2 S 21

Eb' laj Gabahón ut li xjunkab'al laj Saúl

1Naq laj David kiwank cho'q awab'ej, kiwank we'ej chiru oxib' chihab'. Toja' naq laj David kipatz'ok re li Qaawa' ut a'in kixye re: “A'an xk'ulmank xb'aan naq laj Saúl ut eb' li ralal xk'ajol ke'xkamsiheb' laj Gabahón”, chan. 2Li awab'ej kixb'oqeb' laj Gabahón ut ki'aatinak rik'ineb'. (Eb' laj Gabahón moko aj Israeleb' ta, a'aneb' b'an xkomoneb' laj Amor. Junxil eb' laj Israel ke'xye sa' jurament#21,2 Jos 9,3-15. naq ink'a' te'xkamsiheb', ab'an laj Saúl kiraj raj xsachb'aleb' sa' xk'ab'a' xraab'aleb' laj Israel ut eb' laj Judá.) 3Laj David kixpatz' reheb': “K'aru tinb'aanu eerik'in? Chanru tintoj rix li ink'a' us xek'ul laa'ex, re naq teerosob'tesi li xtenamit li Qaawa'?”, chan.

4Ke'chaq'ok eb' laj Gabahón: “Li qach'a'ajkilal rik'in laj Saúl ut li xjunkab'al ink'a' naru taa'elq rik'in plaat malaj oor, chi moko rik'in xkamsinkil anihaq reheb' laj Israel”, chankeb'. Toja' naq laj David kixpatz' reheb': “Cheye we k'aru teeraj tinb'aanu eere”, chan. 5Ut eb' a'an ke'xsume: “Laj Saúl kiraj raj qasachb'al ut kixyal qakamsinkil re naq too'oso'q sa' xsutam Israel. 6Q'axtesihomaq qe wuqub'eb' li ralal ut laa'o te'qakamsi chiru li Qaawa', aran Kibehá re laj Saúl, li sik'b'il ru xb'aan li Qaawa'”, chankeb'. “Us, tinq'axtesiheb' eere”, chan li awab'ej.

7Laj David kiril xtoq'ob'aal ru laj Mefibahal, ralal laj Jonatán ut ri laj Saúl, sa' xk'ab'a' li sumwank kixb'aanu laj David chiru li Qaawa' rik'in laj Jonatán, ralal laj Saúl;#21,7 1 S 20,15-17; 2 S 9,1-7. ut ink'a' kixq'axtesi reheb'. 8Ab'anan kixchap xkab'ichaleb' li xyum lix Rispá, xrab'in laj Ayá, li kiwank rik'in laj Saúl, a'eb' laj Armoní ut laj Mefibóset; kixchap ajwi' ro'ichaleb' li xyum lix Merab,#21,8 1 S 18,19. xrab'in laj Saúl, li kiwank rik'in laj Adriel, ralal laj Barsilay aj Mejolá, 9ut kixq'axtesiheb' sa' ruq'eb' laj Gabahón, li ke'xkamsiheb' sa' xb'een li tzuul chiru li Qaawa'. Junkamik chi xwuqichaleb'; ke'kamsiik sa' xtiklajik xsik'b'al ru li seb'aad.

10Toja' naq lix Rispá, xrab'in laj Ayá, kixchap jun q'es ruhil t'ikr, kixhel sa' xb'een li saqoonak ut aran kiwank chalen sa' xtiklajik li xsik'b'al ru li seb'aad toj sa' xtiklajik li hab'alq'e, ut ink'a' kixkanab'eb' li so'sol chi xaqliik chi xk'atqeb' chiru li kutan chi moko li josq' aj xul chiru li q'oqyink.

11Naq laj David kirab'i resil li k'aru kixb'aanu lix Rispá, xrab'in laj Ayá, 12koho chi xxokb'al li xb'aqeleb' laj Saúl ut laj Jonatán li ralal, li wankeb' chaq rik'ineb' laj Yabés re Galahad. Eb' a'in relq'ahomeb' chaq sa' xtaq'ahil Betsán, b'arwi' ke't'uyub'aak xb'aaneb' laj Filistea sa' li kutan naq laj Saúl kiq'axe'k ru aran Jelbohé.#21,12 1 S 31,8-13. 13Toj aran kixk'am chaq li xb'aqeleb' laj Saúl ut laj Jonatán li ralal, ut kixjunajiheb' rik'in li xb'aqeleb' li wuqub' ke'kamsiik. 14Ke'xmuq li xb'aqeleb' laj Saúl ut laj Jonatán li ralal sa' xch'och'eb' laj Benjamín, aran Selá, sa' li na'ajej kimuqe'k wi' laj Kis, xyuwa' laj Saúl; ut ke'xb'aanu chixjunil li ke'chaq'rab'iik wi' xb'aan li awab'ej. Chirix chik a'an kiq'uno'k xch'ool li Yos rik'in li tenamit.

Laj David kiyalok rik'ineb' laj Filistea

(1 Kr 20,4-8)

15Eb' laj Filistea ke'ok wi' chik chi yalok rik'ineb' laj Israel. Toja' naq laj David koho rochb'eeneb' laj puub' chi yalok rik'ineb'. Ab'anan sa' junpaat kitawaak chi yalok. 16Jun li winq nim roq, aj Isbí xk'ab'a', ralal laj Nob, kixyal xkamsinkil laj David. Li raalal li ru'uj li xjutz' che', a'an wuqub' liib'r chi q'anch'iich', ut chi xsa' wank jun ak' ch'iich'. 17Ab'an laj Abisay, li xyum lix Sarbia, kol'elq chi xtenq'ankil laj David, kixtiq' laj Filistea ut kixkamsi. Toja' naq eb' li winq li wankeb' rochb'een laj David ke'xtz'aama ut ke'relaji naq ink'a' chik taaxik chirixeb' chi yalok, re naq ink'a' taachupq li xsaqenk Israel.#21,17 Li xsaqenk Israel a'an reetalil naq junelik wanq junaq ralal laj David li taa'awab'ejinq sa' xb'eeneb' laj Israel. Cf. 14,7; 1 R 11,36; 15,4; 2 R 8,19.

18Moqon chik kiwank wi' chik yalok aran Gob rik'ineb' laj Filistea, ut laj Sibekay aj Jusá kixkamsi laj Saf, jun reheb' laj Rafá. 19Kiwank jun chik yalok aran Gob rik'ineb' laj Filistea, ut laj Eljanán, ralal laj Yaír, Belén xtenamit, kixkamsi laj Goliat aj Gat. Li xche'el li xjutz' che' laj Goliat q'axal pim, kama' wi' x'aamayil li kemleb'.

20Kiwank wi' chik yalok aran Gat, ut aran kiwank jun li winq k'ajo' xnimal roq, wank waqitq ru'uj ruq' re li junjunq chi uq'mej ut waqitq ru'uj roq re li junjunq chi oqej, kaahib' xka'k'aal chixjunil. A'an ajwi' xkomoneb' laj Rafá. 21Kixhob'eb' laj Israel, ut kikamsiik xb'aan laj Jonatán, ralal laj Simá, ras laj David. 22Eb' li kaahib' a'in xkomoneb' laj Rafá aj Gat ut ke'kamsiik xb'aan laj David ut xb'aaneb' laj k'anjel chiru.

Currently Selected:

2 S 21: QQC

Highlight

Copy