Gén 25

Abraham leles tä ihihlä lech'efwa Cetura

(1~Crón 1.32-33)

1Abraham iwo elha lech'efwa wet iyej atsinha tä lhey Cetura. 2Wet leles tä ihihlä atsinhatso lheyis Zimram, Jocsán, Medán, Madián, Isbac, lhäy'e Súa. 3Jocsán häp tä Seba lhäy'e Dedán lajcha, wet Dedán leles häpehen wichi tä lheyis Asur lhayis, Letús lhayis, lhäy'e Leum lhayis. 4Wet Abraham lhäs elh tä lhey Madián leles lheyis Efa, Efer, Hanoc, Abida, lhäy'e Elda. Nilhokej tähestso häpehen Cetura leles.

5Wet nilhokej m'ak tä lewuk Abraham, lewuk t'at lhäs Isaac. 6Wet leles iyhäj tä lakolis atsinhay iyhäj, tajlhamat t'awayhtes tä Abraham hiw'enhomche. Wet tä kamaj iläy, hiw'enhat Isaac, wet ichen leles iyhäj yämthilek lhamel yen lew'eta honhat tä tumej hichä.

Abraham ileyej honhat wet õtjänch'oye

7-8Abraham hiw'en p'ante ciento setenta y cinco (175) nekchämis, lhäy'e lhip tä hich'ut, wet ileyej honhat wet ihoye lechätilis. 9-10Wet leles tä häpe Isaac lhäy'e Ismael, lhamel itihi lep'itsek häp chowej tä ihi chenaj tä ihi honhat lhip tä lhey Makpela tä tumej hupuy tä Mamre lhip tä hichä. Häp chowejtso pajche lewuk Sóhar lhäs tä lhey Efrón, häp Het lhayis elh. Mat Abraham ichäj p'ante wet häpe t'at tä õ'tihi Abraham lep'itsek lhäy'e lech'efwa Sara.

11Tä tajyäme tä Abraham ileyej honhat, Dios itiyej lakäpfwayaj tä is häp Isaac, tä lew'et iwhäye lepek tä lhey “N'ilataj hiw'enn'o”.

Ismael leles

(1~Crón 1.28-31)

12Häp tähesna leles häp Abraham lhäs Ismael tä lako Agar, häp atsinha tä häpe p'ante Sara lakawo'tsinha. 13Ismael lhäs tä ichun lhey Nebayot, wet lech'inhis lheyis Kedar, Adbeel, Mibsam, 14Mismá, Duma, Masá, 15Hadar, Tema, Jetur, Nafís, lhäy'e Cedema. 16Häp tähestso lheyis häp doce Ismael leles, wet elh weihalhapej lhey häpe t'at tä õyen lheya laka honhat wok lew'et. Elh weihalhapej niyatej t'at wichi tä iyej.

17Ismael ileyej p'ante honhat tä hiw'en ciento treinta y siete (137) nekchämis, wet ihoye lechätilis p'ante. 18Wet leles ifwtsatpehen honhat tä iwhäye Egipto, tälhe honhat tä lhey Havila pajtha nichäte honhat tä lhey Shur, imälhewek honhat tä tataye Asiria. Wet tej tä lepuhfwas n'äyihomche lhamel, mat ihi t'at honhatestso.

Nech'e ichehen p'ante Esaú lhäy'e Jacob

19Häp täja Abraham lhäs Isaac leles p'ante. 20Isaac hiw'en p'ante cuarenta nekchämis tä lham yen lech'efwaya Rebeca, häp Betuel lhäse wet lechila lhey Labán. Lhamel häpehen t'at Aram lhayis tä lew'et honhat tä lhey Padán-aram. 21Wet Rebeca tek iwo p'ante lelesa, häpe atsinha tä sufwnaj t'at. Wet Isaac y'alhyene Dios, wet Dios nichulho t'alhyaj wet häp tä nech'e hich'otshan Rebeca. 22Wet täkwfwas leles tä ihi lakachowej, wet lhamel lhaihutwethä tä ihi lako. Tä mälhyejtso, Rebeca letichunhayaj yok, “Chik mälhyejtso, is chik oy'il t'at.” Wet ihoye lhip tä yen lew'eta tä iwopej t'alhyaja, wet t'alhe Lhawuk chik itäfwnhatej m'ak tä tamenej leles tä lhaihutwethä. 23Wet Lhawuk nichulho wet yok:

–Iche täkwfwas nä'tshas tä i'amhi tä häpkhila letetsel wichi tä lhaiw'enhathen. Häp tä tamenej tä lhaihutwethä tä kamaj nichätahchä lhamel. Elh lakhajyhayaj inuhla'pe elh, wet lech'inij yenla lakawoya häp lechila.

24Tä paj nichäte p'ante ifwala tä Rebeca iwo lhäsa, wet häpe täkwsilis. 25Wet elh tä ichun tä nichätchä häpe elh tä ichät, wet wuj lew'oley tä i'pe t'äj, wet lhamel yen lheya Esaú.#25.25 Häp n'olhey Esaú yok, Wuj lew'ole. 26Wet elh tä imälheche len'äyij itsok t'at elh sät tä nichätchä. Häp tä tamenej tä lhamel yen lheya Jacob.#25.26 Häp n'olhey Jacob yiwitej n'olhämet p'ante yok, N'osät.

Tä Rebeca iwo lelesa, Isaac hiw'en p'ante sesenta nekchämis.

Esaú ichäjej lhäk häp len'ohyaj tä häpe n'ochunkatsek

27Wet nä'tshas lhaichihelthen. Wet Esaú häpe hin'o tä n'olhäkcha, ihumin tä w'elek, wet Jacob häpe elh tä iwo letamseka, ihi t'at lew'et. 28Wet Isaac wuj tä ihumin Esaú, tsi ikän itshäwet tä Esaú ichäjpej tä tälhe tayhi. Wet Rebeca ihumin Jacob.

29Fwala elh p'ante Jacob yenlhi lhäk tä ipen. Wet Esaú näm tä tälhe tayhi, wuj tä y'el, 30wet tahuyej lech'inij wet yok:

–¡Oy'el wet onchuyu! ¡Kelit, w'en n'oho lhiphaj apenek tä ichäthi!

Täjtso häp tä tamenej tä Esaú lhey elh p'ante Edom, tä yiwitej n'olhämet p'ante yok, Ichät. 31Jacob nichulho lechila wet yok:

–Chunkat w'en n'oho han'ohyaj tä n'oalechunkatsek.

32Esaú yok:

–Lew'en t'at tä wuj tä onchuyu, oy'ilej nehlä. Niwohit m'ak chik oisej tä ohäpe elh tä n'ochunkatsek.

33Jacob yok:

–Unhatche n'oyej ämet athana.

Wet Esaú hit'unhatche lhämet tä iwoyeje lech'inij, tä hiw'enho t'at lham len'ohyaj tä häpe n'ochunkatsek.#Heb 12.16 34Tä ileyej, nech'e Jacob hiw'enho pan lhäy'e lepenek lhip, wet Esaú tufw t'at wet iyä. Tä ileyej, wet yik, yen w'et m'ayeka len'ohyaj tä häpe elh tä n'ochunkatsek.

Currently Selected:

Gén 25: WCHB

Highlight

Copy