Éx 4

Dios hiw'enho lakhajyhayaj häp Moisés yämthilek yenlhi m'ayhay tä iselkathiyejena wichi

1Moisés nichulho Dios wet yok:

–Lhamel t'ekhahit'ala n'oye wet iwohiyet'ala olhämet. Wet yohlak, “Mathichet'a tä Dios lhain'älit amej.”

2Wet Lhawuk yok:

–¿Atsi m'ak tä ihi akwey?

Moisés yok:

–Otsut t'at.

3Lhawuk yok:

–That honhate.

Moisés ithat katsi letsut wet welan amlhätaja. Tä Moisés hiw'en, inu alhoho tä yikch'oye. 4Mat Lhawuk tahuyej wet yok:

–Chuma lechäs.

Moisés tachuma, häpet tä ikatej yachajo tä häpe t'at letsut. 5Lhawuk yok:

–Täjtso häpkhilek lhamel nikachuya tä matche t'at tä Lewuk Dios lhain'älit amej, häp achätilis Abraham laka Dios, Isaac laka Dios wet Jacob laka Dios.

6Wet äp yok:

–Athana ti'pe akwey hat'okwe.

Moisés iti'pe takwey let'okwe. Tä itiyej kanhi, hiw'en tä amostas i'pe takwey. T'äj lhäy'e lhip tä ipelaj. 7Dios yok:

–Achajo tä leti'pe akwey hat'okwe.

Moisés iwoye. Tä itiyej kanhi, hiw'en tä iches takwey, hätet iwoye t'isan imälhewek. 8Wet Lhawuk yok:

–Chik lhamel ikachu n'otetnek tä ichun, ikachuhit'ala elh. 9Mat chik ikachu täkwfwas n'otetnhay, chumela inät tä ihi tewokitaj wet tsäyla'pe honhat. Wet chik letsäype honhat, welanla w'oyisa.

Dios yen lech'otfwaya Aarón häp Moisés

10Mat Moisés yok:

–Iwuk, isit'a olhämtes tä ofwetaj oyämlhi. Pajchey tä mälhyejtso, wet tä letahuy n'oyej athana, lew'en tä isit'a olhämtes tä owoye.

11Lhawuk nichulho wet yok:

–¿Atsi tä iwo lak'aja hin'o? ¿Wet atsi tä yen opaya wet yen ch'otech'oya? ¿Wet atsi tä hiw'enyenche honhat wok yen asnama? ¿Hä kahäpeya olham Dios? 12Mäh, olham oihla amej chik letahuy wet ofwenla amho ämet chik lewohiyela.

13Mat Moisés tujlhache tä yok:

–¡Iwuk, olhaip'altsen ame, chen hin'o elh chik häpe!

14Wet Lhawuk nech'e tawäkwäye Moisés tä iwoyetso, wet yok:

–Achila iche, Aarón tä häpe Leví lhayis elh. Ow'en tä wuj tä is tä yämlhi. Athana lham nek t'at tä iho ame. Chik nämla, wujlak lakäjyaj ihi chik aiw'en. 15Ahuyeja lham, fwenhola nilhokej ämtes tä lewohiyela wet lhamlak yäme. Wet olham oihiyeja wet oihla amej chik lhämwethä, wet ofwenla amhohen m'ayhay tä is chik lewohiyela. 16Chik letahuyhiyeja Aarón, hätehlat iwoyek olham t'at tä otahuyej, wet ifwenhihola wichi m'ak tä lefwenho lhamel. 17Chäj atsut, tsi häpkhilek lechumyenlhi chik lhenlhi m'ayhay chik wichi iseltejen.

Moisés yik tä yäple Egipto

18Moisés yäple lakachäti Jetro lew'et, wet tahuyej tä yok:

–¿Hä letach'anlha n'oye tä oyäple opuhfwas Hebreo lhayis tä ihi Egipto? Ot'uhläk ow'en chik kamaj iläyhen p'iya.

Jetro nichulho Moisés wet yok:

–Mäh t'at, atamsek ihi.

19Wet tä kamaj Moisés neka tä ihi honhat tä Madián, Lhawuk äp yachajo tä tahuyej wet yok:

–Äple t'at Egipto. Pajche y'inhen nilhokej hin'ol tä t'uhtehläk ailän.

20Tä mälhyejtso, Moisés tachuma lech'efwa lhäy'e leles wet iti'pe asno, wet yikhen tä ihoye Egipto. Wet ichäji takwey häp letsut tä Dios ne'tek ichäj. 21Wet Lhawuk yachajo tä tahuyej wet yok:

–Chik lechäte Egipto, päynela niyat nilhokej n'otetnhay, tsi pajche ow'en amho akhajyhayaj yämthilek lhenlhi tähestso. Mat tetshan, olham ot'unthila lehusek wet tek iwahnhitshila Israel lhayis. 22Tä mälhyejtso fwenhola, olak, “Israel lhayis laka Dios lhämet yok, Israel häpe olhäs tä ochunkatsek. 23Pajche ofwel amho tä oyonaj, Ch'anlhaye olhäs chik yik yämthilek n'okwi n'oyej. Mat tä kawahnatshi, olänla äs tä achunkatsek.”

Õyiset lho t'äj lhip häp Moisés lhäs

24Wet Moisés inukwe len'äyij tä yäple Egipto, lham lhäy'e lech'efwa, lhäy'e leles. Tä honaj p'ante lhamel iwo lakasthaweta, wet honatsitso Lhawuk lhain'ältej Moisés wet t'uhläk ilän. 25Wet lech'efwa Séfora tachuma tunte lhip tä y'uy, wet yistej lhäs lho t'äj lhip wet itiyej Moisés lepach'ol. Tä yenlhi täjtso, häp tä ifwenho Moisés tä yok:

–Ahäpe och'efwa tä lhäs w'oyis ifwayhat.

Wet häp tä Lhawuk ileyej tä fwetaj ilän.

26Tä mälhyejtso, Lhawuk yikch'oye. Tä Séfora yok, “Ahäpe och'efwa tä lhäs w'oyis ifwayhat”, tsi lham tä yiset lhäs lho t'äj lhip.

Moisés lhäy'e Aarón lhaiw'enhen

27Wet Lhawuk pajche tahuyej Aarón wet yok:

–Mäh hoye ts'anis, lew'enla Moisés.

Wet Aarón yik. Tä yäm kanhi, hiw'en Moisés tä iwhäye Dios laka chenaj, wet n'okwiyej wet hits'u lech'alo. 28Wet Moisés ifwenho nilhokej m'ak tä Lhawuk ne'tek yäme, häte n'otetnhay tä wichi iselthiyejena tä Lhawuk ne'tek yenlhi. 29Tä ileyej tä ifwenho nilhokej Aarón, nech'e yikhen tä ihoye Egipto. Tä nichäte, lhaihutwek lhäy'e hin'ol tä thänhäy tä iyej Israel lhayis. 30Wet Aarón ifwenho lhamel häp m'ak tä Lhawuk ifwenho Moisés, häte ipäyne wichi häp n'otetnhay tä Lhawuk ne'tek yenlhi. 31Wet Israel lhayis ikachuhit'a. Wet tä lhamel nitäfwelej tä Lhawuk hip'altsen wet hiw'en leteläythayaj tä iyej, lhamel takhosche katsi wet n'okwiyej Lhawuk.

Currently Selected:

Éx 4: WCHB

Highlight

Copy