2 S 10

Laj David kixq'ax ru eb' laj Amón ut eb' laj Aram

(1 Kr 19,1-19)

1Moqon chik kikamk li awab'ej re Amón ut a' chik laj Janún li ralal ki'ok chi awab'ejink. 2Toja' naq kixye laj David: “Twusila laj Janún, ralal laj Najás, jo' naq li xyuwa' kirusila wu laa'in”. Ut kixtaqlaheb' laj k'anjel chiru rik'in laj Janún re xk'ojob'ankil xch'ool chirix xkamik li xyuwa'. Ab'anan naq eb' laj k'anjel chiru laj David ke'wulak sa' xch'och'eb' laj Amón, 3eb' li xjolomileb' laj Amón ke'xye re laj Janún li x'awab'ejeb': “Ma xk'ojob'ankil tab'i' aach'ool chirix xkamik laayuwa' naq laj David xtaqlaheb' chaq li winq a'in? Re b'an xk'eeb'al reetal li qatenamit ut xsachb'al moqon naq xtaqlaheb' chaq arin”.

4Jo'kan naq laj Janún kixchapeb' laj k'anjel chiru laj David, kixset jun yiijach li xmacheb', kixq'ich li raq'eb' toj chi xko riteb' ut kixchaq'rab'iheb' chaq. 5Naq laj David kixnaw a'in, kixtaqlaheb' poyanam chi xk'ulb'aleb' xb'aan naq k'ajo' xxutaaneb'. Kixtaqla ajwi' xyeeb'al reheb' naq te'kanaaq Jerikó toj taachamo'q wi' chik li xmacheb'; toj aran te'sutq'iiq chaq.

6Naq eb' laj Amón ke'xk'e reetal naq xik' chik te'ile'q xb'aan laj David, ke'xtoj junmay mil (20,000) aj puub' aj Aram re Bet-Rejob ut re Sobá; jo'wi' lajeek'aal rox o'q'ob' (1,000) aj puub' re li awab'ej re Mahaká ut kab'laju mil (12,000) re li awab'ej re Tob. 7Ab'an laj David kirab'i resil a'in ut kixtaqla laj Johab rochb'eeneb' chixjunileb' laj puub' li yo'ooneb' chi yalok. 8Eb' laj Amón koheb' chi yalok ut ke'xtzolob' rib'eb' chire rokeb'aal li tenamit. Ut eb' laj Aram re Sobá ut re Rejob jo'wi' eb' laj puub' re Tob ut Mahaká ke'xk'e rib' sa' k'al. 9Naq laj Johab kiril naq taawanq yalok chiru ut chirix, kixsik' ruheb' li q'axal kaweb' rib' sa' xyanqeb' laj Israel ut kixk'eheb' chi tzol chiruheb' laj Aram. 10Chirix chik a'an kixk'e li xkomoneb' laj puub' chi jolomiik xb'aan laj Abisay li riitz'in ut kixtzolob'eb' chi yalok rik'ineb' laj Amón. 11Ut kixye re li riitz'in: “Wi taawil naq ink'a' tinkuy xsumenkileb' laj Aram, tulinaatenq'a; ut wi laa'at ink'a' taakuy xsumenkileb' laj Amón, laa'in tinxik chatenq'ankil. 12Kawaq aach'ool ut qayalaq qaq'e sa' xk'ab'a' li qatenamit ut sa' xk'ab'a'eb' li xtenamit li qaYos. Ut li Qaawa' taxaq tixb'aanu li k'aru us chiru”.

13Koho laj Johab rochb'eeneb' laj puub' chi yalok rik'ineb' laj Aram ut eb' a'in ke'elelik chiru. 14Naq eb' laj Amón ke'ril eb' laj Aram chi elelik, ke'elelik ajwi' eb' a'an chiru laj Abisay ut ke'ok sa' li xtenamiteb'. Toja' naq laj Johab kixkanab' yalok rik'ineb' laj Amón ut kisutq'iik wi' chik Jerusalén.

15Naq eb' laj Aram ke'ril naq ke'q'axe'k ru xb'aaneb' laj Israel, ke'xjunaji wi' chik rib'. 16Laj Hadadéser kixtaqla xsik'b'aleb' laj Aram li wankeb' junpak'al li nima' Éwfrates. Ut eb' a'in ke'wulak aran Jelán: laj Sobak, xjolomileb' laj puub' re laj Hadadéser, yo chi k'amok chaq xb'eheb'. 17Kiyehe'k resil re laj David, li kixch'utub' chixjunileb' laj Israel, kinume'k junpak'al li nima' Jordán ut kiwulak Jelán. Aran eb' laj Aram ke'xxaqab' rib' chiru laj David ut ke'ok chi yalok. 18Ab'anan eb' laj Aram ke'elelik chiruheb' laj Israel, ut laj David kixsacheb' o'lajuk'aal xkab' o'q'ob' (700) chi b'eleb'aal ch'iich' ut ka'k'aal mil (40,000) chi winq xkomoneb' li neke'b'eek chirix kawaay. Kixtiq' ajwi' laj Sobak, xjolomileb' laj puub', li kikamk sa' li na'ajej a'an. 19Naq chixjunileb' li awab'ej li neke'tenq'ank re laj Hadadéser ke'ril naq ke'q'axe'k ru xb'aaneb' laj Israel, ke'xk'e rib' sa' tuqtuukil usilal rik'ineb' ut ke'kanaak rub'el xwankileb'. Ut eb' laj Aram ink'a' chik ke'chalk xch'ool chi xtenq'ankileb' laj Amón.

Currently Selected:

2 S 10: QQC

Highlight

Copy