Gén 18
18
Lhawuk isikaye Abram wet yachajo tä ifwenho tä lhäs ihichela
1Lhawuk lhain'ältej p'ante Abraham tä iwhäye hal'ätas tä lewuk Mamre. Ifwala ihi lechowej wet tä Abraham tatayphä t'at tä ihi lepe lewukwe tä tsänt'äj, 2iyahinphä wet t'iseltej tä hiw'en hin'ol tä ihi tres tä takasitwhäye. Wet ikelit tä nephä wet n'okwiyej, t'upeyhchä pajtha letacho taji honhat.#Heb 13.2 3Wet yok:
–Iwuk, olhaip'altsen ame, yej lhek ayej. 4Chik lehuminche, oyike inät häpkhilek lelejen apach'ol wet lewo ayej elakw'etachufwi hupelna. 5Tsi w'et lehohit'a n'oye tä ohäpe akawo. Ochäjla amehen m'ak chik letufw häpkhilek atkhajayhen chik letujlhache han'äyij.
Lhamel nichulho Abraham wet yok:
–Is t'at, enlhi t'at m'ak tä lhäme.
6Wet Abraham tiyäjchufwi lewukwe wet tahuyej lech'efwa Sara wet yok:
–Kelit, chuma tres lehis harina tä is wet enlhi pan.
7Wet inu alhoho Abraham tä ihoye leläy wet tachuma w'asetaj lhäs tä wuj tä isilataj. Wet hiw'enho elh lakawos wet yok:
–Kelit tä lhenlhi yämthilek olhamel otufw.
8Wet tä wak'alh lhäk tä lhamel yenlhi, Abraham hiw'enho laka'siykas tä iyej. Häte hiw'enho itshäwet kat'os, lhäy'e häp lhip tä isop'anhi, wet lhamel t'ekhen tä ichufwi hupel.
9Tä ileyej tä t'ekhen, hin'oltso tay'ätshane Abraham wet yok:
–¿Chip ihi hach'efwa Sara?
Abraham nichulho wet yok:
–Ichufwi lewukwe.
10Wet elh hin'oltso yok:
–Chik nekchäm elh äp onämla wet ow'enla tä hach'efwa Sara iwohla lhäsa.
Wet Sara lham ihi t'at lepe tä iw'echehi Abraham, iläte hin'ol tä yämhoplhi. 11Wet Abraham lhäy'e Sara häpehen iyhäj tä hich'uthen t'at, wet Sara nemhit nowaylhi. 12Wet häp tä Sara iti lhamhi letichunhayaj wet t'ischeylhit lhamej wet yok:
–¿Chiwoye tä ohäpe atsinha tä hich'ut, häte owuk häpe hin'o tä hich'ut t'at, wet ihla n'oyej m'ak tä mälhyejtso?
13Wet Lhawuk tahuyej Abraham wet yok:
–¿Chipte tä t'ischeylhi Sara wet yok, “Mathichela p'iyak owohla olhäsa tä ohäpe atsinha tä hich'ut t'at”?
14Wet äp Lhawuk yok:
–¿Hä iche m'ak tä olham n'am hanej owoyneje yämthilek owoye?#Luc 1.35-37 Chik nichäte lewhäyna chik nekchäm elh, äp onämla wet ow'enla tä Sara iwohla lhäsa.
15Wet Sara t'iseltej tä iläte, wet noway wet fwetaj lhaikachu tä t'ischeylhi wet yok:
–Ot'ischeyhit'ane.
Mat Lhawuk yok:
–Oahiw'enne tä let'ischeylhi.
Abraham iwo t'alhyaja'pe hupuy tä Sodoma
16Wet nech'e nechephä hin'oltso wet yikhen tä ihoye hupuy tä Sodoma. Wet Abraham yikejche yämthilek iwo tsilhekayej. 17Wet nech'e Lhawuk letichunhayaj yok, “Isit'ak n'am fwenho Abraham m'ak tä owohiyela, 18tsi häpkhila lajcha wichi tä wuj wet takhajayhen. Ofwenho naji olhämet tä otälhthiyela okäpfwayaj tä otihiyeja wichi tä w'enhache lhamej tä ihiche nilhokej honhates. 19Ottshupiye häpkhilek ifwenho leles yämthilek lhamel lhäy'e leles tä nekche len'äyij iwoye nilhokej olhämtes wet iwoye nilhokej m'ak tä is alhoho, häpkhilek olham oyäm matche olhämet tä ofwenho.”
20Tä mälhyejtso, Lhawuk tahuyej Abram wet yok:
–Wichi tä ihi Sodoma lhäy'e Gomorra letoyaj iyeji m'ak tä lhäy'e lhip tä ni'isa, wuj lech'isukyajay. 21Athana ohoye yämthilek ow'en chik matche m'ak tä otoyneje, wok kha.
22Wet täkwfwas iyhäj hin'oltso yikhen tä ihoye Sodoma, mat Abraham kamaj ihi t'at tä Lhawuk tatache. 23Wet Abraham lhayämte wet tay'ätshane tä yok:
–¿Hä letan'isthiyeja wichi tä isen häp iyhäj tä ni'isahen chik letäyhat? 24Tsi elat iche cincuenta wichi tä laj letesa tä ihi hupuy. Wet chik iche, ¿hä letäyhthila hupuy wet tek lep'altsen tä iche iyhäjtso? 25¡Isit'ak lewoye täjtso! Chik lelän iyhäj tä letes ihi, yej p'ajtej iyhäj tä laj letesa. Tsi chik lewoye täjtso, hätet iwoyek nilhokej t'at tä iwoye m'ak tä ni'isa. ¡Yej woye täjtso! Am tä ahäpe N'okalelhthayajwo tä is alhoho tä itetshan nilhokej wichi tä i'pe honhat, iwohiyet'ak kawoyaye m'ak tä is alhoho.
26Tä mälhyejtso, Lhawuk nichulho wet yok:
–Chik ow'en cincuenta wichi tä laj letesa chik ihi hupuy tä Sodoma, lhamenlak tamenej chik otäyhtej letes nilhokej wichi.
27Tä Abraham iläte, wet yok:
–Yej lhen tesa n'oyej tä olhaichunkat ahilä tä ahäpe Dios, tsi olham ohäpe hin'ofwaj t'at. 28¿Chiwoyek iche p'iya cuarenta y cinco wichi tä laj letesa? ¿Hä letäyhthila t'at hupuy?
Lhawuk nichulho wet yok:
–Chik ow'en cuarenta y cinco wichi tä laj letesa, tek otäyhthila hupuy.
29Abraham yachajo tä yok:
–¿Chiwoyek tajlhamat cuarenta chik iche?
Lhawuk nichulho wet yok:
–Chik iche cuarenta, tek otäyhthila hupuy.
30Abraham yachajo tä yok:
–Athana olhaip'altsen ame, yej afwitsaj n'oye tä oyachajopej tä ot'alhej ame täja. ¿Chiwoyek tajlhamat treinta chik iche?
Lhawuk nichulho wet yok:
–Chik iche treinta, tek otäyhthila hupuy.
31Abraham yachajo tä yok:
–Iwuk, ohäpe hin'o tä olhaichunkatlhi ahilä tä oyämlhi amho. ¿Chiwoyek tajlhamat veinte chik iche?
Lhawuk nichulho wet yok:
–Chik iche veinte, tek otäyhthila hupuy.
32Kamaj Abraham yachajo tä yok:
–Woye tä owoye, yej lhen tesa n'oyej tä oyachajo tä oyämlhi amho, wet lepes t'at tä oailhaklit. ¿Chiwoyek tajlhamat diez chik iche?
Lhawuk nichulho wet yok:
–Chik iche diez, tek otäyhthila hupuy.
33Wet nech'e Lhawuk ileyej tä yämhoplhi Abraham wet yikch'oye, wet Abraham yäple lew'et.
Currently Selected:
Gén 18: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
