Jer 4
4
Lhawuk äp inityenej Israel lhayis chik iwo lehusey iyhäja
1Lhawuk yok:
“¡Israel lhayis, is chik letapil!
¡Is chik letapil n'oye!
Is chik lewom acheyälis tä on'äyihomche
wet nemhit letatsaywethä.
2Is chik lewo olheya tä ohäpe Dios tä n'ilataj
wet is chik matche ämet lhäy'e tä is alhoho.
Chik mälhyejtso, nilhokej wichi
tä ihiche honhatil iwujyenlan'o
wet olham otihiyeja okäpfwayaj tä is.”
3Lhawuk yäme wichi tä ihi Judá lhäy'e Jerusalén, yok:
“Tä t'unhen ahusey, lhek tech'aynej
honhat tä õ'waklhatlä tä häpkhilek õtutcheyhi.
¡Yej tutcheyhi hon'al tä ch'uthanil!
4Judá lheley lhäy'e häp Jerusalén lheley,
is chik amel lewo ahusey iyhäja
wet nemhit letäyhat ämette lewoyej n'oye.
Tsi chik kaleyache akeyis,
otihla amejen owäk, tehlat iwoye itäj,
wet ihichet'ala elh chik häpe
chik ihanej iwoyneja chik y'omat.
Judá lheley letayhfwas neke
5“Fwenhomche häp Jerusalén lheley
lhäy'e Judá lheley tä lhok,
¡Is chik pitsaje n'ofwolis tä tson'ataj ch'ul
tä nilhokpe honhat!
¡Wet äp fwitsenayej achoslis, oyaykwe,
Mäh n'alhaihutwek wet n'atiyäje
hupuy tä õyen lep'otesa n'olafwey tä t'un!
6¡Neyhatphä bandera, tayhte Sión!
¡Hoye lhip tä lelethane, kelchetshi!
Tsi olham ochenla m'ak tä ni'isa
tä tälhe lhip tä tafwojyhiye
tä häpkhila awit'äyhyaj tä wuj.”
7Nek t'at häp hin'o tä ilänhihena wichi,
tet iwoye t'owalhaj tä fwitsaj
tä tälho lhip tä yen lew'eta.
Tälho laka honhat yäk iwasthi aka honhat,
wet yen ts'anisa häpkhilek nemhit wichi ihi.
8Athana is chik letaw'uyhiche wesas tä yelaj,
wet afwchehchä wet p'altsenchehen achoslis,
tsi Lhawuk ilehiyejt'a tä iti n'amejen
lewäk tä äytajche.
9Lhawuk yok, “Chik nichäte ifwalatso,
häp reyes lhäy'e leniyatfwas nemla t'otle t'unhen
wet sacerdotes wuj tä inuhthila lhamhohen,
wet profetas matche tä nowayhihena.”
10Wet olham oyok, “Iwuk Dios,
matche tä lefwech'enwethä
wichi tä lew'et Jerusalén.
Lefwenho letamsek, mat mälhyej
chik letihi t'at lepänhi tsonhat.”
11Ifwala chik häpe lefwenhihola
wichi tä ihi Jerusalén, lhohlak,
“Nämla leyalh tä wuj tä nichayo
tä tälhche lhip tä ts'anis,
tatshupiye oka wichi.
Tehit'ala iwoye leyalh tä ni'äytajahi
tä ichäj hup tä lhahi trigo.
12Häp leyalh tä olham tä ochenla
wet lhäy'ehila lhip tä äytaji,
häpkhilek otiyej t'at letes oka wichi.”
Judá lheley letayhfwas nech'e atott'aho Jerusalén
13Lhek yahinya, lhatayhfwas mälhyej iwoye pule tä näm,
wet lakaletas tä laka'tshayajchal
mälhyej iwoye häp leyalh lhayis elh
tä matche tä äytaji,
wet lew'utey yel'atas leläfwyhayaj
tefwaype afwenche tä iyhäjkottaj.
Tä mälhyej'attso, nech'e n'amel y'anofwiyeja.
14Jerusalén lheley,
lej hach'ohley tä iyej ahusey
wet häpkhilek letefwayhen.
¿Chihlatek leleche atichunhayajay tä ni'isa?
15Näm silät tä ni'isa tä tälh tafwojyhiye,
tälhe hupuy tä lhey Dan
wet äp tälhe tachenhas tä ihi honhat
tä lewuk wichi tä tälhe letes Efraín.
Wet silät yok:
16“Fwenhomche wichi tä ihiche laka honhatil,
wet wo silätayej lhamel tä ihi Jerusalén,
tä nekhen nifwotas tä tälhe honhat tä atofwe,
lhamel ifwitsenej lechoslis
tä tatayhlä Judá lheley.
17Wet lhamel ilunhiyejlhila häp honhat tä Judá,
mälhyej iwoye sip'älis tä ilunejlhi honhat tä t'uye,
tsi häp tä Judá lheley
pajche ikachuye Lhawuk wet tatayhlä.
Lhawuk Dios lhämet täjtso.”
18“Judá lheley, amel achumyaj
lhäy'e akeyis tä ni'isachehen
häp tä tamen amejen.
Äytajichela otasnhayaj tä otihla amejen,
tehlat iwoye n'ofwajnhat tä tiyäjo otley.”
Jeremías y'äyen laka wichi
19Olham otichunhayaj tä ohanhiyejt'a owoyneja
tsi häp tä ot'otle tan'ajlhaphä.
Oyalh äytaji, wet n'am hanej
owoyneja chik owo tamseka.
Tsi oläte tson'ataj ch'u lechos lhäy'e n'ot'änyajay
tä yäme tä nichäte lewhäy n'oka'tshayaj.
20Ichepej n'olhämet tä yäme
tä ilhatpe lhawit'äyhyajay,
tsi häp nilhokej honhat
tä m'ak tä ni'isa tä ihi.
Lhawukwey yofwajkwet wasiche
wet lhaw'etes nofwej t'at.
21¿Atsihila lewhäy chik häpe
chik nemla ow'en lhatayhfwas laka bandera
wet nemla oläte laka tson'ataj ch'ul lechoslis?
22Lhawuk yok:
“Oka wichi isihent'a m'ak tä iwoye,
nitäfwenhit'a n'oyej.
Tet iwoye n'atfwas tä nhana m'akejen,
lehusey ihihit'a.
Ihanej tä iwoye m'ak tä ni'isa,
mat m'ak tä is ihanhiyejt'a tä iwoye.”
Jeremías hiw'enlä n'otäyhyaj tä tatay alhoho
23Tä oyahinpe honhat,
nemhit kalelhäj m'ak tä häpe,
wet tä oyahin puleye, nemhit äp isi.
24Tä oyahin tachenhase, wet w'ahuwethä.
25Tä oyahinpetso, wet n'am w'enhit hin'o,
wet nilhokej afwenchey yikhen.
26Wet ow'en tä yachuyajw'etes nech'e ts'anis t'at,
wet nilhokej hupuy tä wasiche.
Lhawuk matche tä itiyej lewäk tähestso.
27Lhawuk lhämet yok:
“Nilhokej honhat tä wasihila,
tha häp tä imälhehit'alawek chik otäyhat.
28Honhat iwohla lelhakliya
wet pule ichalajihila.
Olham olhämet täja wet owohit'a elha otichunhayaj,
tsi m'ak tä owoye, owoye t'at.”
29Tä yel'atas lewuhuy t'änhen,
lhäy'e lutsej hal'ä lewuhuy,
wet nilhokhiyeja wichi tä inukwe alhoho.
Iyhäj weskathomche hon'al
wet iyhäj taw'ulhche'pe tachenhas tä ilethanpe.
Lajit lheleya hupuy
wet newache elh chik imälhehi.
30Wet am, Jerusalén, am tä awasi,
¿chipte tä letaw'uyhi haw'uy tä ichät?
¿Chipte tä lethat amej amsilis tä oro
wet lepakhen atet'ähes?
Tek wo m'ak chik tälhe asilatyajtso,
tsi Egipto lhäy'e Asiria tä lehumin,
lefwetaj lhen hach'otfwasa,
nemhit iwat ahilä mat t'uhläk ailän.
31Oläte n'ot'änyaj, te iwoye
atsinha tä nech'e tä lhäs nekche.
Wet mälhhiyejatso Jerusalén let'änyaj,
ipiyenphä takweyey wet yok:
“¡Matche tä äytajchey, oyalh tatäy,
n'olhikoyis tä ilänn'o!”
Currently Selected:
Jer 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
