Luc 4
4
Ahättaj yelhte Jesús
(Mat 4.1-11; Mar 1.12-13)
1Espíritu tä Dios T'amajchet tapoyej Jesús, wet lham tapil tä tälhe tewok tä Jordán wet nech'e Espíritu ihänho ts'anis. 2Wet lham ihi t'at pajtha cuarenta ifwalas, wet ahättaj yelhte. Niwohit m'ak chik tufw häp ifwalastso, wet tä lepese iläte tä ichuyu. 3Wet ahättaj tahuyej tä yok:
–Chik ahäpe Dios Lhäs, lhek ahuye tunte l'itsi häpkhilek lhaiwelanhat pana.
4Mat Jesús nichulho wet yok:
–Iche Dios lhämet tä ihi Lehi tä yok,
“Tek ts'ilak pan tä iläyit hin'o.”#Deut 8.3
5Wet nech'e ahättaj itihi tä atojphä wet yofwajkwet ipäyne nilhokej honhatil. 6Wet yok:
–Olham ow'enla amho nilhokej n'oniyatyajayna, lhäy'e lewujyajay. Tsi õhw'ente n'oho, wet ow'enhihola elh chik häpe chik olham ot'uhläk ow'enho. 7Chik letakhos ochufwi wet len'okwi n'oyej, alewukla nilhokej tähesna.
8Mat Jesús nichulho wet yok:
–Dios lhämet ihi Lehi tä ifwenho wichi tä yok,
“N'okwiyej Awuk Dios,
wet ts'ilkat lham tä lewujyen.”#Deut 6.13
9Tä tajyäme täjtso, ahättaj ihäne hupuy tä Jerusalén wet ihänpe Dios Lew'et lhip tä atojphä. Wet tahuyej wet yok:
–Chik ahäpe Dios Lhäs, lhek athat honhate. 10Tsi Dios lhämet ihi Lehi tä yok,
“Dios ne'tehlak laka ángeles
t'u ame wet t'amaj amej.
11Lhehla'pe takweyey häpkhilek
kachäta'pe tunte chik häpe
wet laj awit'äyhyaja.”#Sal 91.11-12
12Mat Jesús nichulho wet yok:
–Häte iche Dios lhämet tä ihi Lehi tä ifwenho wichi tä yok,
“Yej lhelhte Awuk Dios.”#Deut 6.16
13Tä ahättaj ileyej nilhokej lhelhtshayajay, wet yikch'oye ayej.
Tä Jesús ihi p'ante Galilea, häp tä nech'e iwo tesa lechumet
(Mat 4.12-17; Mar 1.14-15)
14Espíritu tä Dios T'amajchet lakhajyhayaj tapoyej Jesús tä yäple Galilea, wet nilhokej wichi tä ihi honhates tä tott'aho, lhamel itoyench'oye häp lham. 15Lham ichufwenpej wichi tä ihiche n'ohusew'etes, wet nilhokej lhamel itiyej lewujyaj.
Jesús ihoye Nazaret mat wichi itihit'a lhamhi
(Mat 13.53-58; Mar 6.1-6)
16Jesús yäple p'ante Nazaret, häp honhat tä lew'etya, wet ifwala tä n'ot'elakw'et ihoye n'ohusew'et, mälhyej lakeypej. Wet nephä, takasit yämlek yahyen Dios lhämet tä ihi Lehi, 17wet õhw'enho profeta Isaías lhämet lehi. Tä hich'enhi, hiw'en lhip tä yok:
18“Häp Lhawuk laka Espíritu in'o'pe,
tsi lham yenn'o t'amajcheta
häpkhilek oyen lhämetayej wichi tä p'elitses
häp Dios Silätyaj tä Is.
Ichenn'o yämlek owo silätayej
lhamel tä n'okwenkay häp lefwayhyaj,
wet ow'enyenchehen honhat häp asnamis,
wet ofwayhthen lhamel tä n'och'atkanyaj itiyej,
19wet owo silätayej wichi
tä näm lewhäy tä Lhawuk ihoye
wet itiyej lakäpfwayaj tä is.”#Isa 61.1-2
20Tä Jesús ileyej tä yahyen, ikäfwelche wet hiw'enho elh tä lewo, wet lham yachajo tä tatayphä. Wet nilhokej wichi tä ihi n'ohusew'et lhamel iyahin t'at. 21Wet nech'e lham yok:
–Häp fwalana lhayäm matche Lhawuk lhämetne lelätaye.
22Wet nilhokej wichi yopejkwe:
–Häp tä is hin'oni.
Wet wuj tä iseltejen tä iläte lhämtes tä isis, wet äp yok:
–¿Hä kahäpeya José lhäs?
23Wet Jesús yok:
–Ohanej tä amel lekatyenej n'ohlä häp n'olhämet tä õyopej, “Kachawo, lhek achesat.” Wet häte lhoyayhlakwe, “Häp m'ak tä olhamel otoynej ame tä lhenhilhi Capernaum, häte enhilhi honhat tä haw'etna.”
24Wet Jesús tujlhache tä yok:
–Matche tä ofwel amhohen, Häp profeta chik ihi honhat tä lew'et wichi yen w'et m'ayeka. 25Lhek tetshanay olhämet, tichunache fwalas p'ante profeta Elías ihi. Tek iwomchä tres nekchämes lhäy'e seis wel'as, wuj p'ante nehläs tä nilhokpe honhat. Wet wujpe p'ante atsinhay tä tesalis tä ihi Israel, 26mat Dios ichenhiyet'a Elías lhamel. Tajlhama tä ichene tesa tä lew'et Sarepta, hupuy tä tott'aho Sidón, ihi honhat elh.#1~Rey 17.1,8-16 27Häte fwalas p'ante profeta Eliseo ihi, wujpe amostas länhay tä ihi Israel. Mat niwohit elh lhamel chik ikatej lechesyaj, tajlhama p'ante Naamán, hin'o tä lew'et honhat tä Siria.#2~Rey 5.1-14
28Tä wichi tä ihi n'ohusew'et iläte täjtso, nilhokej lhamel wuj tä tawäkwäyhen. 29Wet lhamel nechephä wet ichuma Jesús, wet ihut alhoye tä ihi hupuy, wet ihänpe chenaj tä hupuy i'pe, t'uhläk itälhetpe yämlek ithat lech'oye. 30Matkat lham inukwe lechowej lhamel wet yikch'oye.
Hin'o tä ahät ihi
(Mar 1.21-28)
31Jesús ihoye Capernaum, häp hupuy tä ihi Galilea, wet ifwala tä n'ot'elakw'et ichufwenhen wichi. 32Wet lhamel wuj tä iseltejen tä iläte lechufwenyaj tä iwoye, tsi matche tä len'ohyaj ihi.
33Wet iche hin'o tä ahät ihi tä iyej iyhäj tä ihi n'ohusew'et. Wet lham ifwitsenej tä t'än wet yok:
34–¡Jesús tä Nazaret lhele, yej yatchen n'ohen! ¿Chipte tä alenuhtho olhamel? ¿Hä lenäm yämlek letäyhat olhamel? ¡Olham ontäfwel amej tä ahäpe Dios T'amajchet!
35Mat Jesús ifwone wet yok:
–¡Wo tamseka, mäch'oye hin'otsi!
Wet ahät ithat katsi hin'o tä ihi wichi lechowej wet inuphä. Mat lewit'äy ihihit'a hin'o. 36Wet nilhokej wichi tä hiw'enej täjtso, inuhat lhamhohen wet yopejkwe:
–¿Atsi n'olhämtes tä häpe? Tsi hin'ona wuj tä len'ohyaj ihi wet khajay, wet tahuye ahät lhayis tä ne'tek inukwephä, ¡wet inukwephä t'at!
37Wet Jesús letoyaj y'ajpe nilhok honhattso.
Jesús ichesat Simón Pedro lech'efwa ko
(Mat 8.14-15; Mar 1.29-31)
38Wet Jesús yikch'oye n'ohusew'et wet ihoye Simón lew'et. Wet Simón lech'efwa ko wuj tä t'äj chayo, wet lhamel lhaip'altsene Jesús yämlek hich'ote. 39Wet lham ihoye wet t'upeyejchä tä iyahin. Wet ne'tek teläj ileyej, wet noj tä chayo t'äj wet iches. Häpet tä mälhyejtso, wet atsinha nephä wet yenlhi lhamel lhäk.
Jesús ichesthen wujpe t'inhayaj länhay
(Mat 8.16-17; Mar 1.32-34)
40Tä ifwala y'uy, nilhokej wichi ihäne häp iyhäj tä t'inhayaj w'enhahiche tä ilänhen, wet Jesús iti'pe takweyey elh weihalhapej lhamel wet ichesthen. 41Häte wujpe wichi tä ahät lhayis tälhomche. Tä inukwephä, wet t'änhen tä yok:
–¡Ahäpe Dios Lhäs!
Mat Jesús ifwone ahät lhayis, iwahnhiyejt'a tä yämwethä, tsi lhamel ihanej tä lham häpe t'at N'ofwayhthi tä Dios Chenek.
Jesús iwopej lhämeta tä ihiche n'ohusew'etes
(Mar 1.35-39)
42Tä nech'e fwamlafwaj Jesús yikch'oye hupuy wet ihoye lhip tä laj wichiyahi. Mat wichi t'ukwe t'at, tä nilhoke wet t'uhläk n'äyejo chik yik, yok:
–Wo aj haw'eta n'oyejen.
43Mat lham yok:
–Kha. Tsi is tä owo silätayej wichi tä ihiche lew'etes iyhäj häp Dios Silätyaj tä Is tä yäme Leniyatyaj. Tsi häp täjtso tä õ'chen n'oye.
44Wet häp tä mälhyejtso, Jesús yik wet iwo siläta Dios lhämet tä ihiche n'ohusew'etes tä nilhokpe honhat.
Currently Selected:
Luc 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
