Gén 19

M'ak tä hich'atej tä ni'isa tä Sodoma lheley iwoye

1Tä ifwala y'uy, ángel täkwfwastso nichäte p'ante Sodoma. Lot tatayphä t'at tä ihi lepe n'olafwek tä ilunej hupuy. Wet tä hiw'enlä lhamel, nephä tä ihohlä. Tä nichäte, t'upeyhchä tä n'okwiyej pajtha letacho taje t'at honhat. 2Wet tahuyej wet yok:

–Iwuhuy, woye tä owoye, is chik lemähi ow'et tä akawon'o, wet lejen apach'ol, wet chik fwala letujlhache han'äyij.

Mat lhamel nichulho wet yok:

–Kha, omähla alhoye olhamel.

3Matkat Lot inityen, tä lepese lhamel iwoye t'at, yikche Lot tä yäple lew'et. Tä nichäte, wet lham yenlhi lhäk lhäy'e pan tä levadura newayej. Tä wak'alh, lhamel tufw t'at.

4Wet tä kamaj nimäyahen, nilhokej hin'ol tä ihi Sodoma lhamel lhaihutej Lot lewukwe, hin'ol tä thänhäy, mamses, 5lhamel t'änhen tä yok:

–¿Chip ihitso hin'ol tä näme haw'et? ¡Tonphä, olhamel ot'uhläk omäyejwethä!

6Tä Lot iläte, ihoye wichi tä ilunejlhi lewukwe, wet tä inuphä, hip'ohi lepe 7wet tahuyej tä yok:

–Yaiyhäj, woye tä owoye, yej woye m'ak tä hich'atej tä ni'isa. 8Olham oles tsinhay iche, täkwfwas lhamel wet kamaj niwohit hin'o chik lhay'ajej. Otonhiphäla lhamel, yämthilek lewoyeje m'ak tä let'uyayhläk lewoye. Mat häp hin'ol tä iyej ow'et, on'äyej lhamel tsi olham t'at tä ohänene ow'et.

9Matkat wichi nichulho wet yok:

–¡Ho kanhi! ¡Am ahäpe hin'o tä w'enha lhamej wet athana nech'e let'uhläk olhamel otch'ahu ame wet owoye ämet! ¡Onuhthila'pe m'ak chik owoyeje häp hin'ol tä i'amej m'ak chik owoyej ame!

Wet wichi wespe Lot, wet yike huppe tä t'uhläk y'ajo. 10Matkat hin'ol tä iyej ipiyne takwey Lot wet iton lech'oye wet hip'ohi lepe. 11Wet y'omathen tatelhoy wichi tä i'alhoye, mamses lhäy'e thänhäy, nilhokej asnamis t'at, wet hiw'enhit'a huppe.#2~Rey 6.18

Ángeles itonphä Lot tä ihi Sodoma

12Wet häp hin'ol tä iyej Lot tahuyej wet yok:

–¿Hä iche aiyhäj tä ihi hupuyna? Chuma ales lhäy'e ales tsinhay, lhäy'e awhayenhay, lhäy'e nilhokej aiyhäj, tonphä wet häne lhip tä atofwehlä täja, 13tsi olhamel otäyhthila hupuy. Lhawuk hiw'en tä lhäy'e lhip m'ak tä ni'isa tä wichina iwoye, häp tä tamenej tä ichen n'oyehen yämthilek otäyhat.

14Tä mälhyejtso, Lot ihoye hin'ol tä t'uhläk yen lech'efwasa leles tsinhay. Wet tahuyej wet yok:

–¡Nechephä, mäch'oye täja! ¡Lhawuk itäyhthila hupuyna!

Matkat hin'oltso ikachu Lot lhämet, fwetaj iläkwethä. 15Wet nech'e tatäy lhimphaj wet noj t'at honatsi, wet ángelestso tahuyej Lot wet yok:

–¡Akelitlhi, nephä, chuma hach'efwa lhäy'e ales tsinhay wet mähen, häpkhilek katan'isayej wichina chik otäyhat!

16Mat Lot tek lhaikelitlhi. Tä mälhyejtso, ángeles itsok takwey, lhäy'e lech'efwa, lhäy'e leles tsinhay, wet yikchufwi yämthilek atofwehlä hupuy wet tafwayhen. Tsi Lhawuk hip'altsen t'at. 17Wet tä atofwehlä hupuy, elh ángel tahuyej wet yok:

–¡Mäh nukwe alhoho chik let'uhläk kat'ilahen, wet yej yahinchela tä letälhche, wet yej takasthila lech'ona mat hoyaye chenhas wet afwayhthen!

18-19Matkat Lot yok:

–¡Iwuhuy, amel wuj tä lep'altsenn'o wet lefwayhat'atn'o! Oyenek okalhihit'a chik ohoye chenhas, tsi n'otäyhyaj ifwitlatn'o wet oy'inhila chik kamaj oihi n'äyij. 20Lhek yahin, iche hupuy tä niwuja tä ni'tofwaye kana. Häp tä is chik ohoye wet olethane. ¡Olhaip'altsen amehen, ch'anlha n'oye tä ohoye häpkhilek n'am t'il!

21Tä mälhyejtso, elh ángel yok:

–Is t'at, olät ame, owoye t'at m'ak tä let'alhej n'oye. Tek otäyhthila hupuy tä lhämetso. 22¡Mat keltshi, mäh a'tofwichela, tsi ohanhiyejt'ak okelit m'ak tä owoye chik kamaj kachätaye hupuy tä lehoye!

Tä Lot yok, “Lhek yahin, iche hupuy tä niwuja”, häp tä tamenej tä õyen lheya hupuytso Zoar. Zoar yiwitej n'olhämet tä yok, Niwuja.

Dios itäyhat Sodoma lhäy'e Gomorra

23Wet tä nech'e ifwala iwo tesa tä inuphä, Lot nichäte Zoar. 24Häpet tä mälhyejtso, Lhawuk itsäype itäj lhäy'e azufre häp Sodoma lhäy'e hupuy elh tä lhey Gomorra. 25Wet tatäy, lhäy'e nilhokej wichi tä ihiche, lhäy'e mälhewek tayhi. 26Wet Lot lech'efwa, tä iläte itäj tä tech'elh, iyahinche len'äyij tä tälhche. Häpet tä mälhyejtso, welan n'ocheyäya tä nisoy t'at.

27Wet tä nech'e fwala tä ifwala elh, Abraham ihoye lhip tä lham ihi naji tä tahuyej Lhawuk. 28Wet iyahne Sodoma lhäy'e Gomorra lhäy'e honhat tä ihi, iche tutsaj tä tälho, hätet iwoye tä tälhche n'onhonthi.

29Mälhyej p'antetso tä Lhawuk itäyhat hupuy tä Lot ihi. Mat yen tichunhayaja Abraham, wet häp tä itonphä Lot wet ifwayhtej lewit'äyhyaj.

Moab lhayis lhäy'e Amón lhayis letetsel

30Lot nowaye wichi tä ihi Zoar, wet häp tä yikch'oye wet ihoye chenhas. Wet yen lewukweya chowej tä ihi chenaj, lhäy'e leles tsinhay. 31Wet lhäse tä thaläkw tahuyej lech'inhä wet yok:

–Lhajcha hich'ut t'at, wet newache hin'ol chik ihi honhat tä y'ehina yämthilek häpe lhach'efwas, mälhyej wichi lakey. 32Tä mälhyejtso, n'ayäyneja vino lhajcha pajla'tha w'oknaj, wet n'amäyej häpkhilek lhales ihihlä.

33Tä mälhyejtso, honatsitso leles tsinhay iyäynej vino häp Lot pajtha w'oknaj, wet lhäse elh tä thaläkw imäyej. Mat Lot tek ihan lhamej tä iwoye täjtso.

34Tä ifwala elh lhäse tä thaläkw tahuyej lech'inhä wet yok:

–Honajche mathi omäyej lhajcha. Tä mälhyejtso, honatsina n'ayäyneja vino, wet chik w'oknaj amlak lemäyej, häpkhilek y'awo lhalesahlä.

35Tä mälhyejtso, honatsitso lhamel iyäynej vino lajcha pajtha w'oknaj, wet lhäse elh tä nithaläkwa imäyej. Mat Lot tek ihan lhamej tä iwoye täjtso. 36Wet nech'e hich'otshanhen Lot leles tsinhay tä imäyejlhi lajcha. 37Wet elh tä thaläkw iwo lhäsa wet yen lheya Moab,#19.37 Häp n'olhey Moab yiwitej n'olhämet p'ante yok, Tälhe ojcha. wet häp tä Moab lhayis letes p'ante. 38Häte Lot lhäse elh tä nithaläkwa iwo lhäsa wet yen lheya Ben-amí,#19.38 Häp n'olhey Ben-amí yok, Oka wichi tä lhäs. wet häp tä Amón lhayis letes p'ante.

Currently Selected:

Gén 19: WCHB

Highlight

Copy