Éx 23

Dios lhämtes tä n'okalelhthayajchal

1“Yej woye ämtes tä kamatachehen yämthilek letach'ote elh tä iwoye m'ak tä ni'isa.

2“Yej alethate iyhäj tä wujpe yämthilek lewoye m'ak tä ni'isa. Wet yej nowaye lhamel tä wujpe, mat äme m'ak tä is alhoho. 3Yej tach'ote elh tä ni'isa alhoho m'ak tä iwoye, tej chik häpe hin'o tä p'elitsaj.

4“Chik atayhfwa lelä w'asetaj tatäy, wok lelä asno, chik am lelhoke achaje. 5Ch'ote t'at elh tä n'äyi amho. Chik lew'en lelä asno tä nichätej katsi lelhuk tä choyhat, tiyej kanhi tä i'pe.

6“Chik hin'o tä p'elitsaj lewit'äyhyaj ihi, äm is alhoho akalelhthayaj tä lewoyeje.

7“Yej wo asufwkanyaja, wet yej tiyej letes elh tä newache letes yämthilek õ'län. Tsi olham oyenla tesayej elh chik iwoye täjtso.

8“Yej tachumlä m'ak chik elh ikänitlhi amej tä t'uhläk katetshana m'ak tä ni'isa tä iwoye. Tsi täjtso häp tä tamenej hin'ol tä nemhit itetshan m'ak tä is alhoho yämthilek iwoye, wet niwohit m'ak chik isej iyhäj tä laj letesa.

9“Yej tiyej aläkwyhanyaj hin'o tä w'enha lhamej tä i'amejen. Tsi amel häte ahäpehente wichi tä w'enha lhamej tä lheyayhi honhat tä Egipto, wet amel lew'enpe täjtso.#Lev 19.33-34

Nekchäm siete wet ifwala siete

10“Is chik lesaji akäsw'et wet letutcheyhi seis nekchämis wet lehutpejwek yachuyaj lhay. 11Mat chik lechäte nekchäm siete, yej saji honhat. Ch'anlhaye tä wichi tä p'elitses tufw lhay yachuyaj tä atolhkas tä ihi, wet itshätäy tä iche tayhi lhamel tufw t'at m'ak tä imälhehi. Häte alafwek tä uvas ihi lhäy'e olivos.#Lev 25.1-7

12“Seis ifwalas tä lhenlhi nilhokej achumtes, mat chik lechäte ifwala siete, wo elakw'eta. Häte alä w'asetaj lhäy'e asno yej chumyenwethä, lhäy'e akawo, lhäy'e hin'o tä w'enha lhamej tä i'amej, wet tek t'elak ilänhen.#Éx 34.21; Lev 23.3

13“Woye nilhokej m'ak tä ofwel amhohen. Wet yej wo lheyisa dios lhayis tä w'enha lhamej.

Nekchämpej iche tres n'okäjyajay

(Éx 34.18-26; Deut 16.1-17)

14“Nekchämpej wo akäjyaja tres veces tä lewunitn'o. 15Chik lechäte ifwala tä letufw pan tä levadura newayej, en akäjyaja, mälhyej olhämet tä one'tek lewoyaye, pajtha siete ifwalas. Wet lewhäy häpe t'at wel'a tä lhey Abib, tsi häpenaj wel'atso tä amel lhekaych'oye honhat tä Egipto.#Éx 12.14-20 Wet elh chik iho n'oye, iwohiyet'ak nichäja n'oye m'ak tä yen otw'ayhata.

16“Häte wo akäjyajayej häp ifwala tä lelanhi yachuyaj lhay tä ichun tä ihi alafwek. Wet äp wo akäjyajayej nekchäm lepes tä lelanhi nilhokej lhay yachuyaj tä letihchä.

17“Tä mälhyejtso, nilhokej hin'ol nekchämpej is chik iho n'oye tres veces tä ohäpe Awuk Dios.

18“Chik lelänhen itshätäy tä lhen han'okhayaja n'oyej, yej p'ajtej pan tä levadura iyej. Häte isit'ak t'alhä imälhehi yäk fwala elh.

19“Tä ohäpe Awuk Dios, is chik lehäne ow'et häp akäs lhay tä ichun wet äp isis.

“Yej penej kayla lhäs häp lako kat'os.

Lhawuk laka ángel

20“Lhek tetshan olhämet, ochenla amehen oka ángel wet ichunla ahilä. Wet t'uhla amehen tä lenukwe han'äyij, wet aichätyenhiyela honhat tä pajche owaklhat amho. 21Ch'ahuyaye ángeltso wet woyaye lhämet. Yej tatayhlä tsi olham tä olhämetej, wet tek itäyhthila amejen ates. 22Mat chik letach'ahuyaye wet lewoye m'ak tä one'tek lewoye, ottayhlahlä atayhfwas wet olhamlak olhaklitwethä wichi chik fwetaj ailhaklitwethä. 23Oka ángel ichunla ahilä wet ihänla amehen honhat tä lewuk Amorreo lhayis, lhäy'e Het lhayis, lhäy'e Ferez lhayis, lhäy'e Canaán lhayis, lhäy'e Hiv lhayis, lhäy'e Jebús lhayis. Wet olhamlak otiyej kanhi wichitso. 24Yej tena lhamel lakeyis wet yej t'upiyejchä laka dios lhayis yämthilek len'okwiyayej. Mat wasthichela nilhokej lecheyälis lhäy'e tuntey tä lhamel iwo len'okhayajayej. 25Wunitn'o tä ohäpe Awuk Dios, wet olham otkäpfwayhiyela äk lhäy'e inät. Osohla amejen t'inhayajay, 26wet pitajla ifwalas tä leläy. Wet ihichet'ala atsinhak leles y'inhiche, wok sufwnaj chik ihi aka honhat.

27“Honhat at chik häpek lenukwe, ochenhiyela lenowayhyaj tä wuj lhäy'e lelhakli wichi tä ihi, wet ostunla atayhfwas yämthilek inukwe alhoho. 28Oyokwesila Hiv lhayis, lhäy'e Canaán lhayis, lhäy'e Het lhayis. 29Mat tek häpkhilek nekchäm weihalha wet noj lhamel. Tsi chik yofwajkwet noj wichi tä i'pe honhat, wujla'pe itshätäy tä fwitses chik iche wet aiwit'äyen amel. 30Mat lhimphajpej lhimphajpej tä otäyhat wichi, pajla'tha wujpey ales wet nech'e häpkhilek alhenay lewuka honhat, 31tälhe Lewomekchät pajtha nichäte lewomekitaj tä iwhäye Filisteo lhayis kahonhat, wet tälhe ts'anis pajtha nichäte tewokitaj Éufrates. Wet otihihila akweyey häp wichi tä ihi honhatestso, wet amenlak letäyhat lhamel.

32“Yej alep'ajtej lhamel lhäy'e laka dios lhayis, 33wet yej tach'anlhayek lhamel ihi aka honhat, häpkhilek nitmena amejen chik lewoye hach'isukyajay tä tatay n'ohlä. Tsi chik len'okwiyej lhamel laka dios lhayis, atäyhyaj t'at.”

Currently Selected:

Éx 23: WCHB

Highlight

Copy