2 S 11

Laj David ut lix Betsabé

1Sa' li chihab' jun chik, sa' li saq'ehil naq eb' li awab'ej neke'xik chi yalok, laj David kixtaqla laj Johab rochb'eeneb' li xjolomileb' laj puub' ut chixjunileb' laj Israel chi yalok. Ut ke'xq'ax ruheb' laj Amón, ke'xsut Rabá li xtenamiteb'; ab'an laj David kikanaak Jerusalén.#11,1 1 Kr 20,1.

2Sa' jun ewu naq kiwakliik chaq laj David sa' xwarib'aal ut yo chi b'eek sa' li xtaqeq'il li rochoch, toj aran taqe'q kiril chaq jun li ixq yo chi atink. K'ajo' xch'ina'usal li ixq a'an. 3Laj David kixtaqla xpatz'b'al ani li ixq a'an, ut kiyehe'k re: “A'an lix Betsabé, xrab'in laj Elián ut rixaqil laj Urías aj Hit”. 4Toja' naq laj David kixtaqlaheb' li xtaql re xk'amb'al li ixq. Naq kiwulak lix Betsabé, laj David kiwank rik'in; chirix chik a'an li ixq kisutq'iik sa' rochoch. Toje' xraqe'k chi xch'ajob'resinkil rib' chirix li xpuch'unik.

5Li ixq kikanaak sa' yu'am ut kixtaqla xyeeb'al re laj David: “Wankin sa' yu'am”. 6Toja' naq laj David kixtaqla xyeeb'al re laj Johab: “Taqla chaq we laj Urías laj Hit”. Ut laj Johab kixtaqla laj Urías rik'in laj David. 7Naq laj Urías kiwulak rik'in li awab'ej, a'in kixpatz' re chirix laj Johab, chirixeb' laj puub' ut chanru yo li yalok. 8Chirix chik a'an kixye re: “Ayu sa' laawochoch ut hilan kach'inaq”.

Laj Urías ki'elk aran ut laj David kixtaqla xmaatan, xkomon li tzekemq naxtzeka a'an. 9Ab'an laj Urías ink'a' koho sa' rochoch, kikanaak b'an chi wark chire rokeb'aal li rochoch li awab'ej, rochb'eeneb' laj k'aak'alenel re laj eechal re. 10Kiyehe'k resil re laj David: “Laj Urías moko xkoho ta sa' rochoch”.

Toja' naq laj David kixpatz' re: “Ma ink'a' tab'i' najt xatchalk chaq? K'a' naq ink'a' xkohat sa' laawochoch?”, chan. 11Kichaq'ok laj Urías ut kixye: “Li Loq'laj Kaax, eb' laj puub' aj Israel ut aj Judá wankeb' sa' kok' muheb'aal. Laj Johab laj eechal we ut eb' laj k'anjel chiru neke'hilank sa' ch'och'. Ma tinxik tab'i' laa'in sa' wochoch re wa'ak uk'ak ut re wank rik'in li wixaqil? Ninye li waatin naq maajoq'e tinb'aanu a'an!”, chan. 12Ab'an laj David kixye re: “Kanaaqat ajwi' hoon, ut wulaj tatxik”.

Jo'kan naq laj Urías toj kikanaak Jerusalén sa' li kutan a'an. 13Wulajaq chik laj David kixb'oq a'an chi wa'ak rik'in ut kixk'e ruk'a' toj reetal kixkaltesi. Ab'anan ewu naq ki'elk chaq laj Urías, ink'a' koho chi wark sa' rochoch, koxyoklaaq b'an rik'ineb' laj k'aak'alenel laj eechal re.

14Sa' li kutan jun chik laj David kixtz'iib'a jun xhu re laj Johab ut kix'ab'ena chirix laj Urías. 15A'an a'in li tz'iib'anb'il sa' li hu a'an: “K'ehomaq laj Urías chi uub'ej b'arwi' kaw li yalok, ut chirix chik a'an teekanab' xjunes re naq taatiq'e'q ut taakamq”.

16Jo'kan naq laj Johab naq ke'xsut li tenamit, kixk'e laj Urías sa' li na'ajej b'arwi' naxnaw wankeb' li jwal kaweb' rib' chi yalok. 17Naq eb' li wankeb' sa' li tenamit ke'elk chi yalok rik'in laj Johab, wankeb' ke'kamk sa' xyanqeb' li xjolomileb' laj puub' re laj David, ut sa' xyanqeb' a'an kikamk ajwi' laj Urías laj Hit.

18Tikto laj Johab kixtaqla xyeeb'al re laj David resilal li yalok, 19ut kixchaq'rab'i laj yehol esil chi jo'ka'in: “Naq akaq xatraqe'k chi aatinak chirix li yalok, 20mare taachalq xjosq'il li awab'ej ut tixye aawe: «K'a' naq xexjilok chi xk'atq li tenamit re yalok? Ma ink'a' nekenaw naq neke'kutuk chaq sa' xb'een li suttz'ak? 21Ani kikamsink re laj Abimélek, ralal laj Yerubahal? Ma ink'a' jultik eere naq jun li ixq li wank sa' xb'een li suttz'ak kixkut jun li ke'leb' pek sa' xb'een laj Abimélek ut kixkamsi aran Tebés?#11,21-22 Jue 9,53. K'a' naq xexjilok chi xk'atq li suttz'ak?», cha'aq laj David. Ut laa'at taaye re: «Xkamk ajwi' laj Urías aj Hit, aj k'anjel chawu», cha'qat re”.

22Koho laj esil ut koxye re laj David chixjunil li kiyehe'k re xb'aan laj Johab. K'ajo' naq kichalk xjosq'il laj David sa' xb'een laj Johab: “K'a' naq xexjilok chi xk'atq li suttz'ak chi yalok? Ani kikamsink re laj Abimélek, ralal laj Yerubahal? Ma ink'a' jultik eere naq jun li ixq li wank sa' xb'een li suttz'ak kixkut jun li ke'leb' pek sa' xb'een laj Abimélek ut kixkamsi aran Tebés? K'a' naq xexjilok chi xk'atq li suttz'ak?”, chan li awab'ej re laj esil.

23Ut a'in kixsume: “Q'axal kaweb' chik chiqu eb' li winq li xe'elk chaq chi yalok qik'in b'arwi' yamyo. Laa'o xe'qaanilasi toj sa' li rokeb'aal li tenamit, 24ab'anan eb' laj simaj xoohe'xkut chaq sa' xb'een li suttz'ak. Chi jo'kan wankeb' xe'kamk sa' xyanqeb' li xjolomileb' laj puub' re li awab'ej, ut sa' xyanqeb' a'an xkamk ajwi' laj Urías laj Hit”, chan.

25Toja' naq laj David kixye re laj esil: “Ye re laj Johab naq ink'a' taak'oxlaq chirix li xk'ulmank xb'aan naq jo'kan li yalok: sa' jun kutan nakamk junaq, ut sa' jun kutan chik ak jalan chik nakamk. Chixyal xq'e chi yalok wi' chik rik'in li tenamit toj reetal tixsach, ut laa'at k'e xkawub' li xch'ool”, chan laj David.

26Naq li rixaqil laj Urías kirab'i resil li xkamik li xb'eelom, kiraho'k sa' xch'ool ut kiyaab'ak chirix. 27Ab'anan naq kinume'k xq'ehil li rahil ch'oolej, laj David kixtaqla xk'amb'al ut kixk'ul sa' rochoch; kisumlaak ut kiwank ralal rik'in. Ab'anan li k'aru kixb'aanu laj David ink'a' kiwulak chiru li Qaawa'.

Currently Selected:

2 S 11: QQC

Highlight

Copy