Éx 3

Dios t'äne Moisés

1Moisés t'uye p'ante lakachäti tä lhey Jetro leläy. Jetro lhey elh Reuel, lham häpe sacerdote tä ihi Madián. Fwala elh p'ante Moisés yikchufwi tson'atas, wet inukwe ts'anis pajtha nichäte Dios laka chenaj tä lhey Horeb. Lhey elh yok, Sinaí. 2Wet Lhawuk laka ángel lhain'ältej tä ihi itäj lhal tä ihi amlhäj lhawayuk. Tä Moisés iyahne, wet hiw'en tä y'uho itäjtso mat amlhäj lhawayuk tä ihi y'ohit'a. 3Wet Moisés letichunhayaj yok, “¿Atsi m'ak tä häpe täja? Lhek ohoye, oyahnhila atsi m'ak tä tamenej tä n'oya amlhäj lhawayuk.”

4Wet tä Lhawuk hiw'en tä Moisés ihoye yämthilek iyahin, tahuye tä tumho amlhäj lhawayuk wet yok:

–¡Moisés! ¡Moisés!

Tä iläte, wet nichulho wet yok:

–Oikana.

5Wet Dios ifwenho tä yok:

–Yej lhäm alhoho. Lanche anisähes, tsi honhat tä let'äsina ot'amajchet t'at.

6Wet äp yok:

–Ohäpe atetsel laka Dios. Ohäpe Abraham laka Dios, Isaac laka Dios, wet Jacob laka Dios.

Tä Moisés iläte, hip'o'pe tatey, tsi nowaye tä iyahin Dios. 7Wet Lhawuk yok:

–Ow'en tä matche tä lelhakli ihi oka wichi tä ihi Egipto. Oläte t'at t'änyajay tä tume lhamel, häp m'ak tä capataz lhayis iwoyeje, wet ohanej t'at tä leteläythayaj iyej lhamel. 8Wet häp tä onuyejchä yämthilek ofwayhtej Egipto lheley takweyey. Wet otonhiphäla lhamel tä ihi Egipto, ohänhiyela honhat tä wuj tä is lhäy'e tä tsajphä, wet t'os lhäy'e akäyek hätet iwoye inät, iläfwelchehen tä ihi. Häp honhat tä Canaán lhayis ihi, lhäy'e Het lhayis, lhäy'e Amorreo lhayis, lhäy'e Ferez lhayis, lhäy'e Hiv lhayis, lhäy'e Jebús lhayis ihi. 9Tetshan olhämet. Ow'en tä Egipto lheley yäm äytajche m'ak tä iwoyeje Israel lhayis, wet oläte t'at t'änyajay. 10Tä mälhyejtso, athana ot'än ame wet ochenla ame Egipto kaniyat yämthilek letonphä oka wichi Israel tä ihi Egipto.

11Tä Moisés iläte, wet nichulho Dios wet yok:

–¡W'et om'ayek t'at! ¿Chip iwoyek ohoye Egipto kaniyat wet otonphä Israel lhayis tä ihi laka honhat?

12Dios yok:

–Olham oihla amej. Wet m'ak tä ikalelhät tä olham t'at tä oaichen häp täja: Chik letonhiphäla oka wichi tä tälho Egipto, amel len'okwihila n'oyej kana chenajna.

13Moisés yok:

–¿Mat chip iwoyek ohoye Israel lhayis wet ofwenho tä oyok, “Achätilis laka Dios tä ichenn'o amehen”? Lhamel tay'ätshanhila n'oye, yohlak, “¿Chiwoye lhey?” ¿Atsihila olhämet chik owoye?

14Dios nichulho wet yok:

–Ohäpe Elh tä N'ilataj.#Apoc 1.4,8 Fwenhola Israel lhayis, olak, “Dios tä N'ilataj tä lechenekn'o tä ichenn'o amehen. 15Häp täjtso lhey tä nittäya. Häpe t'at amel achätilis Lewuk, häp Abraham laka Dios, Isaac laka Dios, wet Jacob laka Dios.”

Wet Dios äp ifwenho Moisés wet yok:

–Matche, ohäpe Dios tä N'ilataj. Häp täjtso olhey tä nittäya, wet wichi t'änhiyejpeja n'oye pajla'tha nichäte leles tä lepes lheley. 16Mäh hutwek hin'ol tä thänhäy tä iyej Israel lhayis wet fwenhola, olak, “Amel achätilis Abraham wet Isaac wet Jacob Lewuk Dios, lhain'älitnaj n'oyej wet yok, Ow'en m'ak tä iyej Israel lhayis wet ohanej m'ak tä Egipto lheley iwoyeje lhamel. 17Tä mälhyejtso, ofwayhthiyeja lhamel leteläythayaj tä lhamel ihi Egipto, wet ohänhiyela lhamel honhat tä lewuhuy Canaán lhayis, lhäy'e Het lhayis, lhäy'e Amorreo lhayis, lhäy'e Ferez lhayis, lhäy'e Hiv lhayis, lhäy'e Jebús lhayis. Häp honhat tä t'os lhäy'e akäyek hätet iwoye inät, iläfwelchehen tä ihi.

18“Chik lefwenho tähestso hin'ol tä thänhäy, lhamel tach'ahuhilat ame. Wet chik mälhyejtso, am lhäy'e lhamel hoyela Egipto kaniyat wet fwenhola, olakwe, Häp Hebreo lhayis Lewuk Dios ihonaj n'oyehen. Tä mälhyejtso, ch'anlha n'oyehen wet oyikhen tä onukwe ts'anis pajla'tha tres ifwalas chik oyikhen. Wet lhip chik onchätho, olänhihena itshätäy wet owunhomche tä oyen n'okhayajayej olhamel Owuk Dios.

19“Mat ohanej tä Egipto kaniyat tek iwahnhitshila oka wichi, chik kahäpeya okhajyhayaj. 20Tä mälhyejtso, on'älthiyeja okhajyhayaj häp Egipto lheley. Olänhiyejena nilhokej m'ak chik äytajche chik oselkatejen lhamel chik owoye tä ihi lhamel laka honhat. Wet nech'ehilak niyat iwahintshi oka wichi. 21Wet one'tehlak Egipto lheley nem yen w'et m'ayeka oka wichi, häpkhilek tek p'elitses chik lhamel yikhen mat ichäj m'ak tä iwatlä. 22Elhpej atsinha ihohiyela lew'etfwa tä häpe Egipto lhele, wok atsinha tä Egipto lhele tä ihi lew'et, wet t'alhiyejela m'ayhay tä oro lhäy'e tä plata, lhäy'e lew'uyis, häpkhilek tek p'elitses leles. Wet chik mälhhiyejatso, lesohiyeja nilhok m'ak tä laha ihi tä iyej Egipto lheley.”#Éx 12.35-36

Currently Selected:

Éx 3: WCHB

Highlight

Copy