Éx 26

Dios lew'et

(Éx 36.8-19)

1“Häte enlhila diez cortinas tä n'oyik tä y'it lhäy'e tä ifwak'an wet äp ichät. Is chik häpe lino tä õyen niyhäya tä õ'pätsin. Wet enlhila lhäy tä isis tä letech'aynej m'ayhay tä lhafwis ihi, wet fwuhatchelahchä yämthilek lhen häpeya owukwe carpa. 2Elh weihalhapej cortina tihila doce metros y medio tä pitaj wet dos metros tä tsajche. 3Wet tsekawek cinco cortinas, wet iyhäj cinco häte tsekawek. 4Wet pätsinchehena wesaj lhipey tä y'it wet en argollasa, wet tichehena lhipey, iyhäj häte iwoye. 5Pätsinchehena cincuenta argollas tä wesaj lhipey, wet tichehena lhipey tä lep'ajtitchewek. 6Wet enlhila cincuenta ganchos tä oro häpkhilek lenuhat lhamhomche tä lep'ajtitchewek häp cortinas tä lhen owukweya.

7-8“Häte enlhila once cortinas tä kayla w'ole.#26.7-8 Häp kayla tä ihi Palestina, pitaj lew'ole. Tihila trece metros y medio tä pitaj wet dos metros tä tsajche elh weihalhapej, wet häpkhilek lhen lep'ota häp owukwe. 9Cinco tä letsekwek wet tumteja lhip elh, wet seis iyhäj tä letsekwek tumteja lhip elh yämthilek lhen lepe p'ota elh. 10Wet enlhila cincuenta argollas tä wesaj lhipey, wet tichehena lhipey häp cortinas tä letsekchewek. 11Wet enlhila cincuenta ganchos tä bronce wet uyitchehena häp argollas, wet lep'ajtitchewek cortinas tä lhen owukweya. 12Wet lhota tä imälhehi häp carpatso, thata w'echehi owukwe häpkhilek hip'o'pe. 13Nilhokej lhipey tä medio metro tä imälhehi, häp tä is chik lhen owukwe p'ota.

14“Enlhila tson'ataj t'ähes tä letsekchewek, wet pakeja m'ak tä ichät wet p'oyeja'pe häp owukwe. Wet äp tsekawek inätetas t'ähes wet tumhatphäla tä lep'oyejpe owukwe.

Dios ne'tek õ'waklhat tablas lhäy'e m'ayhay iyhäj yämthilek õyenejlhi lewukwe

(Éx 36.20-34)

15“Wet chik lhenlhi Owukwe, chumela häp tablas tä acacia wet tshupyenchelahchä tä lekasthaynhen. 16Is chik hiw'en cuatro metros y medio tä pites elhpej, wet sesenta y cinco centímetros tä tsajche. 17Wet lanchela lhipey wet elh tä letayyenlä tijche lechowej, häpkhilek is tä let'uyit lhamhomche. Nilhokej tablas tä is chik lewoynejetso, häpkhilek lhenejlhi häp owukwe. 18Wet chik wak'alhen, tumteja veinte häp lhip tä tapinhiye, 19wet äp enlhila cuarenta plata lhipey häpkhilek lhen t'äsawtesa. Tabla weihalhapej äsayenpe täkwfwas t'äsawetes, tilachufwi lhipey tä tiyäj lhamhomche.

20“Wet häp veinte iyhäj tablas tumteja lhip elh tä tafwojhiye, 21lhäy'e cuarenta t'äsawetes tä plata lhipey yämthilek let'äsayenche'pe. 22Wet häp lhip tä tumej tä ifwala y'uy, tumteja seis tablas, 23wet iseja täkwfwas tablas iyhäj wet tihichela letselhäs lhip tä lew'echehi. 24Wet tablastso tä lep'ajtitchewek tä tumchä lhäy'e tä tumphä tä lenuhat lhamhomche häp argollas. Mälhhiyejatso tä is chik lhenlhi. 25Tä mälhyejtso, ihichela ocho tablas lhäy'e dieciséis t'äsawetes tä plata lhipey tä let'äsayenche'pe.

26“Wet tablas tä tumej lhip elh häp owukwe p'alkatejola cinco lemäynhay. 27Wet häp iyhäj tä tumej lhip elh häte tech'ayneja t'at iyhäj. Wet häp tablas tä tumej tä ifwala y'uy häte p'alkatejola cinco lemäynhay. 28Wet häp lemäynek tä inukwe lechowej, is chik lepes i'pe tablas iyhäj tä ifwache. 29Wet p'oyejchela'pe oro häp tablas lhäy'e lemäynhay, wet äp enlhila argollas tä oro häpkhilek let'uyitchehen häp lemäynhay. 30Tä mälhyejtso, chik lhenlhi owukwe tech'ayneja t'at täjnaj opäyen ame tä lhe'pe chenaj.

Lep'ot tä sak'al tä tumejlä Dios lewukwech'o tä Lhamya tä N'ot'amajchet

(Éx 36.35-36)

31“Enlhila lep'ot tä sak'al tä y'it lhäy'e tä ifwak'an wet äp ichät, wet enlhila lhäy tä letech'aynej m'ayhay tä lhafwis ihi. 32Wet chumela cuatro ch'utey tä acacia tä lep'oyejche'pe oro, wet tihila ganchos tä oro wet äsayenche'pe plata lhipey. 33Wet häp sak'altso fwuhthilhila häp ganchos tä ihi, wet Arca tä Ot'amajchet tä olhämtes ihi tila lech'oye. Wet häp sak'altso häpkhilek tamenej chik lehanej, lhip tä tumej lhip elh tä Ot'amajchet, wet lhip tä tumej lhip elh häpe Ot'amajchet tä Lhamya.#Heb 6.19-20 34Wet p'oyeja'pe lep'ot tä oyen lheya Op'altsenyajw'et häp Arca, wet tihila häp lhip tä Ot'amajchet tä Lhamya. 35Wet tihila mesa häp lhip tä iw'echehi lep'ot, yej tihila lhip tä Ot'amajchet tä Lhamya tä Arca ihi, wet tumteja tä tafwojhiye. Wet häp n'ochäkwhis tumteja lhip tä tapinhiye tä ihi tä mesa tatache.

N'oyik tä lepe p'ot

(Éx 36.37-38)

36“Häte enlhila n'oyik tä y'it lhäy'e tä ifwak'an wet äp ichät, wet äp häpe lino tä õyen niyhäya tä õ'pätsin, wet lhäy wuj tä isis, häpkhilek lhen lepe p'ota häp carpa tä owukwe. 37Wet enlhila cinco ch'utey tä lep'oyejche'pe oro, lhäy'e ganchos tä oro, häpkhilek lefwuhthilhi häp lep'ottso. Wet ch'uteytso äsayenche'pe bronce.

Currently Selected:

Éx 26: WCHB

Highlight

Copy