2 S 22
22
Li xb'ich laj David
(Sal 18)
1A'an a'in li b'ich kixb'icha laj David re li Qaawa' sa' li kutan kikole'k wi' sa' ruq' laj Saúl ut sa' ruq'eb' chixjunileb' li xik' neke'ilok re. 2Kixye:
“At Qaawa', laa'at laj muheelahom ut laj kupuhom we,
laa'at laj ach'ab'anel we 3ut linYos.
Laa'at li saqoonak li ninkol wi' wib',
jo'kat li koleb' ch'iich' nakolok we;
laa'at laj k'aak'alehom ut laj tenq'ahom we,
laa'at laj kolonel li na'isink we sa' li raaxiik'.
4Ninyaab'a xk'ab'a' li Qaawa'
xb'aan naq xk'ulub' nimaak ru,
ut kolb'ilin chik chiruheb' li xik' neke'ilok we.
5“Xinxsut chaq li xwankil li kamk,
k'ajo' xnimal rahil xxib'esink chaq we;
6xinsutunk xb'aan xra'al li xb'alb'a,
ak wankin chaq chiru li kamk.
7Sa' linrahilal xinyaab'a xk'ab'a' li Qaawa',
xintz'aamank, xin'elajink chiru linYos,
ut A'an toj sa' li xloq'laj na'aj xinrab'i:
li xyaab' inkux xwulak toj rik'in.#22,7 Sal 120,1; Jon 2,2.
8“Toja' naq xchiq'chiq'iik li ruuchich'och' ut xwank li hiik,
xlaje'eek'asiik li choxa toj sa' xchamal xna'aj,
a' li Yos x'eek'asink reheb' sa' xjosq'il.#22,8-17 Jue 5,4-5; Job 36,30; Sal 29,3-9; 77,17-20; 144,5-8; Hab 3,3-13.
9X'elk chaq b'uquqnak sib' sa' ru'uj,
x'elk chaq xam sa' re, k'ajo' xtiqwal,
jo'wi' ru xam yo chi k'atok.
10Li Qaawa' xsalab' li choxa ut xkub'e chaq
chi wan chaq q'oqyinkil choql rub'el roq.
11Xk'ame'k xb'aan jun kerubín ut xpurik;
li Qaawa' xheelank sa' xb'eeneb' xxik' li iq'.#22,11 Sal 68,34; 104,3.
12Xmuheela rib' sa' li aak'ab' ut xyiib' xmuheb'aal sa' li hab',
sa' q'oqyinkil choql sa' choxa.
13Xb'aan xlemtz'unkil li xsaqenk xkanaak li choql chi saqb'ach;
jo' nareprotk li raq'kaaq naq xlochk xxamlel.
14“Kama' li kaaq naq x'aatinak chaq li Qaawa' sa' choxa,
li Nimajwal Yos xk'e chi ab'iik li xyaab' xkux.
15Xkutihatq chaq li xsimaj ut xyoolesiheb';
rik'in xk'atom li raq'kaaq xsacheb' xwankil.
16Toja' naq xk'utunk xchamal li palaw,
x'ilmank li rub'elankil li ruuchich'och'
naq xatjosq'o'k, at Qaawa',
rik'in xnimal aawapusihom.#22,14-16 Ex 15,8; 19,19.
17“Li Yos toj sa' choxa xye' chaq li ruq' chintenq'ankil;
xinxchap ut xinrisi sa' xchamal li ha'.
18Xinxkol sa' ruq' li xik' na'ilok we q'axal nim xwankil,
chiruheb' li nikine'xtz'eqtaana,
a'eb' li q'axal kaweb' rib' chiwu.
19Naq wankin chaq sa' rahilal,
xe'raj raj inkamsinkil,
ab'an li Qaawa' xtenq'ank we.
20Xinxk'e sa' jun li na'ajej q'axal helho,
xinxkol xb'aan naq k'ajo' naq nikinxra!
21Li Qaawa' xb'aanu chi jo'kan xb'aan naq tiik linch'ool,
ut xq'ajkamu chiwu naq maak'a' inmaak,
22xb'aan naq junelik xinwank sa' xb'e li Qaawa'
ut maajun wa xinkanab' linYos.
23Wank sa' inch'ool chixjunil li xchaq'rab'
ut ink'a' xinkanab' xpaab'ankil li raatin.
24Xinwank chiru li Qaawa' chi maak'a' inq'usb'al,
maajun sut xinb'aanu li maa'usilal.
25Li Qaawa' naxk'e inq'ajkamunkil jo' chanru xtiikilal li waanm,
jo' chanru xsaqal ru linyu'am li k'utk'u chiru.
26“At Qaawa', laa'at aj uxtaan rik'in li na'uxtaanank u,
ut tiik laach'ool rik'in li tiik xch'ool;
27laa'at saq ru laayu'am rik'in li saq ru xyu'am,
ut wank aana'leb' rik'in li ink'a' tiik xna'leb'.
28Laa'at nakatkolok reheb' li kub'enaqeb' xwankil
ut nakasacheb' xwankil li q'etq'eteb'.
29At Qaawa', laa'at linsaqenk,
laa'at linYos li nakutanob'resink re rak'ab'il link'a'uxl!
30Rik'in laatenq'aal ninq'axeb' xwankil li xik' neke'ilok we;
wochb'eenaq linYos tinpisk'o li tz'ak sutsu wi' li tenamit.
31“Tz'aqal re ru li Yos sa' chixjunil li xb'aanuhom,
tz'aqal yaal chixjunil li raatin li Qaawa'.
A'an nakolok reheb' li neke'xq'axtesi rib' sa' ruq'.#22,31 Pr 30,5.
32Ma wank tab'i' junaq chik Yos chirix li Qaawa'?
Ani tab'i' truuq taakoloq qe?
Ma ink'a' tab'i' ka'ajwi' li qaYos?#22,32 Is 44,8.
33Li Yos a'an li nak'ehok inmetz'ew,
ut nikinxtenq'a re naq tz'aqalaq re ru linyu'am.
34A'an nab'aanunk re li woq jo' roq li kej,#22,34 Hab 3,19.
re naq maak'a' tink'ul sa'atqeb' li loq'laj tzuultaq'a.
35A'an nakawresink re li wuq' re yalok,
jo'wi' lintel re xrinb'al rix li xna' simaj,
li yiib'anb'il rik'in q'anch'iich'.
36“Laa'at nakattenq'ank we ut nikinaakol
jo'kat jun koleb' ch'iich';
rik'in xnimal aawuxtaan nintaw xkawub' linch'ool.
37Nakanimob'resi ru li b'e chiwu
re naq ink'a' taab'ach'q'uuq xkux li woq.
38“Xintaaqeheb' li xik' neke'ilok we toj xoxinchapeb',
ut ink'a' xinsutq'iik chaq
toj reetal xeb'insach chaq chi junajwa.
39Xinjuk' xwankileb', ink'a' chik xe'wakliik,
junt'anikeb' rub'el li woq chixjunileb'.
40Laa'at xatk'ehok inmetz'ew re yalok,
ut xak'eheb' rub'el inwankil eb' li neke'rahob'tesink we;
41xak'eheb' chi elelik li xik' neke'ilok we,
ut xinjuk'eb' li jo'k'ihaleb' neke'tz'eqtaanank we.
42Chajchookeb' re chi xpatz'b'aleb' xtenq'aal,
ab'anan maajun xkolok reheb';
xe'xyaab'a xk'ab'a' li Qaawa',
ab'an ink'a' xsumeheb' li xtij.
43Xinke'eb' jo' li pojtz' nak'ame'k xb'aan iq',
chanchaneb' xseb'ul li b'e naq xeb'inyeq'i.
44Laa'at xinaakol sa' ruq'eb' lintenamit,
xinaaxaqab' chi xjolominkileb' li poyanam;
ut a' chik li tenamit li ink'a' innawom ru
yo chi k'anjelak chiwu.
45Eb' laj ab'l tenamit neke'xnima wu,
neke'ab'ink ut nikine'xpaab'.
46Eb' laj ab'l tenamit neke'lajk xmetz'ew,
ut neke'siksotk naq neke'xkanab' chaq xmuqb'al rib'eb'.
47“Chiwanq taxaq xloq'al li Qaawa'!
Usilaatinanb'il taxaq li Saqoonak ninkol wi' wib';
chiterq'usiiq xwankil linYos laj kolol we,
48a' li Yos nak'ehok we chi numtaak sa' xb'eeneb' li tenamit!
A'an naxq'axtesiheb' rub'el linwankil chi junajwa.
49Laa'at nakatkolok we chiruheb' li xik' neke'ilok we;
nakanimob'resi linwankil sa' xb'eeneb' li neke'rahob'tesink we
ut nikinaakol chiruheb' li yib'ru xna'leb'eb'.
50Jo'kan naq tink'e aaloq'al sa' xyanqeb' li tenamit
ut tinb'icha li xnimal aarahom, at Qaawa'.#22,50 Ro 15,9.
51“Nakatenq'a li awab'ej chi q'axok u,
k'ajo' naq nakak'ut laarahom chiru li sik'b'il ru aab'aan,
a' laj David ut eb' li ralal xk'ajol chi junelik”.
Currently Selected:
2 S 22: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
