Éx 39

Õyenlhi sacerdotes lew'uyis

(Éx 28.1-5)

1Õtchuma wesaj tä y'it lhäy'e tä ifwak'an wet äp ichät, wet õyen sacerdotes lew'uyisa yämthilek lhamel tach'ote Lhawuk lechumet tä ihi lew'et lhip tä T'amajchet. Wet õyenlhi Aarón lew'uyis tä t'amajchetes, mälhyej tä Lhawuk pajche ifwenho Moisés.

Õyenlhi efod

(Éx 28.6-14)

2Wet õyenlhi efod, häpe t'at oro, lhäy'e wesaj tä y'it lhäy'e tä ifwak'an wet äp ichät, wet häpe lino tä õ'pätsin. 3Wet õtchuma oro lhip wet õ'käji pajtha isänhän. Wet õyäm lelemsas tä õhch'esajchehen, wet nech'e õ'tsekej wesaj tä y'it lhäy'e tä ifwak'an wet äp ichät, lhäy'e häp lino, tä õyen lhäya. 4Wet õhp'ajtej efod häp täkwfwas t'akay tä õ'tihiche lepesey. 5Wet häp lakawak tä õ'nayhtejpe efod, häpe t'at efod lhip wet äp oro, wet äp häpe wesaj tä y'it lhäy'e tä ifwak'an wet äp ichät, wet häpe lino tä õ'pätsin, mälhyej tä Lhawuk pajche ifwenho Moisés.

6Wet õyenwethä tuntey tä cornalina, hätet iwoye anek lhawo, wet õ'tiche'pe lew'etes tä oro. Wet õ'ti'pe Israel leles lheyis tä õ'lesayen, hätet iwoye sello. 7Wet õ'ti'pe häp efod t'akay häpkhilek tek õhp'ethatlä häp Israel leles, mälhyej tä Lhawuk pajche ifwenho Moisés.

Õyenlhi n'ot'okwep'ot

(Éx 28.15-30)

8Häte õyenlhi Sacerdote tä Lhamya let'okwep'ot. Õ'tech'aynej häp efod, wok oyok, häp n'oyik tä õ'wo lhäya. Wet oro t'at, wet äp häpe wesaj tä y'it lhäy'e tä ifwak'an wet äp ichät, wet häpe lino tä õ'pätsin. 9Wet õyäm tach'opway, wet veintidós centímetros tä pitaj, wet tä tsajo w'awulhi tä pitaj. 10Wet häp tä õ'ti'pe häp tuntey tä isis, õ'tihi cuatro tä õ'fwilhkatchehchä. Wet fila tä ichun õ'tihi rubí, lhäy'e tunte tä ika'tu tä lhey crisólito, lhäy'e tunte tä w'atshan tä lhey esmeralda. 11Wet fila elh õ'tihi tunte elh tä anek lhawo, lhäy'e tunte tä ifwak'an tä lhey zafiro, lhäy'e elh tä lhey jade. 12Wet fila elh õ'tihi tunte tä ichät tä lhey jacinto, lhäy'e elh tä lhey ágata, lhäy'e elh tä ifwak'an tä lhey amatista. 13Wet fila tä lepes õ'tihi tunte tä ika'tu tä lhey topacio, lhäy'e elh tä cornalina, hätet iwoye anek lhawo, lhäy'e elh tä w'atshan tä lhey jaspe. Tunteyna õ'tiche'pe lew'etes tä oro, 14wet iche doce, tsi doce lheyis häp Israel leles. Tunte weihalhapej õ'lesayen, tet iwoyek sello t'at, tä häpe lheyis häp Israel lhayis tä tälhehen letetsel tä ihi doce.

15Häte õyenlhi cadenas tä oro, wet õ'ti'pe n'ot'okwep'ot wet õ'pätsinchehen, õ'tech'aynej niyhäy. 16Wet õyenlhi tuntey lew'etes tä oro, täkwfwas lhamel, lhäy'e täkwfwas argollas tä oro. Wet õ'tihi elh häp n'ot'okwep'ot lepes wet elh õ'tihi lepes elh. 17Wet argollastso õ'tihiche häp cadenas, 18wet cadenas lepesey häp tä õ'tiche'pe häp tuntey lew'etes, wet õyäytejen häp efod t'akay tä ihi tä tatache. 19Wet õyenlhi täkwfwas iyhäj argollas tä oro, wet õ'tihiche n'ot'okwep'ot letselhäs tä tumchä tä tumejlä efod. 20Wet äp õyenlhi täkwfwas iyhäj tä oro, wet õ'tiche'pe efod t'akay lhipey tä tumchä tä ihi tä tatache. Õ'tiwhäye n'otsekkay wet õ'tumtejlä kawak tä efod t'ak. 21Wet õyäytej t'ak tä y'it häp argollas tä ihi n'ot'okwep'ot lhäy'e iyhäj tä ihi efod, häpkhilek n'ot'okwep'ot tumphä wet kawak tä efod t'ak tumchä, mat hap'akwek, mälhyej tä Lhawuk pajche ifwenho Moisés.

Õyenlhi n'ow'uy tä efod i'pe

(Éx 28.31-38)

22Häte õyenlhi n'ow'uy tä y'it häpkhilek efod i'pe. 23Wet n'ow'o len'äyij ihi lechowej, wet õ'tsekejchehen lhipey häp n'oyik häpkhilek nikw'esache. 24Wet õyenlhi wesaj lhipey tä õ'tolnhathen tä õyen lhäya, y'it, ifwak'an, ichät, lhäy'e lino tä õ'pätsin, wet õ'tiche lhipey. 25Wet õyenlhi khäläj tä oro tä ts'ilak wet õ'lhahatche wesaj lhipey tä õ'tolnhathen tä õ'tiche n'ow'uy lhip. 26Wok oyok, wesaj lhipey tä õ'tolnhatwethä õ'tipejwhäye khäläj tä oro, nilhokche lhip, mälhyej tä Lhawuk pajche ifwenho Moisés. Häp n'ow'uytso häp tä sacerdote taw'uyhi tä yenlhipej lechumet.

Õyenlhi sacerdotes lew'uyis iyhäj

(Éx 28.39-43)

27Wet õyenhoplhi Aarón lhäy'e leles häp lakay'uchelis tä häpe lino tä wuj tä is. 28Wet lhetekp'ot lhäy'e t'akay häte lino, lhäy'e lakoset tumyejis tä häpe lino tä õ'pätsin. 29Wet lakawak häte häpe lino tä õ'pätsin lhäy'e wesaj tä y'it lhäy'e tä ifwak'an wet äp ichät, wet õ'wo lhäya, mälhyej tä Lhawuk pajche ifwenho Moisés.

Oro lhip tä õyäytej Aarón lhetekp'ot

(Éx 28.36-38)

30Häte õyenlhi oro lhip tä ts'ilak, häpe t'at n'otetnek tä n'ot'amajchet tä hin'älit tä elh tä iti lhamej häpe t'at Lhawuk laka sacerdote. Wet õ'ti'pe n'olesaynek tä õ'tech'aynej sello, häp n'olhämet tä yok, “Lhawuk T'amajchet.” 31Wet õyen t'aka niyäkw tä y'it, wet õyäytej Aarón lhetekp'ot lhip tä i'pe letacho, mälhyej tä Lhawuk pajche ifwenho Moisés.

Wak'alh Dios lew'et

(Éx 35.10-19)

32Wak'alh Dios Lew'et, häp carpa tä Dios ihoyepej laka wichi Israel lhayis. Lhamel yenlhi, itech'aynej t'at m'ak tä Lhawuk ifwenho Moisés. 33Wet tä wak'alh, lhamel yachaje Moisés häp Dios lew'et, häp carpa lhäy'e nilhokej m'ayhay tä iyej: häp ganchos, lhäy'e tablas, lhäy'e lemäynhay, lhäy'e lech'utey lhäy'e lew'etes, 34lhäy'e tson'ataj t'ähes tä õ'tsekchewek wet õ'pakej m'ak tä ichät tä õyen carpa lep'ota, lhäy'e inätetas t'ähes tä õ'tsekchewek tä õyen lep'ot elha, lhäy'e wesaj tä õhp'oyejlä häp Arca tä N'ot'amajchet tä Lhawuk lhämtes ihi tä ihi lech'o elh, 35lhäy'e Arcatso, lhäy'e lemäynhay tä õhp'alkatchufwi, lhäy'e lep'ot tä Dios Lep'altsenyajw'et, 36lhäy'e mesa lhäy'e nilhokej m'ayhay tä iyej, lhäy'e pan tä õyen t'amajchetayej Lhawuk, 37lhäy'e n'ochäkwhis tä oro tä ts'ilak, lhäy'e n'ochäkwis lhäy'e nilhokej m'ayhay tä iyej, lhäy'e aceite tä õ'tsäyhomche n'ochäkwis tä õ'wunhen, 38lhäy'e altar tä oro, lhäy'e aceite tä õ'tsäype häp elh tä õyen t'amajcheta, lhäy'e incienso tä lenij akäjche, lhäy'e wesaj tä õhp'oyejlä lepe häp Dios lew'et, 39lhäy'e altar tä bronce, lhäy'e chinhas tä bronce tä õ'lafwejlhi, lhäy'e lemäynhay tä õhp'alkatchufwi, lhäy'e nilhokej m'ayhay tä iyej, lhäy'e inät lehi lhäy'e lew'et tä i'pe, 40lhäy'e wesas yämthilek õhp'oyejlhi Dios lew'et ka'alho, lhäy'e letsutes lhäy'e lew'etes, lhäy'e wesaj tä õhp'oyejlhi lepe häp n'olafwek tä ilunejlhi Dios lew'et, lhäy'e n'olafwek t'akay lew'etes, lhäy'e niyhäy, lhäy'e nilhokej m'ayhay tä õ'tichufwi Dios lew'et, 41lhäy'e sacerdote lew'uyis tä n'oyik yämthilek y'uche tä iwoye lechumet tä ihi Dios lew'et lhip tä T'amajchet. Wok oyok, Aarón lew'uyis tä n'ot'amajchetes lhäy'e leles lew'uyis.

42Israel lhayis yenlhi nilhokej lechumet mälhyej tä Lhawuk ifwenho Moisés. 43Wet tä Moisés hiw'en tä mälhyejtso lhamel lechumet, wet lham takäpfwaye.

Currently Selected:

Éx 39: WCHB

Highlight

Copy