Lev 13

N'ochufwenyaj tä yäme häp ot'inhayaj tä i'pe ot'äj

1Lhawuk tahuyej häp Moisés lhäy'e Aarón wet yok:

2–Chik iche elh tä t'ukwalhi, wok iche m'ak tä i'pe t'äj tä ipäjchephä, wok iche m'ak tä ipelajiche tä i'pe t'äj, wok lakam'os tä tet iwoye t'inhayaj tä ni'isa, iwohiyet'ak õknhänaye häp sacerdote Aarón wok sacerdote elh chik häpe tä letes Aarón. 3Wet is chik sacerdote itetshan lakam'os tä i'pe t'äj. Wet chik lepusey tä ihi lakam'os ipelajchehen, wet chik pitos lakam'os, wet häp tä häpe t'at t'inhayaj tä ni'isa, iwohiyet'ak ninuyaho elh tä atott'aho. Wet chik sacerdote ileyej tä itetshan, is chik ikalelhät t'at tä kok'aye hin'o.

4“Wet chik ipelajiche m'ak tä i'pe t'äj mat pitosit'a, wet äpte lepusey ipelajichehent'a, wet häp tä is chik sacerdote itsoklhi ayej t'inhayaj länekna, hiw'enhatlä iyhäj siete ifwalas. 5Wet chik nichäte siete ifwalas, wet is chik sacerdote yachajo tä äp itetshan. Chik nit'ayatshi wet nilhoka'pe t'äj, is chik sacerdote yachajo tä itsoklhi siete ifwalas. 6Wet chik nichäte siete ifwalas, is chik äp yachajo tä itetshan. Chik ilehen lakam'os wet tek t'aytshi tä i'pe t'äj, is chik sacerdote ikalelhät tä häpkhit'a hin'o tä kok'aye. Tsi khit'a t'inhayaj tä ni'isa, ts'ilak t'at m'ak tä ipäjchephä tä i'pe t'äj. Wet is chik hin'o ilejen lew'uyis, wet häpkhila elh tä nofw lakokhayaj.

7“Wet chik tajyäme tä sacerdote itetshan, wet pajche ikalelhät tä häpkhit'a hin'o tä kok'aye, wet chik m'ak tä i'pe t'äjna yik t'at tä ipäjchephä, is chik yachajo tä ihoye sacerdote. 8Wet chik sacerdote itetshan wet hiw'en häp m'ak tä i'pe t'äj tä yik t'at tä ipäjchephä, is chik sacerdote ikalelhät t'at tä kok'aye hin'o. Tsi häpe t'at t'inhayaj tä ni'isa, iwohiyet'ak ninuyaho elh tä atott'aho.

9“Chik iche elh tä akalelhäj tä t'inhayaj tä tamenej tä lakam'os ihi, iwohiyet'ak õknhänaye häp sacerdote. 10Wet sacerdote itetshanhila, wet chik hiw'en lhipey tä taw'ulhchephä wet ipelajiche tä i'pe t'äj, wet äp lepusey tä tälhpe nech'e äp ipelajchehen, wet amos ihichet'a häp lhipey tä t'ukwachephäna, 11wet häp tä sacerdote ihanhiyeja tä t'inhayaj tä ninech'eya tä ilän hin'ona. Wet is chik sacerdote ikalelhät t'at tä kok'aye, wet isit'ak itsoklhi, tsi akalelhäj tä isit'a hin'ona.

12“Chik t'inhayajna t'aytshi wet nilhokpe t'äj, tälhe lhetek pajtha nichäte lepach'ol, 13wet is chik sacerdote itetshan. Wet chik hiw'en tä ipelajiche tä i'pe t'äj, wet ikalelhthiyeja tä häpkhit'a hin'o tä kok'aye. Tsi häp tä t'inhayaj tä ipelnhat t'äj häpkhit'a t'inhayaj tä ni'isa. 14Tha häp tä ifwala chik n'äl lakam'os, nech'e häp tä kok'aye. 15Wet chik sacerdote itetshan lakam'os, ikalelhthila tä nech'e kok'aye hin'ona. Tsi häp tä amos tä i'pe t'äj nech'e häpe t'inhayaj tä ni'isa, iwohiyet'ak ninuyaho elh tä atott'aho.

16“Mat chik nech'e äp ipelajiche lakam'os, is chik yachajo tä ihoye häp sacerdote 17häpkhilek itetshan. Wet chik sacerdote hiw'en tä yachajo tä ipelajiche, is chik ikalelhät tä häpkhit'a hin'o tä kok'aye.

Elh chik iche m'ak chik ipäjphä tä i'pe t'äj tä t'ukwa wet iwo t'iya

18“Elh chik häpe chik iche m'ak chik ipäjphä tä i'pe t'äj tä t'ukwa wet iwo t'iya, chik iches, 19wet lakam'o ipelaji tä lhimphaj tä ichäthi, is chik ipäyne häp sacerdote 20häpkhilek itetshan. Wet chik sacerdote hiw'en lakam'o tä pitoj wet lepusey tä tälhpe ipelajchehen, is chik ikalelhät t'at tä kok'aye hin'o. Häpe t'at t'inhayaj tä ni'isa, iwohiyet'ak ninuyaho elh tä atott'aho. 21Mat chik sacerdote hiw'en tä lepusey tä tälhpe lakam'o nipelajachehen wet äpte pitosit'a, yik t'at tä is, is chik itsoklhi ayej siete ifwalas. 22Chik nichäte siete ifwalas, wet sacerdote yachajihola tä itetshan. Wet chik hiw'en tä yik t'at tä i'pe t'äj, is chik ikalelhät t'at tä kok'aye hin'o. Tsi häpe t'at t'inhayaj tä ni'isa, iwohiyet'ak ninuyaho elh tä atott'aho. 23Tha mat chik lakam'os ihi t'at tä ihi, tek t'aytshi, wet t'äj tä ihiche lakam'os tayhin'atwek, wet is chik sacerdote ikalelhät tä häpkhit'a hin'o tä kok'aye.

Elh chik y'o wet lakam'o ihi

24“Chik iche elh tä y'o wet lakam'o ihi, wet ipelaji tä lhimphaj tä ichäthi, wok ts'ilak t'at tä ipelaji, 25is chik sacerdote itetshan. Wet chik lepusey tä tälhpe lakam'o ipelajchehen wet pitoj lakam'o, akalelhäj tä t'inhayaj tä matche tä ni'isa tä lhaitälhtho tä itäj hip'o. Wet is chik sacerdote ikalelhät tä kok'aye hin'o. 26Mat chik sacerdote hiw'en tä lepusey tä tälhpe lakam'o nipelajachehen wet äpte pitosit'a, yik t'at tä is, is chik itsoklhi ayej siete ifwalas. 27Chik nichäte siete ifwalas, wet sacerdote yachajihola tä itetshan. Wet chik hiw'en tä yik t'at tä i'pe t'äj häp lakam'os, is chik ikalelhät t'at tä kok'aye hin'o. Tsi häpe t'at t'inhayaj tä ni'isa, iwohiyet'ak ninuyaho elh tä atott'aho. 28Tha mat chik lakam'o tä ihi neka, ihi t'at tä ihi wet nilhokhit'a'pe t'äj, häp tä t'inhayaj tä ni'isa inuhihot'a lakam'o. Ts'ilak t'at häp lakam'o tä itäj hip'o. Wet is chik sacerdote ikalelhät tä häpkhit'a hin'o tä kok'aye, wet ile t'at lakam'o, t'äj tayhin'atwek.

Elh tä lakam'o ihi lhetek wok lak'use

29“Chik iche hin'o wok atsinha chik lakam'o ihi häp lhetek wok lak'use, 30is chik sacerdote itetshan. Chik hiw'en tä pitoj wet lepusey tä tälhpe nämche, nemhit nitäkw tä imälhehi, wet ika'tukwehen, is chik sacerdote ikalelhät t'at tä kok'aye hin'o. Tsi m'ak tä ilän häp lhetek wok lak'use häpe m'ak tä afwtsaj, wet lhäy'e lhip tä ni'isa. 31Wet chik sacerdote itetshan häp elh kam'o, wet chik hiw'en tä nipitoja wet lepusey tä tälhpe nichalajachehen, is chik itsoklhi ayej siete ifwalas. 32Wet chik nichäte siete ifwalas, is chik sacerdote äp itetshan elh kam'o. Chik neka wet nipitoja, wet lepusey tä tälhpe ika'tuhikwehent'a, 33wet is chik elhtso yähäs lew'oley lhäy'e lepäsey. Mat is chik imälhthi lew'oley tä tälho lakam'o, wet is chik sacerdote yachajo tä itsoklhi siete ifwalas iyhäj. 34Chik nichäte siete ifwalas, is chik sacerdote yachajo tä itetshan hin'o lakam'o. Chik neka wet nipitoja, is chik ikalelhät tä häpkhit'a hin'o tä kok'aye. Wet is chik ilejen lew'uyis, wet yachajo tä is hin'ona.

35“Tha mat chik hin'ona lakam'o yik t'at, 36is chik sacerdote yachajo tä itetshan. Wet chik matche tä t'aytshi t'at, nemhit is chik sacerdote iyahinch'oye lepusey chik ika'tukwehen tä tälhpe lakam'o. Akalelhäj tä kok'aye t'at hin'o. 37Mat chik sacerdote hiw'en tä neka häp lakam'o, wet nech'e äp ipäjchephä lepusey tä ichalajchehen tsi häp tä ile lakam'o, wet hin'o nofw t'at tä kok'aye. Wet nech'e sacerdote ikalelhthila tä häpkhit'a hin'o tä kok'aye, tsi häp tä iches.

N'ot'äjcha

38“Chik iche hin'o wok atsinha tä iche m'ak tä i'pe t'äj tä ipelajiche, 39is chik sacerdote itetshan. Chik hiw'en tä nin'älayej chik ipelajiche, häp tä khit'a t'inhayaj tä ni'isa. Tajlhama tä t'äjcha t'at tä ipäjchephä tä i'pe t'äj. Wet is t'at hin'ona, kok'ahiyet'a.

T'inhayaj tä ilän hin'o tä lhetek isat

40“Chik iche hin'o tä lew'oley nämche wet nech'e lhetek isat, kok'ahiyejet'a, is t'at. 41Chik letacho w'oley tä nämche hin'ona wet nech'e letacho isat, kamaj is t'at, kok'ahiyejet'a. 42Tha mat chik iche hin'o tä lakam'o ipäjiphä häp lhetek lhip tä laj lew'oleya'pe, chik ipelaji tä lhimphaj tä ichäthi tä ihi letacho wok lhetek kotso, häpe t'at t'inhayaj tä ni'isa tä ihi lhetek. 43Wet sacerdote itetshanhila, wet chik hiw'en tä matche tä ipelaji tä lhimphaj tä ichäthi häp lakam'o t'ukwhayaj, wet häpe t'at t'inhayaj tä ni'isa tä ilän elhna. 44Lakam'os ihi t'at lhetek, wet sacerdote ikalelhthila tä kok'aye hin'ona.

Häp elh tä t'inhayaj tä ni'isa tä ilän häp t'äj, iwohiyet'ak nekach'oye wichi

45“Häp elh chik häpe chik lakam'os tä ni'isahen ihi, hich'esajichela lew'uy tä taw'uyhi, wet tek isitla lhetek, lew'oley nitsäype tatey, wet hip'ohla'pe lak'aj, wet t'änhilhila t'at tä yik wet yohlakwe, ¡Nemhit ois! ¡Okok'aye! 46Chik kamaj t'inhayaj ihi, akalelhäj tä äp isit'a häp hin'ona. Iwohiyet'ak nekach'oye häp wichi, yen lew'eta honhat tä wichi newahi.

M'ayhay tä sä'ä iyejen

47“Chik iche m'ak tä iyej häp wesaj tä tson'ataj w'ole, wok wesaj tä lino, 48chik n'oyik tä lino, wok tä tson'ataj w'ole, wok tsänt'äj, wok m'ak elh tä õyenejlhi häp tsänt'äj, 49chik iche m'ak tä iyej häp m'ayhayna, chik lech'ohle tä ichät wok lhimphaj tä w'atshanhi tä akalelhäj tä häpe sä'ä, wet is chik õ'päyne häp sacerdote. 50Wet sacerdote itetshanhila m'ak tä iyej häp wesaj wok tsänt'äj, wet t'amajiyeja ayej siete ifwalas. 51Wet chik nichäte siete ifwalas, wet sacerdote yachajihola tä itetshan. Wet chik hiw'en tä t'aylhatshi t'at häp lech'ohletso tä iyej, akalelhäj t'at tä häpe sä'ä tä ni'isa tä ikänchi, wet nech'e häpe m'ak tä kok'aye. 52Wet häp tä iwohiyet'ak niwunaho, tsi matche tä ni'isa m'ak tä iyej.

53“Tha mat chik sacerdote itetshan, tha hiw'en tä nit'aylhayatshi, 54wet ne'tehlak õ'lej wet yachajiholak t'amajej siete ifwalas. 55Chik tajyäme tä õ'lej, wet sacerdote äp yachajihola tä itetshan. Wet chik hiw'en tä kamaj nofwit'a häp m'ak tä iyej, wet akalelhäj tä häpe t'at m'ak tä kok'aye. Wet iwohiyet'ak õknip'oya, tej tä nit'aylhayatshi thayej häp m'ak tä iyej. Akalelhäj t'at tä isit'a, lech'ohle tälho t'at, chik ihi lhip tä tumphä wok ihi lhip tä tumchä.

56“Mat chik tajyäme tä õ'lej, wet chik sacerdote itetshan wet hiw'en tä nemhit n'äl häp m'ak tä iyej, chik mälhyejtso, is chik yiset lhip tä ni'isa, chik wesaj wok n'oyik wok tsänt'äj. 57Tha chik yachajo tä äp n'äl wet t'aylhatshi, wet iwohiyet'ak õknip'oya häp m'aktso. 58Mat chik nofw häp m'ak tä õ'lej tä iyej, is chik yachajo tä õ'lej, wet häpkhilek nech'e matche tä is, nofw lakokhayaj.

59“Häp täjtso lakey tä is chik õ'woyeje häp wesaj tä tson'ataj w'ole, wok wile tä lino, wok n'oyik, wok tsänt'äj, häpkhilek akalelhäj chik kok'aye wok nofw lakokhayaj.”

Currently Selected:

Lev 13: WCHB

Highlight

Copy