawa': “Mare anchal te'ok chi yalok lintenamit, ut naq te'xk'ul a'an, te'yot'e'q xch'ool ut te'sutq'iiq wi' chik Ejiipt”. 18Jo'kan naq li Yos kixk'ameb' chi xk'eeb'al q'oot sa' xb'ehil li chaqich'och', sa' xjayal li Kaqi Palaw.
Chi tzoltzo ke'elk Ejiipt eb' laj Israel. 19Ut laj Moisés kixk'am li xb'aqel laj Josehilq, xb'aan naq xyehom chaq laj José reheb' laj Israel: “Ch'olch'o naq li Yos tulexrula'ani; toja' naq xokomaq arin linb'aqel. Yehomaq jurament naq teek'am cherix”.#13,19 Gn 50,25; Jos 24,32.
20Ke'elk eb' laj Israel aran Sukot ut koxe'hilanq Etán, chire li chaqich'och': 21k'amol b'e li Qaawa' chiruheb'. Chi kutan naxik sa' choql re xb'eresinkileb', ut chi q'eq naxik sa' xam re xkutanob'resinkil xb'eheb'. Chi jo'kan ke'ruuk chi xik chi q'eq ut chi kutan. 22K'amol b'e chi junelik li choql chi kutan chiru li tenamit, ut li xam k'amol b'e chi q'eq.#13,21-22 Ex 40,34-38; Nm 9,15-23; Sab 10,17; 18,3.
Currently Selected:
Ex 13: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
