San Mateo 27
27
Ledéregerúniwa Jesúsu lun Piláto
(Mr 15.1; Lc 23.1-2; Jn 18.28-32)
1Dan larúgadunbei, ába jadámuridagun sun jábutigu fádirigu jáma wügǘriña weírigutiña lídan jafíñen juríu aríja cába lan jadǘga lun lasíadirúniwa Jesúsu. 2Ába janǘgüni gürágu, ába jedéregeruni lun Póncio Piláto le gumádimati.
Loúnwen Júdas
3Dan le laríjinbei Júdas, le alúgurubalin Jesúsu, luágu siádi jamáali lan Jesúsu lun loúnwen, ába laságürijan, ába láguyugüdüni darándi murúsun pláta ligía joun jábutigu fádirigu lúma joun wügǘriña weírigutiña, 4ába laríñagun joun.
—Afígounjaadina láu nedéregerun ában wügǘri madúnrunti lun loúnwen.
Ába jaríñagun lun.
—¿Cámegi le warúma? ¡Bugúya lun baríjini líra!
5Ába lachágaruni Júdas seínsu ñi témpulurugu, ába lídin átigiragua lúngua.
6Ába jabúduni jábutigu fádirigu seínsu ligía, ába jaríñagun.
—Siñáti wíchuguni seínsu le tídoun gáfu to lágei liseínsuna Búngiu ladǘga lebégi oúweni.
7Ába júaradun lun lagáñijoún lufúlasun ában wügǘri le adáagubei barámbi láu seínsu ligía lun jábunajoún teréncha ñi. 8Ligía Lufúlasun Jítaü lubeí líribei fulásu ligía chülǘ lúmoun dan le. 9Ítara líña lagúnfulirun lé meja laríñagubei proféta Jeremías. “Barǘ jamuti darándi murúsun pláta ligía, ebégi le jíchugubei Israelítagu luágu wügǘri ligía, 10ába jagáñijani lufúlasun ában wügǘri le adáagubei barámbi láu, quei laríñaguni Nabúreme nun.”
Jesúsu ligíbugiñe Piláto
(Mr 15.2-5; Lc 23.3-5; Jn 18.33-38)
11Barǘwati Jesúsu ligíbugiñoun gumádimati, le gíribei Piláto, le álügüdübalin.
—¿Amǘrüsan Jarúeitebei Juríu?
Ába laríñagun Jesúsu lun.
—Ánja, áu quei baríñaguni.
12Dán buriti jíchugun jábutigu fádirigu jáma wügǘriña weírigutiña lidúnrun, moúnabuntija Jesúsu ni cáta. 13Ábati laríñagun Piláto lun.
—¿Magáambun bumútisan le jaríñagubei buágu?
14Moúnabunti Jesúsu ni cáta, ábati laweíridun lanígi gumádimati.
Lasiádirún Jesúsu lun loúnwen
(Mr 15.6-20; Lc 23.13-25; Jn 18.38–19.16)
15Gagáburi lumúti mejáti gumádimati lígiragüdǘn ában adaürǘti joun gürígia lídan fédu, furúmieguarügü adaürǘti le jamúriajan lúma. 16Ñíñeinti ában adaürǘti, díseti leíbaajan líri, gíriti Barabási, 17dánti le adámuriñujaña lan sun gürígia, ába lálügüdüniña Piláto.
—¿Ca jabúseerubei nígiragüdün jun, Barabási, ódi Jesúsu le únbei laríñawagua Crístu?
18Líridubalin gíñe Jesúsu ladǘga subúdi láali lan luágu ladǘga lan jagímugan lun jedéregerei.
19Sun ñun lan Piláto luágu lála le lánina agúseruni, ába toúnajan lúmari aríñaga lun. “Madǘgabá ni cáta láu gürígia úaraguati le, ladǘga gewéneditina buga ában uwénedi wuríbati áriebu buga ladǘga gürígia le.”
20Ába jádaruni jábutigu fádirigu jáma wügǘriña weírigutiña jádoun gürígia lun jamúriajan lun láfuridun Barabási, lun lafarún Jesúsu. 21Ábaya ladímurejan gumádimati joun sun gürígia jagía, ába laríñagun joun.
—¿Ca jádaangiñe biángubei jabúseerubei lun nígiragüdüni jun?
Ába jaríñagun.
—Barabási.
22Ába laríñagun Piláto joun.
—¿Cábati nadǘga láu Jesúsu le únbei laríñawagúa Crístu?
Ába joúnabun súngubei.
—¡Dáguabeí luágu gurúwa!
23Ába laríñagun Piláto joun.
—¿Cáti wuríbati ladǘgübei?
Ábatima jagúaragun.
—¡Dáguabeí luágu gurúwa!
24Dan le laríjinbalin Piláto luágu siñá lan ladǘgün ni cáta lueídügüya chagáguaü, ába lamúriajan dúna, ába lachíbuni lújabu jagíbugiñe gürígia, aríñageina.
—Máma áu lúnbei naríjin láu loúnwen wügǘri madúnrunti le, jugúya lun jaríjini ñi.
25Ába jaríñagun sun gürígia.
—¡Wagía jáma warájüñü, wanǘgüba furúmieguarügü dúru wawoúguoun luágu loúnwen!
26Ábati lígiragüdüni Piláto Barabási, ába loúnajan abeíchei Jesúsu, ába ledéregeruni lun ládarawagún luágu gurúwa.
27Lárigiñe, ába janǘgüni lisúdaaranigu gumádimati Jesúsu tídoun lúban Piláto, ába joúndaraguagüdüniña sun súdaara geyégua láu. 28Ába jarágachunun lanáangun, ába jíchugun ában anáanguni funátu luágu, 29ába jíchugun ában rídi láuti jíyu lábulugu, lúma ában mabúru lújaburugu le loúnwenren. Ábati jájuduragun ligíbugiñe, ába jéjerajan láu, ába jaríñagun lun.
—¡Gabágarilá Jarúeite Juríu!
30Ába gíñe jásueraguni, janǘgeija mabúru ligía, jíchaaguei lábulugu. 31Lárigiñe jéjerajan láu ítara, ába jagídarunun anáanguni funátu lueí, ába jadáürünun lanáangun luágu. Ába janǘgüni lun ládarawagún luágu gurúwa.
Ládarawagún Jesúsu luágu gurúwa
(Mr 15.21-32; Lc 23.26-43; Jn 19.17-27)
32Dan le áfurideina jáña lan, ába jadúnragun lúma ában wügǘri Cirénena, gíriti Simón, ába jafósuruni lun lanǘgüni lugúruwan Jesúsu.
33Ítara líña jachǘlürün lídoun ában fulásu gíriti Gólgota, líla líra, Lufúlasun Lábu Ichǘgü. 34Ñi jíchiga diweín láu árani tídan lun Jesúsu lun látunun, joúcharügü lumútu, mátun lumútu.
35Dan le dágua jamáali luágu gurúwa, ába jájurerun súdaara ubúnuruni lun jafánreinjanun lanáangun Jesúsu jádaangua. Ítara líña lagúnfulirun lé meja labǘrüjabei proféta. “Ájureratiña ubúnuruni lun jaríjin cába lan jádaangiñe erédera táu nanáangun.” 36Ába jañúurun ñi lun joúnigiruni. 37Ába jíchugun ában abǘrüjoúni loúgiñe lichǘgü le ñí lubei laríñaga ca lan lidúnrunbei. Abǘrüjoúni ligía ítara líña. “Jesúsu le, le jarúeitebei juríu.”
38Dáwaguatiña gíñe bián jíwerutiña luágu gurúwa lúma, ában lueígiñe loúnwenren, ában lueígiñe lubaǘna. 39Já buriti ásügürübaña ñígiñe, ába janábuni, ába jánjingichuni jachǘgü, 40aríñageina.
—Bugúya le gayáraabei bágurunun témpulu ábaya baráramagüdünun lídan ǘrüwa wéyu, sálbaguabá búngua. Ánjein Liraǘ bubei Búngiu, raríba lueígiñe gurúwa.
41Ítara líña gíñe jéjerajan jábutigu fádirigu jáma arúfudajatiña lilúrudun Moisés, fariséogu, jáma wügǘriña weírigutiña, láu, ábaja jaríñagun jámagua.
42—Sálbati ámu, ánjein lúngua, siñáti lasálbaragun. Ánjein ligía lubeí Jarúeitebei Israelítagu, raríla lueígiñe gurúwa, afíñe wamámuga luágu. 43Rúlaali lafíñen luágu Búngiu, sálbaleíti Búngiu guetó ánjein inárüni lubeí luágu jínsiñe lan lun, quei aríñagaali lan woun luágu Liraǘ lan Búngiu.
44Anába jamúti gíñe jíwerutiña ja dáwaguñubaña luágu jagúruwan úara lúma.
Loúnwen Jesúsu
(Mr 15.33-41; Lc 23.44-49; Jn 19.28-30)
45Ábati labúrigadun sun fulásu lúmagiñe amídirugu darí ladaǘnrün ǘrüwa rábounwéyu. 46Queí buri óra méme ligía, ába lagúaragun Jesúsu jére.
—Elí, Elí, ¿láma sabáctani? —líla líra. Nubúngiute, Nubúngiute, ¿cásan uágu bígirana?
47Ñíñanu agáambuti jádaangiñe ja ñíbaña, ába jaríñagun.
—Lagúajaña wügǘri le lun proféta Elías.
48Ába lídin ában jádaangiñe eíbaagueina anǘga ában mudúsi, lárigiñe ladǘdüragüdüni táu diweín garǘjütu ába líchuguni luágu ában wéwe, ába línchunun lun lun lachúrunun. Ába lachúrunun. 49Ába jaríñagun ja jíbiri.
—Ígirabeí, waríja ánjein ñǘbin Elías asálbarei.
50Ábaya ladǘgün Jesúsu ában agúaraguni jéreti, ábati loúnwen. 51Lídan óra ligía, ába tajeíridagun tubélun témpulu lídan bián murúsun, íñugiñe lun ǘnabun. Ába ladágarun ában járabaganáli, ába láwarajan dǘbü. 52Ába lánjunrenchúnga umúajaü, águyuguatiña sarágu jádaangiñe afíñetiña luágu Búngiu já meja jiláguaañábaña. 53Ába jáfuridunga lídaangiñe jamúaja lárigiñe lásaarun Jesúsu lídaangiñe oúweni. Ába jebélurun lídoun ubúrugu Jerusalén le biníwabei, le ñí lubei jaríjaña sarágu gürígia.
54Léti jábuti súdaara jáma súdaara ja oúnigirubalin Jesúsu, dan jasándirunbalin járabaganáli lúma dan jaríjinbaalin líbiri buri cátei le asúseredubei, ába janúfudedagun sarágu, ába jaríñagun.
—Inárüni, Liraǘ Búngiu wügǘri le.
55Ñíñanu sarágu würÍña aríagua dísegiñe, ja afálarubalin Jesúsu lúmagiñe Galiléagiñe íderagua jameí. 56Ñíñoun María Magdaléna jádan, María to lúguchu Jacóbo lúma José, túma jáguchu lirájüñü Zebedéo.
Labunúniwa Jesúsu
(Mr 15.42-47; Lc 23.50-56; Jn 19.38-42)
57Dan le agúñedeina líña lubeí, ába liábin ában wügǘri rísiti gíriti José, lídaangiñeti fulásu le gíribei Arimatéa, jádaangiñeti gíñe ja afálarubalin Jesúsu. 58Ábati lídin aríjei Piláto, ába lamúriajani lúgubu Jesúsu lúma. Ábati laríñagun Piláto lun líchugúniwa lun, 59ába lanǘgüni José, ába loúburaguni tídan ában gamísa jarúmatu. 60Ába líchuguni lídoun lumúaja iséri lé yebe lachígagüdübei lubárua luágu dǘbü. Lárigiñe ladáuruni umúajaü láu ában dǘbü weíriti luágu lubéneri, ába lídin. 61Ñíñounti María Magdaléna túma to ában María ñun ligíbugiñe umúajaü.
Oúnigirutiña ligíbugiñe lumúaja Jesúsu
62Larúgan, lárigiñe aráansejani lubá luwéyuri eméraaguni, ába joúdin jábutigu fádirigu jáma fariséogu aríjei Piláto, 63ába jaríñagun lun.
—Wábuti, jarítagua wamúti luágu aríñaga lán meja yéeti ligíra dán meja moúnwengili luágu lásaaruba lan luágu lǘrüwan wéyu lárigiñe loúnwen. 64Oúnajagubeibá achoúrurei umúajaü daríme lǘrüwan wéyu, mayábin jamámuga láni disípulugu áriebu íwerujei lúgubu, ábame jaríñagun joun gürígia luágu saráali lan. Weíritimaajalímeti lagúmujoún iyéeni le sügǘ láu le furúmiñeti.
65Ába laríñagun Piláto joun.
—Barǘjuma fiú súdaara, jeíba choúru jumeí umúajaü le lubuídun-ágei juáraati.
66Ábati joúdin, ába jachoúruruni dǘbü le luágubei umúajaü, ába jígiruniña súdaara lun joúnigiruni.
Currently Selected:
San Mateo 27: cab
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
