Luc 13

“Chik amel kawoya ahusey iyhäja, let'inhihena”

1Häp ifwalastso iche iyhäj tä ifwenho Jesús tä yok:

–Ichen'aj hin'ol iyhäj tä Galilea lheley tä ilänhen itshätäy tä yen n'okhayajayej Dios. Wet gobernador Pilato ne'ten'aj chik õ'länhen lhameltso wet lew'oyis õ'kasoyej itshätäy tä lhamel ilänhen lew'oyis.

2Jesús nichulho wet yok:

–¿Hä lefwetaj hin'oltso lech'isukyajay inu'pe iyhäj tä ihi laka honhat wet häp tä tamenej tä nem koyhyaj lewit'äytso? 3¡Oyok, kha! Mat chik amel kawoya ahusey iyhäja, häte let'inhihena. 4Wok häp lhamel tä dieciocho tä ihi Siloé tä hup tä atojphä nichätpe wet ilänhen, ¿hä lefwetaj häpe wichi tä letes inu'pe iyhäj tä ihi Jerusalén? 5¡Oyok, kha! Mat chik amel kawoya ahusey iyhäja, häte let'inhihena.

Jesús lhämet tä itech'aynej higo lhile tä laj lhaya

6Jesús yäme lhämet tä itech'aynej täja wet yok:

–Iche hin'o tä higo lhile ihi lelafwek, wet lham ihoye yämlek t'ukwe lhay, mat hiw'enhit'a. 7Tä mälhyejtso, tahuyej hin'o tä t'uye lelafwek wet yok, “Lhek yahinya, tres nekchämes tä onämpej tä ot'ukwe lhay häp higo lhilena, mat niwohit m'ak chik ow'en. Iset, tsi w'et ihi t'at honhat tä ihi.” 8Mat häp hin'o tä t'uye lelafwek nichulho lewuk wet yok, “Tej ayeji nekchämna, mat otijihila honhat tä ihi wet owohla lhiskata. 9Elat isej wet iwo lhaya. Mat chik niwoya lhaya, nech'e n'iseta.”#Isa 5.1-7

Jesús ichesat atsinha häp ifwala tä n'ot'elakw'et

10Ifwala elh p'ante, häp ifwala tä n'ot'elakw'et, Jesús iwo lechufwenyaja tä ihi n'ohusew'et. 11Wet iche atsinha tä dieciocho nekchämes tä t'inhayaj ihi, ahät tä ihi ichofwnhatho, wet ihanhiyejt'a chik lhaitshupyenphä. 12Tä Jesús hiw'en, t'äne wet tahuyej tä yok:

–Atsinha, letafwayej anhayaj.

13Wet iti'pe takweyey. Häpet tä mälhyejtso, wet atsinha tatshupiphä wet iwunit Dios.

14Matkat häp hin'o tä itetshan n'ohusew'et lechumet, lham tawäkwäylhi tä häpe ifwala tä n'ot'elakw'et tä Jesús ichesat atsinha. Wet lham tahuyej wichi wet yok:

–Chik let'uyaykwe achesyaj, yej ho kana ifwala tä n'ot'elakw'et. Tsi iche seis ifwalas tä is chik y'atchumwethä, wet häp tä is chik lenämhen häpkhilek õ'aichesthen.

15Mat Lhawuk nichulho wet yok:

–¡A'akantses! Häp ifwala tä n'ot'elakw'et elhpej amel lelanhi alä weyis wok asno wet lehäne inät tä leyäyen, ¿hä matche? 16¿Wet chiwoye atsinhana? Lham häpe Abraham leles elh tä lepes lhele, wet dieciocho nekchämes tä Satanás yäytej t'inhayajna. Tä mälhyejtso, ¿hä ni'isa tä õ'lanche t'akay häp ifwala tä n'ot'elakw'et?

17Tä Jesús iwoyetso, letayhfwas wuj tä n'äfwelhen. Mat nilhokej wichi lhäy'e lhip tä lakäjyaj ihi tä hiw'en m'ayhay tä wuj tä isen tä Jesús yenlhi.

Jesús lhämet tä itech'aynej mostaza lhofwaj

(Mat 13.31-32; Mar 4.30-32)

18Wet Jesús yok:

–¿Atsi m'ak tä häte iwoye Dios Niyatyaj? Wok ¿atsi m'ak chik otech'aynej? 19Oyok, hätet iwoye mostaza lhofwaj tä hin'o tachuma wet itihi lelafwek. Wet tä tälh, lhaichihelit pajtha häpe hal'ä tä wuj, wet afwenchey iwo lhupisahi lhachal.

Jesús lhämet tä itech'aynej levadura

(Mat 13.33)

20Häte Jesús y'isej lhämet elh tä yok:

–¿Atsi m'ak tä otech'aynej Dios Niyatyaj? 21Oyok, hätet iwoye levadura tä atsinha tachuma wet ikasoyej treinta kilos harina, wet iwojyenhi imälhewek.

Lepe tä nitsajaho

(Mat 7.13-14,21-23)

22Tä Jesús tujlhache n'äyij tä ihoye Jerusalén, wet ichufwenhenpej wichi tä ihi hupuy chik nichäte, lhäy'e lew'etesas. 23Wet iche hin'o tä tay'ätshane wet yok:

–Maestro, ¿hä niwuja'pe wichi chik tafwayhen?

Jesús tahuyej wichi wet yok:

24–Akhajyenhen häpkhilek lekalhi tä lenukwe lepe tä nitsajaho. Tsi ofwel amhohen tä wujla'pe wichi tä t'uhlahläk nichätho lefwayhyaj. 25Pajla'tha nephä hup lewuk wet hip'ohi lepe, wet amel chik lemälhe alhoye let'änlawethä, lhoyayhlakwe, “Iwuk, fwoyenche lepe.” Mat lham nichulhla amhohen, yohlak, “Ontäfwenhit'a amejen. ¿Atsi honhat tä letälhaye?” 26Wet nech'e amel lhoyayhlakwe, “Olhamel otchufwihte amej tä y'at'ekhen wet y'ayä, wet lhehihte olhamel ow'etes tä lewo achufwenyaja.” 27Mat lham nichulhla amhohen wet yok, “Pajche ofwel amhohen tä oyok, Ontäfwenhit'a amejen. ¿Atsi honhat tä letälhaye? ¡Mäyay och'oye, amel tä lewoyaye m'ak tä ni'isa!”

28“Wet chik amel lew'enay Abraham, Isaac lhäy'e Jacob, lhäy'e nilhokej profetas, tä ihi t'at Dios Niyatyaj, mat häp amel lemälhet alhoye, wet letafwichelahchä wet wuj tä äytaj. 29Wet nekhihena wichi tä tälhche tä tafwojhiye lhäy'e tä tapinhiye, lhäy'e tä ifwala tälhche lhäy'e tä ifwala y'uy, yämlek tachufwiwek tä ihi Dios Niyatyaj tä t'ekhen.

30“Tä mälhyejtso, häp elhpej tä imälhnhen athana, ichunla, wet häp iyhäj tä ichun athana, häpkhilek imälhnhen.”

Jesús yen lhakliya Jerusalén

(Mat 23.37-39)

31Häp fwalatso nämhen iyhäj Fariseo lhayis wet ifwenho Jesús wet yok:

–Mäch'oye täja, tsi Herodes#13.31 Herodes Antipas, häp Herodes tä Lhamya lhäs. t'uhläk ailän.

32Mat Jesús nichulho lhamel wet yok:

–Mäh fwenho m'awotso olhämet, oyok, Fwalana lhäy'e chik fwala onuhatchephä ahät lhayis wet ochesthen t'inhayaj länhay, wet chik tumej kanhik fwala noj ochumet. 33Mat iwohiyet'ak n'am tujlhache on'äyij fwalana lhäy'e chik fwala, tsi t'uhawethiyejt'ak profeta newahi Jerusalén tä õ'län.

34Tä iwoyetso, wet äp yok:

–¡Jerusalén, Jerusalén, lelänhen t'at profetas#1~Rey 19.10; 2~Crón 24.20-21; Jer 26.20-23 wet lethatejwethä tuntey Dios kasilätwos tä ichen ame! ¡Wujpe tä ot'upejläk ohut lhamej aka wichi, mälhyej ho'o tä ihutchufwi lelesas häp lhefwis, mat lewohiyet'a! 35Lhek yahinya, niwohit elh chik ihihla haw'et. Wet ofwel amhohen, nemla lew'enayn'o yäk nichäte lewhäy chik lhoyayhlakwe, “¡Is chik Lhawuk itiyej lakäpfwayaj tä is häp hin'o tä näm tä Lhawuk lhämetej!”#Sal 118.26

Currently Selected:

Luc 13: WCHB

Highlight

Copy