Lev 5

M'ak tä lakey tä hin'o tiskanpe lech'isukyajay tä w'enhache lhamej tä iwoye

1“Chik iche hin'o tä lhaikachu tä õty'ätshaneje tä lham tä hiw'enej m'ak wit'äy tä iche, wok iläte tä wichi tä hiw'enej lhamel tä yäme, akalelhäj tä hin'otso iwo lech'isukyaja wet häpe letes täja.

2“Elh at chik häpe tä tachuma itshäwet tä kok'aye lep'itsek, chik n'olä wok kan'oläya, wok itshätäy tä kok'aye tä lhaitonche honhat lep'itsek, nech'e lham hin'otso tä kok'ayeje wet oyenla tesayej, tej chik nhanahläk tachuma.

3“Chik iche hin'o tä tachuma hin'o wok atsinha tä kok'ayeje m'ak tä iyej wok m'ak tä iwoye, nech'e lham tä kok'ayeje wet oyenla tesayej, tej chik nhanayej tä kok'aye. Wet chik ihanhiyeja chik paj tä tachuma n'aji m'ak tä kok'aye, ihanlat lhamej tä letes ihi.

4“Chik iche hin'o tä nitetshana lhämet tä iwoye, iwelkatyenphä tä w'et iwo lheya n'oyej m'ak tä iwohiyela, chik is wok ni'isa, oyenla tesayej. Tej chik nhanahläk iwoye lhämet, chik ihanej ihi tä paj m'ak tä iwoye n'aji, ihanhiyeja tä letes ihi.

5“Elh chik häpe tä oyen tesayej häp lakeyistso tä iwoye, iwohiyet'ak lhaknifwelayej n'oho lech'isukyaj. 6Wet iwohla t'awayhata n'oyej itshäwet tä atsinha tä tiskanejpe lech'isukyaj tä iwoye. Is chik tson'ataj wok kayla, wet chik sacerdote yachaj n'oye otw'ayhatna, otäyhthiyeja häp hin'o letes.

7“Chik niw'ena chinaj t'äj tä w'awulhej tä ichäj häp tson'ataj, is chik yen otw'ayhata täkwfwas pop wok täkwfwas hokwinaj lesas tä tiskanejpe lech'isukyaj tä iwoye. Afwenche elhaj häp tä ilänpe lech'isukyaj, wet elhaj häp tä õ'wunho tä yen otw'ayhata. 8Wet ihänhiyela sacerdote, wet ichunkatla elh tä õtiskanejpe n'och'isukyaj tä yachajila n'oye. Wet hits'ulhkathila lew'o mat ilanhihit'ala lhetek. 9Wet tachumhiyela lew'oyis wet itsäyhichela altar lhip. Wet lhip tä imälhehi lew'oyis hits'ifwnhilahchä wet itsäyhichela altar lhip tä honhate. Häpe t'at afwenche tä õ'länpe n'och'isukyaj. 10Wet elh afwenche sacerdote iwunhihola, iwohiyejela m'ak tä one'tek iwoyeje. Wet nech'e otäyhthiyeja'pe hin'otso letes häp sacerdote lechumet tä iwoye.

11“Chik hin'o niw'ena chinaj t'äj tä w'awulhej tä ichäj täkwfwas pop wok täkwfwas hokwinaj lesas, is chik yen otw'ayhata dos kilos harina tä matche tä is tä tiskanejpe lech'isukyaj tä iwoye. Mat isit'a chik itsäype aceite wok incienso, tsi häpe otw'ayhat tä õtiskanejpe n'och'isukyaj. 12Wet hin'otso ihänhiyela sacerdote, wet sacerdote tach'awhihola. Häpehila n'otw'ayhat tä n'otetnek tä is chik olham ontichunche. Wet sacerdote itihla'pe altar tä iwunho, hip'ajthiyeja iyhäj n'otw'ayhtes tä õ'wunhomche tä õ'wujyen n'oyej. Wet nech'e häpe otw'ayhat tä õtiskanejpe n'och'isukyaj, 13häpkhilek otäyhtej hin'otso letes. Wet häp harina lhip tä imälhehi nech'e häpe sacerdote lhäk, mälhyej lakey tä õhw'enho sacerdote häp lhip tä imälhehi tä tälhe yachuyaj lhay tä õyen otw'ayhata.”

M'ak tä Lhawuk ne'tek hin'o iwoye häpkhilek tatäy letes

14Lhawuk äp tahuyej Moisés wet yok:

15–Chik iche hin'o tä iwo lech'isukyaja tä nhanahläk iwoye, häp tä nachaja n'oye otw'ayhat tä t'uhawetej chik yachaj n'oye, wet hin'otso letes ihi. Wet is chik tachuma itshäwet tä tson'ataj tä hin'o tä isilataj tä newache m'ak chik iyej, wet is chik ihän n'oye tä tiskanejpe letes. Wet is chik õ'tetshan tson'ataj laha, õ'chumyenlhi chinaj t'äj tä sacerdotes ichumyenlhi. 16Hin'ona iwohiyet'ak nachaja n'oye otw'ayhat tä t'uhawetej chik yachaj n'oye, wet äp is chik y'isej lhip wet hiw'enho nilhokej häp sacerdote. Wet chik sacerdote yachaj n'oye häp tson'ataj tä hin'o ilän, wet nech'e otäyhtej hin'o letes.

17“Chik iche hin'o tä iwo lech'isukyaja wet iwoye m'ak tä on'äyejo chik iwoye, letes ihi t'at. Tej chik nhanahläk iwoye m'ak tä ni'isa, kamaj oyen tesayej wet iwohiyet'ak nitiskana'pe lech'isukyaj. 18Wet häp tä is chik tachuma itshäwet tä tson'ataj tä hin'o tä isilataj tä newache m'ak chik iyej. Wet is chik õ'tetshan laha, õ'chumyenlhi chinaj t'äj tä sacerdotes ichumyenlhi. Wet häp tä ilänla itshäwettso wet yachajiyela sacerdote häpkhilek tatäy letes. Wet chik sacerdote yachaj n'oye, nofw t'at tä oyen tesayej hin'o lech'isukyaj tä nhanahläk iwoye. 19M'ak tä tamenej tä hin'o ihän n'oye itshäwet, häp tä letes ihi n'ohlä.”

Currently Selected:

Lev 5: WCHB

Highlight

Copy