Miq 3
3
N'olhämet tä tatayhlä häp niyatey tä ni'isahen
1Ch'ahuyay n'oye, Israel lhayis kaniyatey,
lhäy'e nilhokej iyhäj tä t'uye Israel lhayis.
¿Hä ka'amela tä t'uhawetej
chik letäfwelej m'ak tä is alhoho?
2Amel len'äyiho m'ak tä is
wet lehumin m'ak tä ni'isa.
Hätet iwoyek let'ohekwethä oka wichi,
wet lhäm nofwchehen lhiley tä lelanche t'isanis.
3Hätet iwoyek letufwen iläyej oka wichi,
lelanche t'ähes wet lenäksen lhiley.
Letech'aynej chik häpe itshäwet
tä n'olhataj lhiskat.
4Ifwala chik häpe wet amel let'änlach'oye Lhawuk,
mat tek nichulhla amhohen.
Häp m'ak tä ni'isa tä amel lewoye,
häp tä tamenej tä weskatla ahilähen.
N'olhämet tä tatayhlä häp profetas tä lhämtes kamatachehen
5Oka wichi wetahenpej,
häp tä tach'ahuye profetas tä akantses.
Iyhäj tä tische,
häp lhamelna yämeje letamsek,
wet iyhäj tä niwoya m'ak chik hiw'enho,
häp tä yämeje n'oka'tshayaj.
Wet häp tä Lhawuk tahuyej
häp profetasna wet yok:
6“Nemla iche haw'enhay chik honatsi.
Nemla lefwenho wichi m'ak chik ihichela,
tsi honataj tä hip'ohla atapehen.
Ifwala weskatla ahilähen
wet honatsi ihla atapehen.
7Häp wichi tä lew'enhay ihi,
lhäy'e han'ältshantses,
n'äfwelhihena, õ'läkwhilawethä lhamel,
tsi ihanhiyejt'a m'ak tä tälhe Dios.”
8Mat olham tapo n'oyej
Lhawuk laka Espíritu lakhajyhayaj,
lhäy'e häp m'ak tä matche,
lhäy'e tä hiw'en n'oho tä ot'otle t'un,
häpkhilek ofwenho Israel lhayis
m'ak tä ni'isa tä iwoye,
lhäy'e lech'isukyajay.
Õ'wasthihila häp Jerusalén
9Ch'ahuyay n'oye, Israel lhayis kaniyatey,
lhäy'e nilhokej iyhäj tä t'uye Israel lhayis,
amel tä len'äyiho m'ak tä is,
wet lhen häpeya m'ak tä ni'isa
häp m'ak tä is alhoho.
10Lhenaychelhi hupuy tä isis tä ihi Jerusalén,
mat lewoyeje m'ak tä ni'isa wichi, lelänhen.
11N'okalelhthayajwos hits'ilkat
elh tä tis tä lhamel tach'ote.
Wet sacerdotes chinaj t'äj
tä tamenej tä iwo chufwenyaja.
Wet profetas äpte häp tä tamenej
tä lhayen han'ältshantsesa.#Isa 1.23; Jer 6.13
Wet fwetaj Lhawuk tä tach'ote,
wet yok, “Lhawuk in'amejen.
Wohit'ala m'ak chik ni'isa chik n'ailänhen.”
12Lhek tetshan m'ak tä oyäme:
Amel tä letamenej tä Jerusalén wasihila.
Õ'känchihla hupuy tä ihi,
wet häpkhila honhat tä õ'saji,
wet chenaj tä Lhawuk Lew'et ihi häpkhila tayhi.
Currently Selected:
Miq 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
