Mat 9
9
Jesús ichesat k'efwitas länek
(Mar 2.1-12; Luc 5.17-26)
1Wet Jesús tiyäjo chalana wet hap'alakpe lewomek, wet nichäte hupuy tä lew'et. 2Wet iyhäj ihäne hin'o tä k'efwitas länek tä i'pe lehowet. Wet tä Jesús hiw'en lhamel t'ekhahyaj, tahuyej häp k'efwitas länek wet yok:
–¡Yäs, akhajyen! Tatäy amej asukyajay.
3Wet häp elhpej hin'ol tä lhayen lewosayej Ley p'ante tälhe Moisés, tä lhamel iläte Jesús tä iwoyetso, wet letichunhayaj yok, “¡Häp hin'otsi lhämtes iläkwlhi Dios!” 4Mat Jesús nitäfwelej letichunhayaj wet yok:
–¿Chipte tä ni'isa m'ak tä ihi amel ahusey? 5¿Atsi m'ak tä lhäy'e lhip tä ni'thaya? ¿Häpe p'iya tä oyok, “Tatäy amej asukyajay”, wok häp chik oyok, “Nephä, w'eleklhi”? 6Lhek yahinya, opäyen amehen häpkhilek lehanej tä Hin'o Lhäs len'ohyaj ihi tä ihonhatena yämlek itäyhthen wichi lesukyajay.
Wet nech'e tahuyej k'efwitas länek wet yok:
–Nephä, chuma ahowet, mäh äple haw'et.
7Wet hin'o nephä wet yäpil. 8Tä wichi hiw'en, inuhat lhamhohen, wet iwunit Dios tä hiw'enho hin'ol yämlek ikalhi tä yenlhi m'ayhay tä mälhyeja.
Jesús t'äne Mateo
(Mar 2.13-17; Luc 5.27-32)
9Jesús yikch'oye täjtso wet hiw'en hin'o tä lhey Mateo, lham tatayphä tä ihi lew'et tä ihutpejwek impuestos laha tä niyatey Romano lhayis t'alhpe. Wet Jesús tahuyej tä yok:
–Ache n'okwe.
Tä Mateo iläte, nephä wet yikche.
10Tä paj Jesús lhäy'e lechufwenkay t'ekhen tä ihi Mateo lew'et. Wet nämhen wujpe iyhäj hin'ol tä impuesto lewos lhäy'e wichi tä õyämejwethä tä ni'isahen, wet lhamel tachufwiyej. 11Tä Fariseo lhayis hiw'en, tay'ätshane Jesús lechufwenkay tä yok:
–¿Chipte tä awuk tachufwiyej häp impuesto lewos lhäy'e iyhäj tä ni'isahen tä t'ekhen?#Luc 15.1-2
12Mat tä Jesús iläte, wet yok:
–Häp wichi tä t'inhayaj länhay, häp tä iwatlä kachawo. Iyhäj tä newache t'inhayaj tek iwatlä. 13Mäyay wet achufwenej m'ak tä häpe Dios lhämet p'ante yok:
“A'enay hap'altsentsesa, häp tä owatlä.
Tek owatlä itshätäy tä lelänhen
tä lhen han'okhayaja n'oyej.”#Oseas 6.6
Olham tä onek, onekhiyet'a lhamel tä isen, mat oneke iyhäj tä ni'isahen.
“¿Chipte tä achufwenkay lhaknichuyhatahen?”
(Mar 2.18-22; Luc 5.33-39)
14Häp Juan Bautista lechufwenkay ihoye Jesús wet tay'ätshane tä yok:
–¿Chipte tä am achufwenkay lhaknichuyhatahen? Tsi olhamel lhäy'e Fariseo lhayis wuj tä owoyepej täjtso.
15Jesús nichulho wet yok:
–¿Chiwoye wichi tä ihoye elh tä tawhayey tä iwo lakäjyaja? ¿Hä is chik iwo lefwitajayaja tä hin'o tä whayenaj kamaj iyej lhamel? ¡Kha! Mat nichäthiyela ifwala tä õ'soyej lhamel häp whayenaj, nech'e häpkhilek lhaichuyhathen.
16“Nehit katsik itseklhi lew'uy wumek wet hip'oyeji wesaj lhip tä nech'ayek. Tsi lep'ot tä nech'ayek yäpnho wet itonhi, wet nem koyhyaj tä wasi lew'uy. 17Häte õ'tsäyhihot'a hat'es tä nech'ayek häp tsänt'äj tä lewumek. Tsi chik y'ohi hat'es, ipofwohila wet itsäy hat'es lhäy'e lehi tatäy. Tä mälhyejtso, is chik õ'tsäyho hat'es tä nech'ayek häp lehi tä nech'ayek, häpkhilek newache lewit'äyhyaj.”
Jairo lhäse. Lhäy'e atsinha tä itsok Jesús lew'uy
(Mar 5.21-43; Luc 8.40-56)
18Tä kamaj Jesús yämlhi, näm hin'o tä len'ohyaj ihi wet takhoschufwi wet yok:
–Olhäse nech'e tä y'il. Mat ache n'okwe wet tila'pe akwey, wet iläyhla.
19Tä Jesús iläte, nephä wet yikche, lhäy'e lechufwenkay. 20Tä yik, wet iche atsinha tä t'inhayaj ihi, w'oytaj tä ilänpej, wet ichespej, mat yachajopej, pajtha doce nekchämes tä mälhyejpejtso. Wet lham iho w'echehi Jesús wet itsok lew'uy lhip, 21tsi letichunhayaj yok, “Tejlak lew'uy lhip chik okatej, ochesla.” 22Wet Jesús nitilhakhi wet hiw'en atsinha, wet tahuyej tä yok:
–¡Yäse, akhajyen! Ekhahyaj tä aichesat.
Häpet tä iwoyetso, atsinha iches t'at.
23Tä Jesús tujlhache len'äyij, nichäte hin'o tä len'ohyaj ihi lew'et, wet hiw'en wichi tä iwo huyaja tä tafwchehchä lhäy'e hin'ol tä iwo lefwolisa tä iyej lhamel. 24Wet ifwenho tä yok:
–¡Mäch'oye! Lhutsha y'inhit'a, imäfwaj t'at.
Tä lhamel iläte, ischeyejen. 25Mat õ'chen alhoye lhamel, wet Jesús ihoho hupch'o tä lhutsha ihi, wet tachuma takwey, wet lhutsha nephä.
26Wet m'ak tä Jesús iwoyetso, letoyaj y'ajpe nilhok honhattso.
Jesús hiw'enyenche honhat asnamis
27Tä Jesús yikch'oye täja, iche täkwfwas hin'ol tä asnamis tä ihän len'äyij wet t'änhen tä yok:
–¡David Lhäs, p'altsen n'ohen!
28Wet tä Jesús tiyäjchufwi hup, lhamel ihoye, wet Jesús tay'ätshane wet yok:
–¿Hä lechayaye tä ohanej owoyneje yämthilek oaiw'enyenche honhat?
Lhamel nichulho wet yok:
–Ey'a, Iwuk.
29Wet Jesús ichumpe lhamel letelhoy wet yok:
–Is tä i'amejen mälhyej tä lechayaye.
30Wet lhamel nech'e hiw'enche honhat. Mat Jesús yäm äytajejche lhämet tä iwoyeje lhamel wet yok:
–Yej fwenhola elh chik häpe.
31Matkat häpet tä lhamel inukwephä tä tälhchufwi hup, y'ajthi wichi tä nilhokpe honhattso häp m'ak tä Jesús iwoyeje.
Jesús ichesat isuk tä ahät länek
32Tä lhamel yikhen, wichi ihäne Jesús häp hin'o tä isuk tä ahät länek. 33Wet Jesús inuhatphä ahät wet hin'o nech'e tahuy. Wet wichi wuj tä iseltejen wet yok:
–¡Tälhe fwalas tä pajche ihichet'a m'ak tä mälhyeja tä ihi Israel!
34Mat häp Fariseo lhayis yok:
–Ahät lhayis kaniyat, häp tä hiw'enho lakhajyhayaj yämthilek inuhatchephä lhamel.#Mat 10.25; 12.24
Jesús hip'altsen wichi
35Jesús ilunche nilhokej hupuy lhäy'e wichi lew'etesas tä iwo lechufwenyaja tä ihiche lhamel laka n'ohusew'etes. Yen lhämeta Dios Silätyaj tä Is tä häpe Leniyatyaj, wet isoyej wichi nilhokej t'inhayajay lhäy'e m'ak at chik häpek lewit'äyhyaj, wet ichesen. 36Tä iyahin wichi, wet yok:
–Matche tä p'elitses.
Tsi hätet iwoye tson'atas tä laj lewoya, nikalelhäja len'äyij wet lajit lakhajyhayaja. 37Tä mälhyejtso, tahuyej lechufwenkay wet yok:
–Wuj yachuyaj chik õ'lanhi, mat nitäkwit'a chumhas. 38Häp tä tamenej, alhaye yachuyaj Lewuk yämthilek ichen lewos tä ilanhi.
Currently Selected:
Mat 9: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
