Lev 12

M'ayhay tä is chik atsinha iwoye tä iwo lhäsa

1Lhawuk tahuyej häp Moisés wet yok:

2–Fwenho häp Israel lhayis, Chik iche atsinha tä iwo lhäsa, wet chik lhäs tä nech'e iche häpe hin'o, wet kok'ahiyejela siete ifwalas, tet iwoye ifwalas tä kok'ayeje tä nowaylhi. 3Wet han'äfwaj chik nichäte ocho ifwalas, häp tä õ'tihiyeja t'isan häp n'otetnek tä n'olhijtsek. 4Wet äp treinta y tres ifwalas iyhäj tä atsinha iwohiyet'ak ninaya wet ilej t'at häp lew'oyis tä iyej. Wet isit'ak tachuma ayej häp m'ayhay tä n'ot'amajchetes. Wet äpte isit'ak ihoye ayej ow'et chik kamaj ninofwaphä häp ifwalas tä lewhäy tä inay wet lhailejlhi. 5Wet mat chik atsinha häp han'äfwaj tä nech'e nichätchä, häp tä lako nech'e catorce ifwalas tä õyen lewhäya tä kok'ayeje, tet iwoye tä nowaylhi. Wet nech'e äp sesenta y seis ifwalas iyhäj tä iwohiyet'ak ninaya wet ilej t'at häp lew'oyis tä iyej.

6“Chik nofwphä ifwalas tä lewhäy tä is chik lhailej häp atsinha, wet lhäs tä nech'e iche chik hin'o wok atsinhä, is chik lako ihänhiyela häp carpa tä owukwe lepe häp tson'ataj lhäs tä hiw'en tefwaji häp nekchäm, häpkhilek õ'wunho tä yen n'okhayaja n'oyej. Wet äpte is chik ihänhiyela häp hokwinaj lhäs wok pop tä õ'län tä tiskanejpe lech'isukyajay. Wet hiw'enhihola häp sacerdote, 7wet sacerdote yachajila n'oye. Wet y'alhyenla n'oye chik otäyhtej letes atsinha tä kok'ayeje lew'oyis, wet nofw lakokhayaj. Häp täjtso m'ayhay tä is chik atsinha iwoye tä iwo lhäsa. 8Wet chik niw'ena häp chinaj t'äj tä w'awulhej tson'ataj lhäs laha, is chik ichäj täkwfwas pop wok hokwinaj lesas, häpkhilek õ'wunho elh tä õyen n'okhayaja n'oyej, wet elh häp tä õ'län tä õtiskanejpe lech'isukyajay. Wet häp tä sacerdote y'alhyenla n'oye chik otäyhtej letes atsinha tä kok'ayeje lew'oyis, wet nofw lakokhayaj.”#Luc 2.22-24

Currently Selected:

Lev 12: WCHB

Highlight

Copy