Mat 8

Jesús ichesat amostas länek

(Mar 1.40-45; Luc 5.12-16)

1Tä Jesús näm tä tälhpe chenaj, wujpey wichi tä yikche. 2Wet näm hin'o tä amostas länek, wet takhoschufwi wet yok:

–Iwuk, che lewoye, lehanej lewoyneje che letäyhat n'oyej ot'inhayaj.

3Tä Jesús iläte, wet tachumpe wet yok:

–Owoye. Otäyhat amej.

Häpet tä mälhyejtso, tatäy amostas wet hin'o iches.

4Wet Jesús ifwenho tä yok:

–Lhek yahinya, yej fwenhola elh che häpe. Mat apäynela häp sacerdote wet chäje m'ak che lhen t'awayhata Dios, häp achesyaj tä tamenej, mälhyej tä Moisés p'ante ne'tek õ'woye,#Lev 14.1-32 häpkhilek nilhokej wichi ihanej tä noj anhayaj.

Jesús ichesat sip'äl kaniyat lakawo

(Luc 7.1-10)

5Wet Jesús nichätho hupuy tä Capernaum, wet iche hin'o tä häpe Romano lhayis kasip'äl kaniyat tä ihoye wet lhaip'altsene tä yok:

6–Iwuk, okawo imä katsi, k'efwitas tä ilän, wet lhäy'e lhip tä äytaj t'isan.

7Tä Jesús iläte, wet yok:

–Ohohiyela wet ochesthila.

8Mat sip'äl kaniyat yok:

–Iwuk, ot'uhawethiyejt'a che lehochufwi owukwe. Mat woye ämet wet okawo ichesla t'at. 9Tsi olham häte oka niyatey ihi wet oyen at owuka lhamel, wet oka sip'äl in'oyej wet lhamel yen'atn'o lewuka. Che ofwenho elh lhamel tä oyok, “Mäh”, yik t'at, wok oyok, “Lhuu”, nek t'at, wok otahuyej okawo tä oyok, “Enlhi täja”, yenlhi t'at.

10Tä Jesús iläte, wuj tä iseltej. Wet tahuyej wichi tä yikche wet yok:

–Matche tä ofwen amhohen, Tej tä Israel lhayis, mat ow'enhit'a elh che häte iwoye hin'otso tä wuj t'ekhahyaj. 11Wet oyok, wujla'pe wichi tä ihi tä fwala tälhche lhäy'e tä fwala y'uy, nekhila wet tachufwihiyeja Abraham lhäy'e Isaac lhäy'e Jacob tä t'ekhen tä ihi Dios Niyatyaj. 12Mat häp wichi tä ichun p'ante tä Dios t'uhläk itihi Leniyatyaj, lham ithathiyela honataj tä alhoye, häpkhilek ihi lhafwyhayaj wet wuj tä äytaj.

13Wet nech'e Jesús ifwenho sip'äl kaniyat wet yok:

–Mäh äpil haw'ete. Tä let'ekha n'oye mälhyej tä lhämetso, iches t'at akawo.

Häpet tä iwoyetso, wet sip'äl kaniyat lakawo iches t'at.

Jesús ichesat Pedro lech'efwa ko

(Mar 1.29-31; Luc 4.38-39)

14Wet Jesús ihoye Pedro lew'et, wet hiw'en Pedro lech'efwa ko tä imä katsi, t'äj chayo. 15Wet tachumpe takwey wet tatäy tä chayo t'äj. Wet atsinha nephä wet yenlhi Jesús lhäk.

Jesús ichesthen wujpe t'inhayaj länhay

(Mar 1.32-34; Luc 4.40-41)

16Tä honaj wichi ihäne Jesús wujpe iyhäj tä ahät länhay, wet lham tahuyehen ahät lhayis wet lhamel inukwephä. Wet ichesthen nilhokej t'inhayaj länhay. 17Wet mälhyejtso tä lhayäm matche profeta Isaías lhämet p'ante yok:

“Lham tä tilhäj n'amel lhateläythayajay,

wet lhaitumtejlä m'ak tä äytaj tä n'ailänhen.”#Isa 53.4

Lhamel tä t'uhläk yikche Jesús

(Luc 9.57-62)

18Tä Jesús hiw'en tä wujpey wichi tä lhaihutej, ifwenho lechufwenkay wet yok:

–Mäh n'aho lewomek lhip elhe.

19Wet elh hin'ol tä lhayen lewosayej Ley p'ante tälhe Moisés, ihoye wet yok:

–Maestro, oyikhila amche, honhat at che häpe che lehoye.

20Jesús nichulho wet yok:

–M'awo lhayis lhokwe ihi, wet afwenchey lhupis ihi t'at. Mat häp Hin'o Lhäs lew'et ihihit'a yämlek lhay'up'at che imä.

21Wet elh hin'o, tä häpe lechufwenek, tahuyej wet yok:

–Iwuk, ch'anlha aj n'oye tä ochunkat tä oyäpil wet otjänch'oye ojcha lep'itsek.

22Mat Jesús nichulho wet yok:

–Tejtsi, nek n'okwe. Ch'anlhaye tä lhamel tä häpe lep'itseyhay tajänch'oye iyhäj tä y'inhen.

Jesús ikasthayen ihwok lhäy'e inät tä iwo lhetheya

(Mar 4.35-41; Luc 8.22-25)

23Wet Jesús tiyäjo chalana wet lechufwenkay yikche. 24Tä inukwe lewomekitaj, näm ihwokwetaj tä äytaji wet iwo lhetheya inät yäk tatäy lhimphaj wet y'uyhchä lehi. Mat Jesús imä t'at. 25Wet lechufwenkay ihoye tä hin'omhatlhi wet yok:

–¡Iwuk, fwayhat n'amejen tä y'ach'ahen!

26Mat lham nichulho wet yok:

–¿Chipte tä lenowayay? Ahäpehen hin'ol tä lhimphaj lechayaj.

Wet nephä wet ifwone ihwok lhäy'e inät, wet wuj tä iwo letamseka. 27Tä lhamel hiw'en, wuj tä iseltejen wet yok:

–¿Atsi hin'o tä häpe täja? ¡Tsi y'aje ihwokwetas lhäy'e lewomek tä iwoye lhämet!

Jesús ichesthen welantas länhay tä ihi Gadara

(Mar 5.1-20; Luc 8.26-39)

28Tä Jesús nichät lewomek lhip elhe, häp honhat tä lhey Gadara, wet iche täkwfwas hin'ol tä welantas länhay tä ihoye tä tälhe n'op'itseyhayw'etes. Lhäy'e lhip tä fwitses lhamel wet nehit katsik ihanej che inukwe n'äyijtso. 29Tä lhamel nichäte Jesús, wet t'änhen tä yok:

–Dios Lhäs, ¿chipte tä katach'anlhaya n'oyehen? ¿Hä lenäm kana yämlek lewit'äyen n'ohen tä kamaj nichätaye lewhäy?

30Iche wujpe kutsi lhayis tä tott'aho p'ante tä t'ekwethä. 31Wet ahät lhayis lhaip'altsene Jesús tä yok:

–Che lenuhatphä olhamel, chen n'oyehen kutsi lhayis l'ini yämlek otiyäjo.

32Wet lham yok:

–¡Mähen!

Wet ahät lhayis inukwephä, tiyäjomche kutsi lhayis, wet nilhokej lhamelna inukwe alhoho tä tälhpe tä nistakchä, yäk nichätho lewomek wet hich'ahen.

33Wet häp hin'ol tä t'uyehen kutsi lhayis, tä lhamel hiw'en tä mälhyejtso, nowayhen wet inukwe alhoho. Tä nichäte hupuy, ifwenhomche wichi nilhokej m'ayhayna lhäy'e m'ak tä iyej welantas länhay. 34Wet nilhokej wichi yikhen tä ihoye Jesús. Tä hiw'en, wet yok:

–Olhaip'altsen ame, ¡mäch'oye oka honhatna!

Currently Selected:

Mat 8: WCHB

Highlight

Copy