Éx 40

Dios ne'tek Moisés itshänchä carpa tä lew'et wet õyen t'amajcheta

1Lhawuk tahuyej Moisés wet yok:

2–Häp iwel'a tä ichun, häp ifwala tä ichun, tshänahchä carpa tä ow'et yämthilek ohoyepej oka wichi. 3Wet tihila lech'o häp Arca tä Ot'amajchet tä olhämtes ihi, wet p'oyejahlä wesaj tä lep'ot. 4Tila lech'oye häp mesa wet tila'pe m'ayhay. Tilawhäye häp n'ochäkwhis wet tihichela n'ochäkwis. 5Häte tila lech'oye häp altar tä oro tä m'ak tä akäjche lew'et. Tihila tä Arca tä Ot'amajchet tatache, wet p'oyejila wesaj häp carpa lepe.

6“Wet häp altar tä itshätäy tä õ'länhen lew'et, iwthaynhila lepe. 7Wet inät lehi tumtejahlä häp lepe tä altar yiwithi wet tsäyhola inät. 8Wet enlhila lep'ot tä häte iwoye n'olafwek yämthilek lelafwejlhi, wet p'oyejila wesaj häp lepe.

9“Wet chumela aceite tä õ'tsäype m'ak chik õyen t'amajcheta. Wet tsäyla'pe ow'et lhäy'e m'ayhay tä ihi häpkhilek lhen ot'amajchetesa, wet häpkhila ow'et tä ot'amajchet t'at. 10Häte tsäyla'pe aceite häp altar tä itshätäy tä õ'länhen lew'et, lhäy'e nilhokej m'ayhay tä iyej, häpkhilek lhen ot'amajcheta, wet häpkhila altar tä ot'amajchet tä lhamya. 11Häte aceitetso äp tsäyla'pe inät lehi lhäy'e lew'et, wet ena ot'amajcheta.

12“Wet hänela Aarón lhäy'e leles häp carpa lepe, wet is chik lhamel inay. 13Wet is chik Aarón taw'uyhi lew'uyis tä n'ot'amajchetes. Wet tsäyla'pe aceite häp lham wet ena ot'amajcheta tä häpe oka sacerdote. 14Häte leles häna alhoho wet w'uyyenhichela lakay'uchelis. 15Wet tsächela'pe aceite, mälhyej tä lewoyeje Aarón, yämthilek häpehen oka sacerdotes. Wet häp n'otetnektso tä õ'tsäche'pe aceite lhamel, tek tatäyhiyeja tä häpehen t'at oka sacerdotes tä nittäya pajla'tha nichäte lepes lheley.”

Moisés iwoye m'ayhay mälhyej tä Lhawuk ifwenho

16Moisés iwoye nilhokej m'ayhay mälhyej tä Lhawuk ne'tek iwoye. 17Wet häp nekchäm dos tälhe ifwala p'ante Israel lhayis yikch'oye Egipto, wet iwel'a tä ichun, ifwala tä ichun, õ'tshänchä carpa tä Dios lew'et. 18Moisés ineyhatphä, wet itiche'pe lew'etes häp ch'utey. Wet äp ikasthaynhen häp tablas, wet hip'ajtej lemäynhay, wet itshänchehchä lech'utey. 19Wet hich'enpe carpa häp Dios lew'et, wet hip'o'pe lhip tä tumphä, mälhyej tä Lhawuk ne'tek iwoye.

20Wet nech'e Moisés tachuma häp tunte lhipey tä Diez Mandamientos i'pe, wet ithatho Arca tä N'ot'amajchet tä pajche õyenlhi. Wet y'uyitchehen hal'äy häp argollas tä ihi Arca, wet äp iti'pe lep'ot tä häpe Dios Lep'altsenyajw'et. 21Wet nech'e ihän lech'oye Dios lew'et lhip tä T'amajchet, wet hip'oyejlä sak'al tä lep'ot, wet nemhit n'äle häp Arca, mälhyej tä Lhawuk ne'tek Moisés iwoye.

22Wet Moisés iti lech'oye mesa häp Dios lew'et. Itihi lech'o elh, itumtej lhip tä tafwojhiye, iw'echehi häp sak'al tä õhp'oyejlä Arca tä N'ot'amajchet. 23Wet itiche letape häp pan tä i'pe mesa tä ihi tä Lhawuk tatache, mälhyej tä lham ne'tek Moisés iwoye. 24Häte Moisés itihi n'ochäkwhis häp lech'o tä mesa ihi. Wet itayhatlä häp mesa, itumtej lech'o lhip tä tapinhiye. 25Wet iwunhen n'ochäkwis tä ihi tä Lhawuk tatache, mälhyej tä lham ne'tek Moisés iwoye.

26Häte altar tä oro Moisés iti lech'oye häp lech'o tä mesa lhäy'e n'ochäkwhis ihi. Itayhatlä sak'al tä õhp'oyejlä häp Arca tä N'ot'amajchet, 27wet iwunho incienso tä lenij akäjche, mälhyej tä Lhawuk ne'tek iwoye.

28Wet hip'oyeji wesaj tä lep'ot häp lepe, 29wet itihi tä lepe tatache häp altar tä õ'ti'pe itshätäy tä õ'länhen. Wet iwunho itshätäy lhäy'e yachuyaj lhay tä õyen Lhawuk t'awayhtesa, mälhyej tä Lhawuk ne'tek iwoye.

30Wet inät lehi Moisés itumtejlä häp lepe tä altar yiwithi, wet itsäyho inät. 31Wet häp tä Moisés lhäy'e Aarón, lhäy'e leles, lhamel tachumapej inät tä ihi wet ilejejchehenpej takweyey wet ilejenpej lepach'ol. 32Tä lhamel ihochufwi Dios lew'et, wok ihowhäye altar, ichun tä lhailejenpej, mälhyej tä Lhawuk ne'tek Moisés iwoye.

33Wet tä lepes, Moisés ineyhatphä lelafwek tä ilunejlhi Dios lew'et lhäy'e altar. Wet hip'oyeji wesaj tä lep'ot häp lepe n'olafwektso.

Pule nichätpe Dios lew'et

(Núm 9.15)

Tä wak'alh Moisés lechumet tä ineyhatphä Dios lew'et, 34wet pule hip'o'pe häp carpa wet Lhawuk lewujyaj tä isi tapoyejej.#1~Rey 8.10-11; Isa 6.4; Ezeq 43.4-5; Apoc 15.8 35Wet Moisés ihanhiyejt'a iwoyneje chik ihochufwi häp carpa, häp tä pule hip'o'pe wet Lhawuk lewujyaj tä isi tapoyejej.

Pule häpe Israel lhayis n'äyijwo p'ante

(Núm 9.15-23)

36Tä puletso lhaitonitphäpej tä i'pe Dios lew'et, wet Israel lhayis yikpejch'oye lakasthawet wet tujlhache len'äyij. 37Mat chik pule lhaknitonitaphä tä i'pe Dios lew'et, wet lhamel yikhihent'a, pajtha näm ifwala tä pule lhaitonitphä. 38Nilhokej ifwalas tä lhamel iwo lew'ekyaja, hiw'en t'at häp puletso tä i'pe Dios lew'et, wet tä honatsi itäj t'at tä ihi pule.

Currently Selected:

Éx 40: WCHB

Highlight

Copy