Éx 22

Dios lhämtes tä yäme m'ak tä is chik õ'woye chik õ'wit'äyen m'ak tä lewuk ihi

1“Chik elh t'etane w'asetaj wok tson'ataj, wet ilän wok iwom, is chik tiskanejpe cinco w'asetas häp w'asetaj tä t'etane. Wet chik tson'ataj is chik tiskanejpe cuatro tson'atas. 2Chik õhw'enej hin'o tä t'etan, wet chik õ'wo m'akayej wet y'il, letes ihihit'a elh tä ilän. 3Mat chik ifwala tä õ'län, häp tä letes ihi elh tä ilän. Wet elh tä t'etan iwohiyet'ak niwoya lahaya m'ak tä t'etane. Mat chik niw'ena chinaj t'äj, is chik lham t'at tä õ'wom wet laha häp tä õyen lahaya m'ak tä t'etane.

4“Wet elh chik t'etane itshäwet, wet niläna mat iti lhamej, w'asetaj, wok asno, wok tson'ataj, wet chik lewuk hiw'en, yachaj itshäwet tä t'etane wet tiskanejpe täkwfwas itshätäy iyhäj.

5“Elh chik iwahintshi leläy tä hit'ekyenwethä, wet leläy tiyäjo elh lafwek, iwohiyet'ak nitiskanayejpe lakäs lhay wok uvas tä isis häp elh käs wok uvas tä leläy ikänchi.

6“Elh chik iwunho hon'al wet itäj y'ajpe honhat, wet y'aje elh lafwek wet y'o nilhokej m'ak tä ihi, elh tä lewoynejek itäj iwohiyet'ak niwoya lahaya nilhokej m'ak tä ikänchi.

7“Elh chik hiw'enho laka chinaj t'äj wok m'ayhay tä laha ihi häp elh wet ne'tek t'amajej, wet chik õt'etane tä ihi lew'et, elh tä kalelhäj tä t'etane iwohiyet'ak nachajaye lewuk, wet iwo lahaya m'ak tä t'etane wet ithatpe iyhäj. 8Mat chik nikalelhäja elh tä t'etane, is chik hin'o tä m'ak tatäyhi lew'et õ'tihi tä Dios tatache, yämthilek kalelhäj chik kalhamak tachuma m'ak tä õne'tek t'uye.

9“Wet chik iche m'ak tä tatäy, chik w'asetaj, wok asno, wok tson'ataj, wok n'ow'uy, wok m'ak at chik häpe, wet chik iche elh tä hiw'en wet lhayen lewuka, mat chik iche hin'o elh tä yäme tä lewuk, is chik õ'tihi tä Dios tatache häp lhamelna. Wet elh chik kamatache tä fwetaj lewuk, iwohiyet'ak nitisa elh tä matche tä lewuk, iwo lahaya wet ithatpe iyhäj.

10“Chik elh hiw'enho hin'o elh häp lelä w'asetaj, wok asno, wok tson'ataj, wok itshäwet elh chik häpe yämthilek t'uye, wet chik y'il itshäwet, wok õ'wo lelätseka, wok õt'etane, wet newache elh chik hiw'enej, 11tä mälhyejtso, hin'o tä õy'uhyene is chik hit'untejche lhämet häp lewuk, häp tä isej Dios, wet yok, Olhamhit'ak owit'äyen m'ak tä õne'tek ot'uye. Wet elh tä lewuk is chik iwoye lhämet wet tek t'alheje laha häp elh. 12Mat chik hin'o tä t'uye hiw'enej tä õt'etane, tä mälhyejtso lham t'at tä iwo lahaya. 13Wet chik itshäwet tä fwitsaj tä ilän, is chik ichäje lewuk häp lhipey häpkhilek lewuk hiw'en tä matche t'at lhämet, wet tek õt'alhe'pe.

14“Chik elh tacheyjäne elh lelä, wet chik y'il wok lelätsek ihi, wet lewuk niw'enayej, tä mälhyejtso, elh tä tacheyjänej iwohiyet'ak niwoya lahaya häp lewit'äyhyaj. 15Mat chik lewuk hiw'enej lelä lewit'äyhyaj, tä mälhyejtso, elh tä tacheyjänej iwohit'a lahaya, tajlhama tä tiskanpe tä ichumyenlhi.

Wichi lakeyis tä isen

16“Elh chik häpek t'uhläk isakanej atsinha tä kamaj kan'och'efwaya, wet itiyej t'akanyaj wet imäyej tä häpe lhutsha tä newache hin'ok yen laka isa, iwohiyet'ak nitiskana'pe mälhyej lakey tä õne'tek wichi iwoye. Wet häte iwohiyet'ak newayej wet yen lech'efwaya. 17Wet chik lhutsha lajcha nhuminak lhäse iyej hin'o tä imäyej, tä mälhyejtso, hin'o iwohiyet'ak nitisa lhutsha lajcha, hiw'enho chinaj t'äj tä w'awulho laha häp lhutsha tä kamaj kan'och'efwaya.

18“Atsinha tä lhayen hiyawuya, is chik õ'län.

19“Elh chik häpek yen ch'efwaya itshäwet, is chik õ'län.

20“Elh chik häpek ilänhen itshätäy wet yen n'okhayajayej dios lhayis tä w'enha lhamej, wet tek yen n'okhayaja n'oyej tä ohäpe Awuk Dios, is chik õ'täyhat.#Deut 17.2-7

21“Yej lewo m'akayej hin'o tä w'enha lhamej tä i'amejen, wok leläkwlhi. Tsi amel häte ahäpehente wichi tä w'enha lhamej tä lheyayhi honhat tä Egipto.#Lev 19.33-34

22“Yej lelhaklitwethä tesalis wok chipenhas. 23Tsi chik lelhaklit wet lhamel t'än och'oye, ohohiyela wet otch'othiyela. 24Wet wujla owäk, hätehlat iwoye itäj, wet olänla amejen n'ofwajnhates. Wet hach'efwas häpkhihena tesalis wet ales häpkhihena chipenhas.

25“Chik lecheyjäntej aka chinaj t'äj elh oka wichi tä p'elitsaj tä i'amej, yej aletech'aynej hin'o tä yen chumeta tä icheyjäntejen wichi laka chinaj t'äj, wet yej t'alheje chik hip'ajtej lhip.#Lev 25.35-38 26Wet chik hin'o tä lecheyjäntej aka chinaj t'äj hin'äype lew'uy m'ak tä lecheyjäntej, chik ifwala y'uy achaje lew'uy, 27tsi ihichet'a lew'uy elh yämthilek taw'uyhi tä imä.#Deut 24.10-13 Wet chik lham t'än och'oye, ohohiyela wet otch'othiyela, tsi ohäpe hap'altsentsaj.

28“Yej lewoyej n'oye ämtes tä ni'isa tä ohäpe Dios, wok letiyej häp hin'o tä len'ohyaj ihi tä i'amejen.

29“Yej n'äyej n'oho akäs lhay lhäy'e hat'es. Wet w'en n'oho häp äs tä achunkatsek yämthilek olewuk, 30häte aläy leles tä lechunkatshay, w'asetas, tson'atas. Lhäs chik nichätchä iyej lako pajtha siete ifwalas, wet ocho ifwalas häp tä lew'en n'oho.

31“Is chik ahäpehen wichi tä lhayen t'amajcheta n'oyej.

“Yej tufw t'isan itshäwet tä iyhäj itshätäy tä fwitses lelänek tä ihi tayhi.#Lev 17.15 W'enho asinhäs.

Currently Selected:

Éx 22: WCHB

Highlight

Copy