Lev 11

Itshätäy tä i'pe honhat tä lakokhayajay ihi, lhäy'e iyhäj tä isen

(Deut 14.3-8)

1Lhawuk tahuyej häp Moisés lhäy'e Aarón wet yok:

2–Fwenho häp Israel lhayis, is chik lhok, “Nilhokhiyejt'a itshätäy tä i'pe honhat tä is chik amel letufw. 3Itshätäy tä inachaj lakäs wet äp lefwus t'ähes täkwfwas, is t'at chik letufw. 4Wet iyhäj tä ni'isa chik letufw, häp tähesna häp lheyis. Tej tä inachaj lakäs wok tä lefwus t'ähes täkwfwas, tha isit'a chik letufw:

“Camello, tej tä inachaj lakäs, tha häp tä lefwuj t'äj tefwaji, häp tä is chik lhene t'at itshäwet tä kok'aye.

5“Wet inätetaj, häp tä ihanej tä inachaj lakäs, mat lefwuj t'äj tefwaji, wet häp tä is chik lhene t'at itshäwet tä kok'aye.

6“Wet mäy'ä, häp tä ihanej tä inachaj lakäs, mat lefwuj t'äj tefwaji, wet häp tä is chik lhene itshäwet tä kok'aye.

7“Wet kutsi, tej tä lefwus t'ähes täkwfwas, tha häp tä inachajit'a lakäs, wet häp tä is chik lhene t'at itshäwet tä kok'aye.

8“Isit'a chik amel letufw itshätäyna, wet äpte isit'a chik letachuma lep'itsek, tsi häpe itshätäy tä kok'aye.

M'ayhay iyhäj tä ihi inät

(Deut 14.9-10)

9“Nech'e häp m'ayhay iyhäj tä ihi inät, chik lewomekitaj lheley wok ihi tewok, mat is chik amel letufw iyhäj tä lefwinchäs ihi wet lhafwisas ihi. 10Mat iyhäj tä lhafwisas newahi wet laj lefwinchäsa, tä wusche wok niwusache, chik lewomekitaj lheley wok ihi tewok, häp tä is chik amel len'äfwtseye. 11Isit'a chik letufw t'isan tsi häpe m'ak tä ni'isa. Wet chik lep'itsek, nem koyhyaj tä is chik lekokyene. 12Nilhokej m'ak tä inät lhele tä lhafwisas newahi wet laj lefwinchäsa, iwohiyet'ak kamatache tä len'äfwtseye.

Afwenchey

(Deut 14.11-18)

13“Häp tähesna afwenchey tä ni'isa chik amel letufw. Iwohiyet'ak kamatache tä len'äfwtseye: Iyhäjkottaj, istiwintaj, wet tsilikliktaj, 14lhäy'e nilhokej afwenchey tä tufw iyhäj, 15lhäy'e tsetwo, ahutsaj, 16wänlhäj, amyälä, lhäy'e nilhokej iyhäj afwenchey tä te iwoye, 17wet chilichuk, askan, wet kalapp'i, 18lhokotaj, chontsolit, wet hat'ätaj, 19kalak, pälaj wet asus.

M'ayhay tä wey'ähen lhäy'e tä t'äschehchä tä yikhen

(Deut 14.19-20)

20“Nilhokej m'ayhay tä lelemsas tä wey'ähen lhäy'e tä t'äschehchä tä yikhen, häpe m'ak tä ni'isa. 21Ts'ilak iyhäj lhamel tä ihanej tä tiyäjlhatshi tä yikhen, häp tä is t'at chik amel letufw. 22Häp tähesna iyhäj tä is chik letufw: Nilhokej chol tä wus lhäy'e tä niwusa, titsil wet chumche. 23Mat nilhokej m'ayhay iyhäj tä wey'ähen lhäy'e tä t'äschehen honhat tä yikhen, häpe m'ak tä ni'isa.

Itshätäy tä ni'isak õtchuma

24“Häp tähesna m'ayhay tä tamenla amejen, õ'kokyenla amehen. Elh at chik häpe chik tachuma häp m'ayhayna lep'itsek, ihanlat lhamej tä nech'e õ'kokyeneje pajla'tha ifwala y'uy.

25“Elh at chik häpe tä ineyhatphä elh häp m'ayhayna lep'itsek, iwohiyet'ak nilejahen lew'uyis. Tsi nech'e lham tä kok'ayeje pajla'tha ifwala y'uy.

26“Nilhokej häp itshätäy tä lefwuj t'äj tefwaji, wok tä kalakeya chik inachaj lakäs, hape itshätäy tä kok'aye. Elh at chik häpe chik tachuma elh itshätäyna, nech'e kok'ayeje.

27“Elh at chik häpe itshäwet tä takäläy ihi cuatro, wet chik yik lhay'itpe lepach'ol, õyen häpeya itshäwet tä kok'aye. Wet elh at chik häpe chik tachuma elh itshätäyna lep'itsek, nech'e kok'ayeje pajla'tha ifwala y'uy. 28Häp tä tetso, elh chik ineyhatphä elh lep'itsek häp tähesna, iwohiyet'ak nilejahen lew'uyis. Tsi nech'e lham tä kok'ayeje pajla'tha ifwala y'uy. Is chik lhen häpeya itshätäy tä len'äfwtseye.

Itshätäy tä lhaitonchehen honhat

29-30“Häp itshätäy tä lhaitonchehen honhat tä yikhen, is chik amel letetshan tä iche iyhäj tä kok'aye. Häp tähesna lheyis: Lep'i, ama, woyelaj, alhutaj, chal'a, lhäy'e älhchenha, lhäy'e nilhokej m'ak tä tet iwoye alhu. 31Häp itshätäyna is chik lhen häpeya m'ak tä kok'aye. Elh at chik häpe chik tachuma lep'itsek, nech'e kok'ayeje pajla'tha ifwala y'uy.

32“Wet m'ak at chik häpe chik itshätäyna elh lep'itsek nichätpe, nech'e kok'aye, chik hal'ä, wok n'ow'uy, wok tsänt'äj, wok n'okhäyhi, wok n'ochumetcha elh chik häpe. Is chik õ'thatho inät, tsi nech'e häpe m'ak tä kok'aye pajla'tha ifwala y'uy. Wet nech'e häpkhilek nofw tä õ'kokyene.

33“Elh at chik häpe häp itshätäyna lep'itsek chik nichätche n'okähi tä iyhät, nilhokej lheley tä ihi nemhit is, nech'e kok'aye. Wet häp tä is chik õy'ajo häp n'okähi tä iyhät. 34Wet nilhokej n'olhäk tä inät tä ihi n'okähina nitsäype, nech'e kok'aye. Wet nilhokej n'olhät chik häpe chik ihi n'okähina, äp kok'aye. 35M'ak chik häpe chik elh itshätäytso lep'itsek nichätpe, nech'e kok'aye. Chik n'onhonthi wok n'olhetw'et, iwohiyet'ak kawastahi, tsi nech'e häpe m'ak tä kok'aye wet häp tä is chik amel len'äfwtseye.

36“Mat häp inätw'et tä hits'ifwik wok n'opek, häp tä ihichet'ala ifwala chik häpe chik kok'aye. Mat elh chik tachuma häp elh itshätäytso lep'itsek tä ihi inät, häp tä lham tä kok'ayeje.

37“Chik yachuyaj lhoy tä letihlahchä, wet elh itshätäytso lep'itsek nichätpe, kamaj is t'at, kok'ahiyet'a. 38Wet mat chik takhalhihen häp yachuyaj lhoy, wet itshätäytso elh lep'itsek nichätpe, häp tä nemhit is, nech'e kok'aye.

39“Chik chejphä y'il elh häp itshätäy tä amel äk, elh at chik häpe chik tachuma lep'itsek õ'kokyenhiyejela pajla'tha ifwala y'uy. 40Elh chik häpe chik tufw itshäwet p'itsektso, iwohiyet'ak nilejahen lew'uyis. Tsi häp tä nech'e lham tä kok'ayeje pajla'tha ifwala y'uy. Wet elh chik häpe chik tachuma itshäwet p'itsek wet yikchufwi, iwom, iwohiyet'ak nilejahen lew'uyis, wet pajla'tha ifwala y'uy tä kok'ayeje.

41“Isit'a chik amel letufw elh chik häpe itshätäy tä lhaitonchehen honhat tä yikhen. Tsi häpe itshätäy tä matche tä ni'isa. 42Nilhokej itshätäy tä lhaitonchehen honhat tä yikhen, chik i'pe häp lets'e tä yik, wok yikej takäläy tä cuatro, wok inu'pe cuatro häp takäläy, isit'a chik amel letufw elh chik häpe. Tsi häpe itshätäy tä matche tä ni'isa. 43U'ameyejlä, isit'a chik amel t'at chik letamen amejen chik õ'näfwtse amehenpe wet õ'kokyen amehenpe elh chik häpe itshätäyna tä lhaitonchehen honhat tä yikhen. 44Tsi olham ohäpe amel Awuk Dios, wet häp tä iwohiyet'ak ka'äma matche tä let'u amehen häpkhilek lajit hach'ohleya. A'enay ot'amajchetesa, tsi ohäpe Elh tä N'ot'amajchet. Häp tä tamenej tä isit'a chik amel lekokyenej amehen elh chik häpe häp itshätäyna tä lhaitonchehen honhat tä yikhen. 45Ohäpe t'at amel Awuk, otonphähte amel tä lhehi häp Egipto häpkhilek ohäpe amel aka Dios. Wet häp tä oyok, A'enay ot'amajchetesa, tsi olham ohäpe N'ot'amajchet.

46“Häp täjtso ochufwenyaj tä yäme häp itshätäy wet afwenchey, lhäy'e nilhokej häp m'ak tä iläy tä ihi inät, lhäy'e nilhokej itshätäy tä lhaitonchehen honhat tä yikhen. 47Wet nech'e amel letäfwelej häp itshätäy tä kok'aye lhäy'e häp iyhäj tä laj lakokhayaja. Wok oyok, itshätäy tä n'olhäk lhäy'e häp iyhäj tä kan'olhäka.”

Currently Selected:

Lev 11: WCHB

Highlight

Copy