Lev 6

1Lhawuk äp tahuyej Moisés wet yok:

2–Chik iche hin'o tä tatayej n'ohlä lech'isukyaj tä iwoye häp tä ikanej elh, wet häp tä oyen tesayej. Chik nit'amajayej m'ak tä elh t'ekhayeje chik t'amajej, wok nachajaye lewuk m'ak tä tacheyäjäne, häp tä oyen tesayej. Chik t'etane m'ak tä lewuk elh, wok isoyej, häp tä oyen tesayej. 3-4Chik lhaikachu tä hiw'en n'aji elh laka m'ak tä tatäy n'aji, wok tä iwoye lhämet tä lakalelhthayaj tä kamatache, häp tä oyen tesayej. Elh at chik häpe m'ayhayna tä hin'o iwoye häpe lech'isukyaj wet õyenla tesayej.

“Iwohiyet'ak nachajaye elh laka m'ak tä t'etane n'aji, wok häp m'ak tä isoyej n'aji elh, wok m'ak tä elh t'ekhayeje chik t'amajej. Wet tä hiw'en n'aji elh laka m'ak tä tatäy n'aji, is chik yachaje häp elh tä lewuk. 5Wok tä lhaikachu n'aji tä fwetaj kalhama chik hiw'en n'aji, is chik ileyej tä lhaikachu. Chik nichäte ifwala tä ihän n'oye itshäwet tä tiskanejpe lech'isukyaj tä iwoye n'aji, iwohiyet'ak nachajaye nilhokej m'ak tä lewuk elh, wet is chik y'isej lhip. 6Häp itshäwet tä hiw'en n'oho häpkhila tson'ataj tä hin'o tä isilataj tä newache m'ak chik iyej. Wet is chik õ'tetshan laha, õ'chumyenlhi chinaj t'äj tä sacerdotes ichumyenlhi. Wet häp tä ilänla itshäwettso, wet yachajiyela sacerdote. 7Wet chik sacerdote yachaj n'oye, nofw t'at tä oyen tesayej hin'otso lech'isukyaj tä iwoye.”

Itshäwet tä õ'wunhomche tä õyen Lhawuk t'awayhata, lakey tä õyenlhi

8Lhawuk äp tahuyej Moisés wet yok:

9–Fwenho Aarón lhäy'e leles, Häp täja lakey itshäwet tä õ'wunhomche. Is chik imälhewek honatsi tä õ'ti'pe fwiyhol häp altar, pajla'tha itäj t'at tä ihämit itshäwet. 10Wet sacerdote y'uyhichela lew'uy tä lino lhäy'e lakoset lhäs tä äpte lino. Wet ihutlawek itshäwet tä õ'wunho lemokw tä i'pe altar, wet itihlawhäye altar. 11Chik tajyäme täja, wet iwohla iyhäja lew'uyis. Wet nech'e yikhilachufwi häp mok'otaj, ihänhiyela honhat lhip tä ot'amajchet tä i'alhoye.

12“Is chik nilhokej ifwalas tä lak'e t'at itäj tä i'pe altar. Wet chik nech'e ifwalapej sacerdote y'isej iyhäj lehuy wet yenlhi itshäwet tä õ'wunho, iskonpe itshäwet lhipey häp itäj. Wet is chik äpte iwunho t'alhä itshäwet tä õyen otw'ayhata tä wichi lha'isyen n'oye. 13Itäj tä i'pe altar is chik y'oho nilhokej ifwalas, isit'ak y'om.

N'olhäk tä tälhe yachuyaj lhay tä õyen Lhawuk t'awayhata, lakey tä õyenlhi

14“Häp n'olhäk tä tälhe yachuyaj lhay tä õyen otw'ayhata, häp täja lakey tä õyenlhi: Sacerdotes ihohiyela altar tä hiw'en n'oho otw'ayhatna. 15Elh lhamel tach'awhihola harina tä õyen otw'ayhata, lhäy'e aceite, lhäy'e nilhok incienso tä hap'akej otw'ayhtesna. Wet iwunhiyeja tä i'pe altar häpkhilek ontichunche, wet lenij tä akäjche ikäjyenlhin'o. 16Wet lhip tä imälhehi Aarón lhäy'e leles lhamel tufwila, mat isit'a chik levadura iyej. Wet is chik tufw tä ihi honhat lhip tä ot'amajchet tä häpe carpa tä owukwe laka alho. 17Wet isit'a chik õ'thate levadura, tsi olham tä ow'enho sacerdotes häpkhilek lhamel w'enhayej otw'ayhtes tä õ'wunhomche lhipna. Häpe t'at otw'ayhtes tä ot'amajchetes, tet iwoye otw'ayhtes tä hin'o tiskanejpe lech'isukyaj, wet äp tet iwoye otw'ayhtes tä hin'o hiw'en n'oho häpkhilek otäyhat letes.

18“Ifwalas tä tatay alhoho lajit lepesa, nilhokej hin'ol tä Aarón leles pajla'tha nichäte leles iyhäj tä lepes lheley, lhamel tufwila t'at otw'ayhtes tä õ'wunhomche lhip tä is chik lhamel w'enhayej. Elh chik häpe chik tachuma otw'ayhtesna lhaiwit'äynej, tsi häpe m'ak tä matche tä n'ot'amajchetes.”

Lhawuk t'awayhat tä sacerdotes iwoye

19Lhawuk äp tahuyej Moisés wet yok:

20–Häp täja m'ak tä Aarón lhäy'e leles iwohiyela tä iwo otw'ayhata chik nichäte ifwala tä oyen t'amajchetayej lhamel tä oyen sacerdotesa. Is chik ichäj n'oye dos kilos harina tä matche tä is tä tälhe wichi laka yachuyaj. Ihänla n'oye lechowej tä nech'e ifwalapej, wet tä honajpej ihänla n'oye lechowej elh tä imälhehi. 21Is chik õyenlhi otw'ayhtes tä õ'thatho n'otulhlhanthi wet õ'tsäye aceite. Chik wak'alh, õhch'esajihena wet õ'hänla n'oye, wet nech'e häpe otw'ayhat tä lenij akäjche tä ikäjyenlhin'o. 22Elh tä yenhilhipeja otw'ayhat häpe Aarón leles elh tä icheyäjihopeja elh lew'et häp tä yenhilhipeja sacerdote lechumet. Häp tä one'thiyepejak tetso, pajla'tha nichäte lepes lheley. Wet n'otw'ayhatna olham t'at tä Olewuk, wet iwohiyet'ak itäj nhämita. 23Nilhokej otw'ayhtes tä sacerdotes hiw'en n'oho, is chik itäj t'at tä ihämit häpkhilek newache elh chik tufw lhip.

Itshäwet tä õ'länhen tä õtiskanejpe n'och'isukyaj, lakey tä õyenlhi

24Lhawuk äp tahuyej Moisés wet yok:

25–Fwenho häp Aarón lhäy'e leles, Häp itshäwet tä õ'länhen tä õtiskanejpe n'och'isukyaj, häp täja lakey tä õyenlhi: Tä häpe otw'ayhat tä ot'amajchet, iwohiyet'ak õkniläna tä ihi tä olham ottache wet õ'tihi lhip tä õ'länhen itshätäy tä õ'wunhomche tä õyachaj n'oye. 26Häp sacerdote tä ihän n'oye itshäwetna, is t'at chik tufw. Mat is chik tufw tä ihi honhat lhip tä ot'amajchet tä häpe carpa tä owukwe laka alho. 27Elh chik häpe chik tachuma itshäwet t'isan lhaiwit'äynej, tsi häpe m'ak tä matche tä n'ot'amajchet. Wet chik itshäwet lew'oyis tajlhi häp lew'uyis, is chik ihäne honhat tä ot'amajchet chik ilejen lew'uyis. 28Chik towej iyhät tä õ'penhi itshäwet t'isan, is chik õy'ajo chik nofw n'olhataj. Wet chik õ'penhi n'okähi tä chinaj, is chik õyämla matche tä nofwo tä õ'lejo.

29“Häp otw'ayhatna häpe m'ak tä matche tä ot'amajchet, wet ts'ilak häp sacerdotes tä is chik tufw. 30Mat isit'ak õtufw itshätäy tä õtiskanejpe n'och'isukyaj tä pajche õ'hänchufwi lew'oyis häp carpa tä owukwe lhip tä Ot'amajchet. Is chik õ'wunhomche pajla'tha itäj ihämit.

Currently Selected:

Lev 6: WCHB

Highlight

Copy