2 S 23

Eb' li aatin kixye laj David sa' xraqik li xyu'am

1Rik'in li aatin a'in kixraq aatinak laj David:

“Raatin laj David, ralal laj Jesé;

raatin li winq li kitaqsiik xwankil,

a' li sik'b'il ru xb'aan li xYos laj Jakob,

li chaab'il aj b'ichanel aj Israel:

2“Li xmusiq' li Qaawa' na'aatinak wik'in,

li xloq'laj aatin wank chi xtz'uumal we.

3Li xYos laj Israel x'aatinak,

laj Kolol re laj Israel xye we:

«Li nataqlank sa' xb'eeneb' li tenamit sa' tiikilal

ut na'awab'ejink chi k'ojk'o xch'ool rik'in li Yos,

4chanchanaq li kutan naq yo chi hik'e'k,

chanchanaq li saq'e naq maak'a' li choql eq'la

ut naxk'e chi lemtz'unk li pim chiru ch'och'

sa' xraqik li hab'».

5Kaw xaqxo linjunkab'al chiru linYos,

xb'aan naq li Qaawa' xb'aanu wik'in

jun sumwank chi junelik,

tustu ru ut xaqxo xwankil.

A'an nak'ehok we chi q'axok u chi junelik,

a'an naxk'e chi tz'aqlok ru chixjunil li wajom.

6Ab'anan chixjunileb' li ink'a' useb' xna'leb'

kama'eb' li k'ix sa' li chaqich'och':

maa'ani nach'e'ok re rik'in li ruq'.

7Li ani nach'e'ok reheb',

aajel ru li ch'iich' malaj jutz' che',

ut te'kute'q sa' xam chi oso'k chi junajwa”.

Xk'ab'a'eb' li kaweb' rib' re laj David

(1 Kr 11,10-47)

8A'aneb' a'in li xk'ab'a'eb' li kaweb' rib' sa' xyanqeb' laj puub' re laj David: li xb'een, a'an laj Isbahal aj Jakmón, a' li xjolomil eb' li kaweb' rib', li kixkut rib' sa' xb'eeneb' wiib' o'q'ob' (800) chi winq rik'in li xjutz' ch'iich' ut kixkamsiheb' sa' jun kutan. 9Li xkab', a'an laj Elehasar, ralal laj Dodó, aj Ajot. A'an jun reheb' li oxib'eb' jwal kaweb' rib' chi yalok, ut kiwank rochb'een laj David naq ke'yalok rik'ineb' laj Filistea li ch'utch'uukeb' aran Fesdamín. Sa' li kutan a'an eb' laj Israel ke'elelik, 10ab'an kaw xaqxo laj Elehasar chi yalok: kixkamsiheb' laj Filistea toj reetal kilub'k li xtel ut kiletzq'uuk li ruq' rik'in li xch'iich'. Sa' li kutan a'an li Qaawa' kixk'eheb' laj Israel chi xq'axb'al ruheb' laj Filistea, ut eb' laj puub' ke'sutq'iik chirixeb' yal re xxokb'al li k'a' re ru xe'reechani sa' li yalok.

11Li rox, a'an laj Samá, ralal laj Aké, aj Arar. Naq eb' laj Filistea ke'xch'utub' rib' aran Lejí, b'arwi' wank jun siir li ch'och' nujenaq chi lenteej, eb' laj puub' re Israel ke'elelik chiruheb'. 12Ab'an laj Samá koxxaqab' rib' sa' xyi li ch'och' a'an, kixkol rix li na'ajej ut kixq'ax ruheb' laj Filistea. Jo'ka'in naq li Qaawa' kixk'e re laj Samá jun nimla q'axok u.

13Sa' jun kutan, sa' xq'ehil li q'olok, oxib' reheb' li lajeeb' xka'k'aal chi kaweb' rib' koxe'ril laj David sa' li ochoch pek re Adulán, naq jun ch'uuteb' aj Filistea wankeb' sa' li xTaq'ahil Refaín. 14Laj David wank aran sa' li kawub'resinb'il na'ajej, ut jun ch'uuteb' aj Filistea wankeb' chaq Belén. 15Ut sa' junpaat laj David kixtz'aama a'in: “Ani taxaq xk'ehok chiwuk' b'ayaq li ha' re li kumb' wank chi xk'atq li okeb'aal re Belén!”, chan.

16Toja' naq li oxib'eb' chi kaweb' rib' ke'ok sa' xmuheb'aaleb' laj Filistea ut ke'risi chaq ha' sa' li kumb' wank chi xk'atq li okeb'aal re Belén; ke'xk'am ut koxe'xyeechi'i re laj David. Ab'an a'an ink'a' kiruk', kixhoy b'an jo' yeechi'inb'il mayej chiru li Qaawa': 17“Ink'a' taxaq tixk'e we li Qaawa' ruk'b'al li ha' a'in! A'an xkik'eleb' li winq li xe'wulak chi xsik'b'al li ha' a'in ut kach'in chik maa xe'kamk”, chan. Ut ink'a' kiraj ruk'b'al. A'an a'in li ke'xb'aanu li oxib' chi winq yo'ooneb' chi yalok.

18Laj Abisay, riitz'in laj Johab ut xyum lix Sarbia, a'an xjolomil eb' li kaweb' rib'. Sa' jun kutan kixkut rib' sa' xb'eeneb' o'lajuk'aal (300) chi winq rik'in li xjutz' ch'iich' ut kixkamsiheb'. Jo'kan naq kinimank xwankil sa' xyanqeb' li lajeeb' xka'k'aal 19ut q'axal chik kik'ehe'k xloq'al chiruheb' chixjunil a'an, xb'aan naq ki'ok chi taqlank sa' xb'eeneb'. Ab'anan ink'a' koxtaw xloq'al jo'eb' li oxib'.

20Laj Benaías, ralal laj Johadá, aj Kabsehel, a'an jun li winq kaw xch'ool li kixb'aanu xninqal ru b'aanuhom rik'in li xjutz' ch'iich' ut kixkamsiheb'. A'an kikamsink re li wiib' xninqaleb' ru winq aj Mohab. Sa' jun kutan naq yo chaq chi kub'eek sa' choxa li ratz'amke, ki'ok sa' jun b'ekb'il ha' ut kixkamsi jun kaqkoj. 21Kixkamsi ajwi' jun aj Ejiipt jwal nim roq, li wank xjutz' che' sa' ruq'. Ab'an laj Benaías koho chi xk'ulb'al yal rik'in jun ch'ina xuq', kixmaq' li jutz' che' sa' ruq' laj Ejiipt ut rik'in ajwi' a'an kixkamsi. 22A'in kixb'aanu laj Benaías, ralal laj Johadá; ut rik'in a'an kinimank xwankil sa' xyanqeb' li lajeeb' xka'k'aal li kaweb' rib'. 23Q'axal chik kik'ehe'k xwankil chiruheb' chixjunil a'an, ab'anan ink'a' koxtaw xloq'al jo'eb' li oxib'. Ut laj David kixk'e laj Benaías chi taqlank sa' xb'eeneb' laj k'aak'alehom re.

24Sa' xyanqeb' li lajeeb' xka'k'aal wank laj Asahel, riitz'in laj Johab, jo' ajwi' laj Eljanán, ralal laj Dodó, Belén xtenamit; 25laj Samá aj Jarod; laj Eliká aj Jarod; 26laj Jeles aj Bet-Pélet; laj Irá, ralal laj Ikés, Tékoha li xtenamit; 27laj Abiéser aj Anatot; laj Sabení aj Jusá; 28laj Salmón aj Ajoj; laj Majray aj Netofá; 29laj Jeled, ralal laj Bahaná, Netofá li xtenamit; laj Itay, ralal laj Ribay, aj Kibehá sa' xteepal Benjamín; 30laj Benaías aj Piratón; laj Hiday, chalenaq chaq chire li nima' re Kahás; 31laj Abibal aj Bet-Arabá; laj Asmábet aj Bajurín; 32laj Eliajbá aj Sahalbín; laj Yasén aj Kisón; laj Jonatán, 33ralal laj Samá, Arar li xtenamit; laj Ajián, ralal laj Sarar, aj Arar; 34laj Elifélet, ralal laj Ajasbay, Bet-Mahaká li xtenamit; laj Elián, ralal laj Ajitófel, Kiló li xtenamit; 35laj Jesró aj Karmeel; laj Paray aj Arab; 36laj Ikal, ralal laj Natán, Sobá li xtenamit; laj Baní aj Gad; 37laj Sélek aj Amón; laj Najray aj Beherot, aj tenq' re laj Johab, a' li xyum lix Sarbia; 38laj Irá aj Yatir; laj Kareb aj Yatir 39ut laj Urías aj Hit. Li xk'ihaleb' a'an: wuqub' xka'k'aal chi winq.

Currently Selected:

2 S 23: QQC

Highlight

Copy