Lev 26
26
Lhawuk lakäpfwayajay tä isen iyej wichi chik iwoye lhämtes
(Deut 7.12-24; 28.1-14)
1Lhawuk yok:
–Yej lhenlhi amhohen acheyälis wok m'ak at chik häpe lepeyak chik len'okwiyej. Yej kasthayen tuntey tä akwey lhenhay chik letihi aka honhat. Isit'ak let'upeyejchä lhamel häpkhilek lewo han'okhayajayej, tsi olham tä ohäpe amel Awuk Dios. 2Is chik lhen amajcheta häp ifwalas tä n'ot'elakw'et wet en amajchetayej ow'et tä ot'amajchet. Olham tä ohäpe amel Awuk.
3“Is chik lewoye olhämtes lhäy'e ochufwenyajay, wet enay achumyaja. 4Wet ochenla amehen pelhay chik nichätepej lewhäy, wet honhat hiw'enla amhohen yachuyaj lhay lhäy'e häp hal'äy tä amel äk häp lhay. 5Letufwayhla yachuyaj lhay pajla'tha nichäte ifwala tä lelanhi uvas. Wet nofwit'ala uvas pajla'tha nichäte ifwala tä äp letutcheyhen. Let'ekhihena pajla'tha lhipsen, wet atamsekis ihihila tä lheyayhihila aka honhat.
6“Ow'enhihola letamsek honhat, wet ihichet'ala m'ak chik aistunlawethä chik lemähen. Wet owahnhiyejt'ala chik iche itshätäy tä fwitses lhäy'e n'oka'tshayaj. 7Amel lelänhihena atayhfwas wet lhokwosila lhamel. 8Chik cinco amel, wet cien atayhfwas tä nowayhla amehen. Wet chik cien amel, wet diez mil atayhfwas tä nowayhla amehen, wet lelänhihena lhamel.
9“Ot'uhla amehen wet oyämla wujpey amel, wet olehiyejt'ala tä oayen oka wichiya. 10Lhäy'ehila lhip tä wuj aka yachuyaj. Nekchämpej letufwayhla m'ak tä lhen akapucheya häp nekchäm elh tä tajyäme, pajla'tha letaläyej, lewomla t'at tä lewo w'eta iyhäj tä nech'e lelanhi. 11Olham oihla amejen wet ihichet'ala ot'ulhnhayaj chik oti amejen. 12Nilhokhiyeja ifwalas tä n'alhäy'ehilatwethä, wet ohäpkhila amel aka Dios wet ahäpkhihena oka wichi. 13Olham ohäpe Awuk Dios, otonphähte amel tä letälho honhat tä Egipto häpkhilek nemhit ahäpehen Egipto lheley lakwenkay. Osohte amejen alhuk tä choyhat, wet nech'e häp tä akäjyaj ihi tä lhekhen.
M'ak tä ni'isa nichätpe wichi tä niwoyaye Lhawuk lhämet
(Deut 28.15-68)
14“Mat chik amel katach'ahuhiyala n'oye wet lewohiyet'ala olhämtes, otihla amejen otasnhayaj. 15Chik let'ulhanhila olhämtes, wet kawoya haya ochufwenyajay, wet lele n'oyej, 16olham otihla amejen awit'äyhyaj. Ochenla amehen äytes tä wuj tä ni'isa tä ailänhihena: telätaj, atelhoy t'inhayaj, wet lemähikwela katsi pajla'tha let'inhen. W'et letachumhilawethä, letufwit'ala akäs lhay, atayhfwas tä tufwila. 17Olham ottayhla ahilähen wet atayhfwas ikalhla amhihen. Wet wichi tä n'äyi amhomche lhayenla awuhuya, wet lhekhihena. Tej chik aknhänawethä, tha lenuhikwela alhoho.
18“Chik kamaj katach'ahuhiyala n'oye, nech'e mathichela tä oyämla äytajchey otasnhayaj tä oti amejpe hach'isukyajay tä lewoyaye. 19Oay'ayhthichelahchä tä alechäjwethä. Wet nemla ochen häp pelhay, tsi pule tehlat iwoye lechinaj, wet honhat t'unla tsi tamchäy. 20W'et letachumhilatwethä, wet honhat hiw'enhit'ala amhohen yachuyaj lhay, wet äp hal'äy iwohit'ala lhaya.
21“Chik amel letujlhahichela tä letatay n'ohlä, lewohiyet'ala olhämet, wet nech'e mathichela tä oyämla äyteschehen otasnhayajay tä otihla amejen. Ow'awlhatlatlä hach'isukyajay tä lewoyej n'oye. 22Ochenla amehen itshätäy tä fwitses wet yämla nofwej tä tufwen ales lhäy'e aläy. Tifwila amejen pajla'tha nemhit anitäkw tä lemälhehi, wet nemhit ihichela hin'o chik inuhikwela n'äyhäy.
23“Wet chik kamaj amel katetshana ofwonkanyajna wet kaleyache akeyis, mat letujlhayache t'at tä letatay n'ohlä, 24tehla olham ottayhla ahilähen. Nemla koyhyaj chik otasnhila atapehen hach'isukyajay. 25Ochenla amehen n'oka'tshayaj wet ichowalhla amehen, tsi häp tä lele n'oyej. Wet lenuhikwela alhoho tä lelethanehen häp aka honhates tä nitäkwpej hupuy tä ihiche. Wet häp tä ochenla amchehen äytes tä wuj tä ni'isa, wet atayhfwas niyatla amejen tsi ikalhla amhihen. 26Ochenla amehen nehlä, wet lew'enla lhimphaj harina, wet diezla atsinhay chik yenlhi tä ithatche n'onhonthi, elh w'enhahiyejpeja lhimphaj. Nayahit'ala m'ak chik letufw, tek lhipsiyejena.
27“Wet chik amel kamaj katach'ahuhiyala n'oye, mat letujlhahichela t'at tä letatay n'ohlä, 28tehla olham ottayhla ahilähen. Oyämla matche tä otwäkwäy amehen, wet äp nemla koyhyaj chik otasnhila atapehen hach'isukyajay. 29Wet chik matche chik lechuyuhihena, pajla'tha letufwen ales. 30Owasthihichela han'okhayajw'etes tä ihiche honhat lhipey tä atoschephä. Wet otilhkathichelahchä n'otw'ayhtesw'etes tä lhenay lew'eta häp incienso tä lewunhen. Wet oskonla'pe amel hap'itseyhay häp acheyälis tä nityalhahiche, wet matche tä on'älthila ot'ulhnhayaj tä oti amejen. 31Oyenla ts'aniya häp amel haw'etes, wet owasthihichela han'okhayajw'etes, wet nemla okäjejlhi m'ak chik lhenla otw'ayhata tä lenij akäjche.
32“Matche tä owasthihila aka honhat, wet atayhfwas tä yen lew'eta lhamel inuhthila lhamhohen chik hiw'en. 33Ochenla amehen n'oka'tshayaj, tehlat iwoyek otonhi oka tsonhat tä iche lehi chik oaihänlawethä. Oaifwtsatkatlatpe honhatil wet lelhahiyeja wichi tä w'enha lhamejen. Ts'anisla aka honhat, wasihichela haw'etes. 34Honhat akäjiyejlhila t'at laka ifwalas tä wichi newahi, tsi iwohla t'elakw'eta wet amel lhewhihichela t'at atayhfwas kahonhatil. 35Nilhokej häp ifwalas tä wichi newahi honhat, iwohlat letamseka, tehit'ala iwoye ifwalas tä amel lhewhi tä laj letamseka.
36“Amel tä lhewhihichela atayhfwas kahonhatil wet lemälhhiche tä kat'ilahen, ow'enla amhohen tä anowayhtses. Tejlak hal'ä w'ole chik nichätchä, tha lenuhikwela alhoho chik leläte. Tehlat häp chik nifwotaj chik aihänwethä, lechäthiyejchelat katsi anowayhyaj. 37Letafwomhilatwethä amejen chik lenukwe alhoho, tehlat häp chik lhehi n'oka'tshayaj. Tej chik newache elh chik aihänwethä, tha lenowayhla t'at. Wet ihichet'ala aelh chik ikalhi chik tatayhlä letayhfwas. 38Amel lenofwiyeja t'at tä lhewej wichi tä w'enha lhamejen tä häpehen atayhfwas. Lhamel tifwilat amejen tä lhewhiche laka honhatil. 39Wet aiyhäj tä ihiche letayhfwas kahonhatil tä imälhehiche tä n'ilahen, lhamel t'isanis lhäy'e lehusey nemla lakhajyhayaj ihiche. Häp m'ak tä ni'isa tä lhamel iwoye, lhäy'e lechätilis lech'isukyaj, häp tä tamenej lhamel.
40“Is chik lhamel lhaifwenhiyeja tä ni'isa häp m'ak tä lhamel iwoye, lhäy'e häp lechätilis lakeyis tä ni'isa tä iwoye. Tsi chik lhamel ile n'oyej wet tatay n'ohlä, 41wet häp tä tamenhiyeja tä ottayhlä lhamel wet ohäne letayhfwas kahonhatil. Mat chik lhamel lhay'ayhatchä wet lehusey nemhit t'unhen, wet ihanej t'at tä lhamel tä tamen lhamejen tä otasin, 42wet häp tä olham ontichunhilach'oye olhämette owoyeje häp letes Jacob tä ottshupiyehte tä oyen oka wichiya, lhäy'e olhämette owoyeje lajcha Isaac, wet lhäy'e häp olhämette owoyeje lechäti Abraham.#Gén 17.7-8; 26.3-4; 28.13-14 Wet laka honhat äpte tek op'ethatlä. 43Tsi ifwalas chik nemla wichi ihi, wet häp tä honhat iwohla t'elakw'eta, letamsek ihihila t'at. Wet wichi ihanhiyeja tä lhamel t'at tä tamen lhamejen tä otasin, häp tä y'ulhanchehen olhämtes wet yen w'et m'ayeka ochufwenyajay.
44“Mat tej chik tehlatso m'ak tä lhamel iwoye thayej, wet häp tä tamenhiyeja ihi letayhfwas kahonhat, mat kamaj tek oy'ulhanhiyeja lhamel. Oyenhit'ala w'et m'ayeka lhamel, tek otäyhthihena. Olehiyejt'ala tä oyen oka wichiya lhamel, tsi ohäpe t'at lhamel Lewuk Dios. 45Op'altsenhiyela lhamel, tek op'ethathilahlä olhämette owoyeje letetsel. Nilhokej wichi tä ihiche honhatil ihanejte tä otonphähte lhamel tä tälho honhat tä Egipto, häpkhilek ohäpe laka Dios. Oyen at oka wichiya lhamel wet ohäpe t'at Lewuk.”
46Häp tähestso Lhawuk lhämtes lhäy'e lechufwenyajay tä hiw'enho p'ante Moisés tä i'pe tachenaj tä Sinaí, ne'tek iwo siläta Israel lhayis.
Currently Selected:
Lev 26: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
