Miq 4
4
Wichi letamsek tä laj lepesa
(Isa 2.2-4)
1Häp ifwalas tä ilepese,
häp chenaj tä Lhawuk Lew'et i'pe
häpkhila chenaj tä inu'pe
nilhokej chenhas tä atoschephä,
wet õyenla häpeya chenhas laka niyat.
Wet nilhokhiyeja wichi tä i'pe honhat nämhiyela.
2Wujla'pe wichi tä yohlak,
“Mäh n'ekhen,
n'ahoye Lhawuk laka chenaj,
häp Jacob laka Dios Lew'et,
häpkhilek lham tä ichufwenla n'amejen lhämtes
yämthilek y'awoye t'at.”
Tsi Lhawuk lechufwenyaj tälhiyela Sión,
wet lhämtes tälhihola Jerusalén.
3Lhawuk itetshanhila m'ak tä iyej
wichi tä i'pe honhat tä takhajayhen,
wet isyenla alhoho.
Wet lhamel lefwajnhates yenla häpeya
lechumetcha tä isajeji lakäsw'et,
wet lehunis yenla häpeya
lechumetcha tä yistejen hup.
Nemla iche wichi chik
tachumhiyela laka'tshayajchal
yämthilek ilänejen iyhäj,
wet nemla lhaichufwenejen n'oka'tshayaj lakey.
4Nilhokhiyeja wichi letamsekis ihi,
tatayhiphälachufwi lechumet uva lhile lehupel
lhäy'e higo lhile lehupel,
wet nemla lenowayhyaj ihi.
Lhawuk tä laj letumfwaya,
lham tä lhämet täjtso.
5Wichi iyhäj ihänlhi t'at laka dios lhayis.
Mat n'amel wet y'ahänhilhila Lhawuk Dios
yämlek tiyäj'attsiy.
Lhawuk ifwayhthila laka wichi
6Lhawuk yok:
“Nichäthiyela ifwala tä ohutlawek
oka wichinaj olhaklitwethä
wet otiyej lewit'äyhyaj
tä ochene honhat tä kalew'eta.
7Otchumhiyela lhamel tä imälhehi
wet oyenla häpeya wichi tä takhajay.
Olham tä ohäpe Lewuk Dios
olhayenla laka Niyata tä oihi chenaj Sión,
tälhe ifwalatso wet yämlek tiyäj'attsiy.
8Wet am, Jerusalén, tä ahäpe honhat
tä olham oyen ow'eta yämthilek ot'uye oka wichi,
yachajihola tä ahäpe hupuy tä oniyatyaj ihi,
mälhyej iwoye ifwalas tä pajche.”
9¿Chipte tä let'änlhi,
atet häp atsinha tä iwo lhäsa?
¿Hä häp tä lew'enhit'a rey?
¿Wet y'inhen iyhäj tä aichufwenlhi?
10Jerusalén lheley,
ats'ulhkatejche tä let'änwethä,
atet häp atsinha tä takaw'ahan.
Tsi häp tä lhekhihena
wet nech'e w'et lhehla'pehentso,
pajla'tha lechäte honhat tä Babilonia.
Mat chik lhehi honhattso,
Lhawuk t'at tä ifwayhthila amejen atayhfwas.
Jerusalén ikalhihila letayhfwas
11Athana wet wujpey wichi tä ihiche honhatil
tä lhaihutchewek tä t'uhläk tatay ahilä.
Lhamel yok:
“¡Is chik n'en lhaläkwika häp Jerusalén,
häpkhilek n'akäsejwethä chik y'akänchi!”
12Mat wichina ihanhiyejt'a Lhawuk letichunhayajay
lhäy'e m'ak tä iwaklhat tä iwohiyejela.
Lhamel ihanhiyejt'a tä Lhawuk ihutwek häpkhilek itasin,
tehlat iwoye tä õ'saphi trigo.
13¡Nechephä, Jerusalén lheley, wet sapkanhen!
Tsi häp tä Lhawuk yok:
“Ow'enla amhohen akhajyhayaj tä tet iwoye tolo
tä lech'ul chinhas wet lefwus t'ähes bronce,
häpkhilek lewasthiche wujpey wichi.
Lesohiyeja lakäywet tä ikalheji laka'tshayaj tä iwoye,
wet lhenla amajcheta n'oyej
tä ohäpe Awuk tä nilhokej honhat Lewuk.”
Currently Selected:
Miq 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
